ອາເມລິກາເລີ່ມປະຕິບັດການໂຈມຕີທາງອາກາດ ຕອບໂຕ້ກຸ່ມຕິດອາວຸດຢູ່ອີຣັກ ແລະ ຊີຣີ
ກອງທັບອາເມລິກາເລີ່ມປະຕິບັດການໂຈມຕີທາງອາກາດຕອບໂຕ້ກຸ່ມຕິດອາວຸດຢູ່ອີຣັກ ແລະ ຊີຣີ ທີ່ເຊື່ອວ່າໄດ້ຮັບການສະໜັບສະໜູນຈາກອີຣານ ແລະ ເປັນຜູ້ຢູ່ເບື້ອງຫລັງການກໍ່ເຫດໃຊ້ໂດຣນໂຈມຕີໃສ່ຖານທັບອາເມລິກາຢູ່ຈໍແດນໃກ້ຊາຍແດນຊິຣີ ຈົນເຮັດໃຫ້ມີທະຫານອາເມລິກາເສຍຊີວິດ 3 ຄົນ ໃນທ້າຍອາທິດຜ່ານມາ.
ໂດຍກອງທັບອາເມລິກາໂຈມຕີໃສ່ຖານທີ່ໝັ້ນຂອງກອງກໍາລັງພິທັກການປະຕິວັດອີຣານ (IRGC) ແລະ ເຄືອຂ່າຍຢູ່ອີຣັກ ແລະ ຊິຣີ ເຊິ່ງມີເປົ້າໝາຍ 85 ກວ່າຈຸດໃນ 7 ພື້ນທີ່ສໍາຄັນ (4 ແຫ່ງຢູ່ຊິຣີ ແລະ 3 ແຫ່ງຢູ່ອີຣັກ) ຖືກໂຈມຕີພາຍໃນໄລຍະເວລາ 30 ນາທີ.
ທ່ານ ຈອນ ເຄີບີ ໂຄສົກສະພາຄວາມໝັ້ນຄົງແຫ່ງຊາດອາເມລິກາ ລະບຸວ່າ: ການໂຈມຕີດັ່ງກ່າວຖືເປັນການຕອບໂຕ້ຊຸດທໍາອິດຈາກກອງທັບອາເມລິກາ ແລະ ຜ່ານມາບໍ່ມີການຕິດຕໍ່ສື່ສານລະຫວ່າງອາເມລິກາ ແລະ ອີຣານນັບແຕ່ມີເຫດການໂດຣນໂຈມຕີ ຈົນເຮັດໃຫ້ທະຫານອາເມລິກາເສຍຊີວິດ 3 ຄົນຢູ່ຈໍແດນ. ພ້ອມເນັ້ນວ່າ: ເປົ້າໝາຍຂອງການໂຈມຕີຄັ້ງນີ້ ທາງກອງທັບອາເມລິກາໄດ້ເລືອກມາແລ້ວ ເພື່ອຫລີກເວັ້ນການບາດເຈັບລົ້ມຕາຍຂອງພົນລະເຮືອນ.
ປະຕິບັດການນີ້ມີການໃຊ້ເຮືອບິນຖິ້ມລະເບີດ B1 ເຊິ່ງມີປະສິດທິພາບໃນການທໍາລາຍສູງ. ເບື້ອງຕົ້ນຍັງບໍ່ມີການປະເມີນຄວາມເສຍຫາຍທີ່ເກີດຂຶ້ນ, ແຕ່ທະຫານລະດັບສູງຂອງກອງທັບອາເມລິກາຂ້ອນຂ້າງໝັ້ນໃຈວ່າ: ສະຖານທີ່ທີ່ຖືກໂຈມຕີລ້ວນໄດ້ຮັບຄວາມເສຍຫາຍຢ່າງໜັກ. ພ້ອມລະບຸວ່າ: “ປະຕິບັດການຕອບໂຕ້ນີ້ຈະບໍ່ຈົບລົງພຽງ (ຄໍ່າຄືນ) ວັນນີ້”.
ຫລາຍຝ່າຍເບິ່ງວ່າ: ອີຣັກ ແລະ ຊິຣີກາຍເປັນສະໜາມຮົບສໍາລັບອາເມລິກາ ແລະ ອີຣານອີກ ໂດຍອີຣານຫລຸດພົ້ນຈາກການຕອບໂຕ້ໂດຍກົງຈາກກອງທັບອາເມລິກາ. ຂະນະທີ່ອີຣັກ ແລະ ຊິຣີຕ້ອງເປັນຝ່າຍເສຍຫາຍແທນ ທ່າມກາງຄວາມກັງວົນວ່າ: ສະໜາມຮົບຄວາມຂັດແຍ່ງຢູ່ຕາເວັນອອກກາງຈະຍິ່ງຂະຫຍາຍຕົວ ແລະ ເຄັ່ງຕຶງຂຶ້ນ.
ອ້າງອີງ:
- https://www.bbc.com/news/live/world-68144478
- https://www.aljazeera.com/news/liveblog/2024/2/3/israels-war-on-gaza-live-us-strikes-drive-fears-of-gaza-war-spillover
- https://www.reuters.com/world/us-starts-retaliatory-strikes-iraq-syria-officials-2024-02-02/
