WHO ເຕືອນ ການຂາດແຄນຢາປົວພະຍາດເບົາຫວານ ເຮັດໃຫ້ຢາປອມລະບາດໃນທົ່ວໂລກ
ຂ່າວຕ່າງປະເທດລາຍງານ ວັນທີ 30 ມັງກອນ 2024, ອົງການອະນາໄມໂລກ (WHO) ກ່າວເຕືອນວ່າ: ກຸ່ມຢາ GLP-1 agonists ເຊິ່ງເປັນຢາປິ່ນປົວເບົາຫວານທີ່ໃຊ້ຢ່າງແຜ່ຫຼາຍ ແລະ ມີສ່ວນຊ່ວຍໃນການຫລຸດນ້ຳໜັກ ພົບກັບບັນຫາການຂາດແຄນທົ່ວໂລກເມື່ອປີຜ່ານມາ ສົ່ງຜົນໃຫ້ມີການຂາຍຢາທີ່ສົງໄສວ່າເປັນຢາປອມເພີ່ມຫຼາຍຂຶ້ນ.
WHO ກ່າວວ່າ: ຢາປອມທີ່ໃຊ້ປິ່ນປົວພະຍາດເບົາຫວານ ພາໃຫ້ເປັນອັນຕະລາຍຕໍ່ສຸຂະພາບຢ່າງຮ້າຍແຮງ ມັກມີຂາຍ ແລະ ຈັດຈຳໜ່າຍຕາມສະຖານທີ່ຕ່າງໆທີ່ບໍ່ໄດ້ຮັບການຄວບຄຸມ ລວມເຖິງສັງຄົມອອນລາຍ, ຜະລິດຕະພັນທາງການແພດປອມນັ້ນບໍ່ມີປະສິດທິພາບໃນການປິ່ນປົວ ແລະ ອາດພາໃຫ້ເກີດປະຕິກິລິຍາທີ່ເປັນພິດໄດ້, ຢາປອມເຫຼົ່ານີ້ອາດຈະຜະລິດຂຶ້ນໂດຍບຸກຄົນທີ່ຂາດຄວາມຮູ້ເລື່ອງຢາ ແລະ ອາດຈະຜະລິດແບບບໍ່ຖືກສຸຂະອະນາໄມ ແລະ ອາດຈະປົນເປື້ອນແບັກທີເຣຍ,
WHO ເນັ້ນວ່າ: ການຂາດແຄນຢາກິນໃນໄລຍະເວລາຍາວນານ ບວກກັບການຈຳໜ່າຍຢາປອມທີ່ເພີ່ມຫຼາຍຂຶ້ນມີທ່າອ່ຽງວ່າຈະສົ່ງຜົນກະທົບຢ່າງຮຸນແຮງຕໍ່ຜູ້ເປັນພະຍາດເບົາຫວານປະເພດທີ 2. ທັງນີ້, WHO ແນະນຳໃຫ້ຊື້ຢາຈາກແຫຼ່ງທີ່ໄດ້ຮັບອະນຸຍາດ ແລະ ມີການຄວບຄຸມຢ່າງຖືກຕ້ອງພ້ອມກັບການຊຸກຍູ້ໃຫ້ບຸກຄະລາກອນທາງການແພດປະຕິບັດການສັ່ງຈ່າຍຢາ ແລະ ການຈຳໜ່າຍຢາຢ່າງເໝາະສົມ.
