ກໍາປູເຈຍພົບຜູ້ຕິດເຊື້ອ ໄຂ້ຫວັດສັດປີກ H5N1 ຄົນທີ 2 ຂອງປີນີ້

ຖະແຫລງການຈາກກະຊວງສາທາລະນະສຸກຂອງກໍາປູເຈຍ ໃນວັນທີ 28 ມັງກອນ ຢືນຢັນກໍລະນີຜູ້ຊາຍອາຍຸ 69 ປີ ຈາກແຂວງເສຍມະຣາດທາງຕາເວັນຕົກສຽງເໜືອຂອງປະເທດ ຕິດເຊື້ອໄວຣັສໄຂ້ຫວັດສັດປີກ ສາຍພັນ H5N1 ເຊິ່ງຖືເປັນຜູ້ຕິດເຊື້ອຄົນທີ 2 ຂອງປີນີ້.

ລາຍງານລະບຸວ່າ: ໃນວັນທີ 27 ມັງກອນ, ສະຖາບັນສາທາລະນະສຸກແຫ່ງຊາດຢືນຢັນຜົນກວດເຊື້ອໄວຣັສໄຂ້ຫວັດສັດປີກ ສາຍພັນ H5N1 ເປັນບວກໃນຜູ້ຊາຍຄົນດັ່ງກ່າວ ເຊິ່ງປັດຈຸບັນຢູ່ພາຍໃຕ້ການເບິ່ງແຍງຢ່າງເຂັ້ມງວດຈາກທີມແພດ ໂດຍຜູ້ຊາຍຄົນນີ້ລ້ຽງໄກ່ 50-60 ໂຕ ແລະ ໄກ່ດັ່ງກ່າວຕາຍເມື່ອປະມານ 2 ອາທິດກ່ອນ.

ທີມຜູ້ຊ່ຽວຊານກໍາລັງຄົ້ນຫາແຫລ່ງການຕິດເຊື້ອ ແລະ ກວດສອບຜູ້ຕ້ອງສົງໄສ ຫລື ບຸກຄົນທີ່ສໍາຜັດຕິດຕໍ່ນໍາຜູ້ຊາຍຄົນນີ້ ເພື່ອປ້ອງກັນການລະບາດໃນທ້ອງຖິ່ນ ລວມທັງແຈກຢາຍຢາ Tamiflu ຫລື Oseltanivir ໃຫ້ປະຊາຊົນທີ່ສໍາຜັດຕິດຕໍ່ນໍາຜູ້ຊາຍຄົນນີ້ໂດຍກົງ.

ກໍາປູເຈຍກວດພົບຜູ້ຕິດເຊື້ອໄວຣັສໄຂ້ຫວັດສັດປີກ ສາຍພັນ H5N1 ຄົນທໍາຂອງປີນີ້ໃນວັນທີ 25 ມັງກອນ ເຊິ່ງເປັນເດັກນ້ອຍຜູ້ຊາຍອາຍຸ 3 ປີ ຈາກແຂວງໄພຣແວງທາງຕາເວັນອອກສຽງໃຕ້ຂອງປະເທດ.

ສໍາລັບພະຍາດໄຂ້ຫວັດສັດປີກ ສາຍພັນ H5N1 ເປັນໄຂ້ຫວັດທີ່ມັກແພ່ລະບາດລະຫວ່າງສັດປີກທີ່ຕິດເຊື້ອ, ແຕ່ບາງຄັ້ງສາມາດແພ່ລະບາດຈາກສັດປີກສູ່ມະນຸດ ໂດຍອາການຂອງພະຍາດໄດ້ແກ່ ເປັນໄຂ້, ໄອ, ຂີ້ມູກໄຫລ ແລະ ມີອາການທາງເດີນຫາຍໃຈກະທັບຫັນຮຸນແຮງ.

ກະຊວງສາທາລະນະສຸກຂອງກໍາປູເຈຍກ່າວວ່າ: ພະຍາດໄຂ້ຫວັດສັດປີກຍັງເປັນໄພຄຸກຄາມຕໍ່ສຸຂະພາບຂອງປະຊາຊົນ ໂດຍສະເພາະເດັກ. ພ້ອມຮຽກຮ້ອງປະຊາຊົນຍົກເວັ້ນການຮັບປະທານສັດປີກທີ່ຕິດເຊື້ອ ຫລື ຕາຍ ແລະ ປຸງແຕ່ງອາຫານທີ່ມີສັດປີກໃຫ້ສຸກດີ.

ກໍາປູເຈຍກວດພົບຜູ້ຕິດເຊື້ອໄວຣັສໄຂ້ຫວັດສັດປີກ ສາຍພັນ H5N1 ທັງໝົດ 64 ຄົນ ເຊິ່ງເສຍຊີວິດ 41 ຄົນ ນັບແຕ່ປີ 2003 ເປັນຕົ້ນມາ.