ມືປືນຍິງຝູງຊົນຢູ່ລາສເວກັດ ເສຍຊີວິດຢ່າງໜ້ອຍ 20 ຄົນ
ເຈົ້າໜ້າທີ່ຕຳຫລວດຢູ່ເມືອງລາສເວກັດ ຂອງອາເມລິກາ ສັງຫານຄົນຮ້າຍ 1 ຄົນ ທີ່ໃຊ້ອາວຸດປືນ ເຊິ່ງອາດເປັນປືນກົນອັດຕະໂນມັດ ບຸກເຂົ້າຍິງຝູງຊົນໃນງານເທດສະການດົນຕີແຫ່ງໜຶ່ງ ເຊິ່ງຈັດຂຶ້ນໃກ້ກັບໂຮງແຮມມັນທະເລ ເບ ເຮັດໃຫ້ມີຜູ້ເສຍຊີວິດຢ່າງໜ້ອຍ 20 ຄົນ ແລະ ໄດ້ຮັບບາດເຈັບຮ້ອຍກວ່າຄົນ ເຊິ່ງຖືກນຳສົ່ງໂຮງໝໍແລ້ວ.
ເຫດເກີດເມື່ອເວລາ 22:30 ໂມງ (12:30 ໂມງ ຕາມເວລາຢູ່ລາວ) ໂດຍວີດີໂອທີ່ເຜີຍແຜ່ທາງສື່ອອນລາຍ ສະແດງໃຫ້ເຫັນຝູງຊົນຈຳນວນຫລາຍກວ່າຮ້ອຍຄົນ ພາກັນແລ່ນຫລົບໜີອອກຈາກຈຸດເກີດເຫດ ໂດຍມີກຳລັງຕຳຫລວດພ້ອມອາວຸດຈຳນວນໜຶ່ງເຂົ້າຢຸດເຫດການ ແລະ ໄລ່ລ່າຕິດຕາມມືປືນແລ້ວ.
ຕຳຫລວດລາສເວກັດລະບຸວ່າ: ຄົນຮ້າຍເປັນຊາຍຊາວລາສເວກັສທີ່ກໍ່ເຫດພຽງຄົນດຽວ. ເຖິງຢ່າງໃດກໍດີ ເຈົ້າໜ້າທີ່ພວມຊອກຫາຜູ້ຍິງຄົນໜຶ່ງທີ່ເປັນໝູ່ກັບຄົນຮ້າຍ, ພ້ອມຢືນຢັນວ່າ: ຂ່າວລືວ່າມີການຍິງໃນອີກຫລາຍຈຸດເປັນຂ່າວຂີ້ຕົວະ.
