ຮາມັດກ່າວວ່າ ອິດສະລາແອນສັງຫານຊາວປາແລັສຕິນ 350 ກວ່າຄົນ ໃນ 48 ຊົ່ວໂມງ

ຖະແຫລງການຈາກລັດຖະບານກຸ່ມຮາມັດຢູ່ກາຊາ ໃນວັນທີ 28 ມັງກອນ ລະບຸວ່າ: ກອງທັບອິດສະລາແອນສັງຫານຊາວປາແລັສຕິນຢູ່ເມືອງຂ່ານຢູນິສທາງຕອນໃຕ້ຂອງເຂດກາຊາຢ່າງໜ້ອຍ 350 ຄົນໃນໄລຍະ 48 ຊົ່ວໂມງຜ່ານມາ.

ລາຍງານລະບຸວ່າ: ທີມການແພດບໍ່ສາມາດເຂົ້າເຖິງຮ່າງຜູ້ເສຍຊີວິດຫລາຍສິບຄົນທີ່ກະແຈກກະຈາຍຢູ່ຕາມຖະໜົນ ໂດຍປະຊາຊົນທ້ອງຖິ່ນຕ້ອງຝັງສົບຜູ້ເສຍຊີວິດຢູ່ສະໜາມຂອງໂຮງໝໍນາສເຊີ ເນື່ອງຈາກບໍ່ສາມາດນໍາສົ່ງສົບສູ່ສຸສານຂ່ານຢູນິສ.

ຂະນະດຽວກັນ, ກະຊວງສາທາລະນະສຸກຂອງລັດຖະບານກຸ່ມຮາມັດລະບຸວ່າ: ໂຮງໝໍນາສເຊີມີຂີ້ເຫຍື້ອທາງການແພດເຕັມໄປໝົດ ເພາະການປິດລ້ອມຂອງກອງທັບອິດສະລາແອນ. ຂະນະທີ່ຜູ້ບາດເຈັບໃນພື້ນທີ່ທີ່ຖືກປິດລ້ອມຈໍາເປັນຕ້ອງໄດ້ຮັບການປິ່ນປົວຢ່າງຮີບດ່ວນຢ່າງໜ້ອຍ 7.000 ຄົນ.

ສ່ວນຖະແຫລງການຈາກສະມາຄົມສ້ຽວວົງເດືອນແດງປາແລັສຕິນລະບຸວ່າ: ປະລິມານອົກຊີສໍາລັບຄົນເຈັບຢູ່ໂຮງໝໍອັລອະມາລ ໃນເມືອງຂ່ານຢູນິສກໍາລັງຈະໝົດ ທ່າມກາງການໂຈມຕີຢ່າງຕໍ່ເນື່ອງຈາກກອງກໍາລັງອິດສະລາແອນ ເຊິ່ງສົ່ງຜົນກະທົບຕໍ່ວຽກງານຜ່າຕັດຂອງທີມແພດປະຈໍາໂຮງໝໍ.

ກະຊວງສາທາລະນະສຸກຂອງລັດຖະບານກຸ່ມຮາມັດເປີດເຜີຍວ່າ: ຄວາມຂັດແຍ່ງລະຫວ່າງອິດສະລາແອນ ແລະ ກຸ່ມຮາມັດທີ່ຍືດເຍື້ອຍາວນານຫລາຍເດືອນ ສົ່ງຜົນເຮັດໃຫ້ມີຊາວປາແລັສຕິນຢູ່ກາຊາເສຍຊີວິດ 26.422 ຄົນ ແລະ ບາດເຈັບ 65.087 ຄົນ ນັບແຕ່ວັນທີ 7 ຕຸລາ 2023.