ຫລາຍປະເທດຢຸດສົ່ງເງິນຊ່ວຍເຫລືອໜ່ວຍງານປາແລັສຕິນຂອງ UN ຫລັງມີຂ່າວເຈົ້າໜ້າທີ່ອາດກ່ຽວຂ້ອງເຫດໂຈມຕີອິດສະລາແອນ
ອັງກິດ, ເຢຍລະມັນ, ອິຕາລີ, ໂຮນລັງ, ສະວິດ ແລະ ແຟງລັງ ເປັນ 6 ປະເທດຫລ້າສຸດຕໍ່ຈາກອາເມລິກາ, ອົດສະຕຣາລີ ແລະ ການາດາ ທີ່ຕັດສິນໃຈຢຸດໃຫ້ທຶນສະໜັບສະໜູນສໍານັກງານບັນເທົາທຸກ ແລະ ຈັດຫາງານຂອງສະຫະປະຊາຊາດສໍາລັບຜູ້ລີ້ໄພປາແລັສຕິນຢູ່ຕາເວັນອອກໃກ້ (UNRWA) ເຊິ່ງເປັນໜ່ວຍງານຕົ້ນຕໍຂອງອົງການສະຫະປະຊາຊາດທີ່ໃຫ້ການຊ່ວຍເຫລືອປະຊາຊົນຢູ່ເຂດກາຊາ ຫລັງມີຂ່າວວ່າເຈົ້າໜ້າທີ່ບາງຄົນຂອງໜ່ວຍງານມີສ່ວນກ່ຽວຂ້ອງຕໍ່ການໂຈມຕີຂອງກຸ່ມຮາມັດຢູ່ອິດສະລາແອນໃນວັນທີ 7 ຕຸລາ 2023.
ວັນທີ 26 ມັງກອນຜ່ານມາ, ທ່ານ ຟິລິບເປ ລາຊາຣິນີ ກໍາມາທິການ UNRWA ໄດ້ອອກມາປະກາດວ່າ: UNRWA ໄດ້ເປີດການສອບສວນ ແລະ ຍົກເລີກສັນຍາຈ້າງເຈົ້າໜ້າທີ່ບາງຄົນ ເພື່ອຮັກສາຄວາມສາມາດຂອງໜ່ວຍງານໃນການໃຫ້ການຊ່ວຍເຫລືອດ້ານມະນຸດສະທໍາຕໍ່ໄປ.
ເຖິງຢ່າງໃດກໍຕາມ, ທ່ານບໍ່ໄດ້ໃຫ້ລາຍລະອຽດເຖິງຈໍານວນພະນັກງານທີ່ຖືກກ່າວຫາວ່າກ່ຽວຂ້ອງຕໍ່ການໂຈມຕີ ຫລື ລັກສະນະການມີສ່ວນຮ່ວມຕາມທີ່ຖືກກ່າວຫາ, ແຕ່ທ່ານກ່າວວ່າ: ພະນັກງານ UNRWA ຄົນໃດກໍຕາມທີ່ກ່ຽວຂ້ອງຕໍ່ການກໍ່ການຮ້າຍຈະຕ້ອງຖືກດໍາເນີນຄະດີ ລວມທັງການດໍາເນີນຄະດີທາງອາຍາ.
ກະຊວງການຕ່າງປະເທດຂອງເຢຍລະມັນ ເຊິ່ງເປັນຜູ້ບໍລິຈາກລາຍໃຫຍ່ໃຫ້ UNRWA ອອກມາຂານຮັບຂ່າວການເປີດສອບສວນຂອງ UNRWA ໂດຍກ່າວວ່າເຢຍລະມັນມີຄວາມກັງວົນກ່ຽວກັບຂໍ້ກ່າວຫາທີ່ເກີດຂຶ້ນຕໍ່ພະນັກງານຂອງໜ່ວຍງານ.
UNRWA ສ້າງຕັ້ງຂຶ້ນເພື່ອຊ່ວຍເຫລືອຜູ້ລີ້ໄພໃນສົງຄາມປີ 1948 ໃນໄລຍະສ້າງຕັ້ງອິດສະລາແອນ ແລະ ໃຫ້ບໍລິການດ້ານການສຶກສາ, ສຸຂະພາບ ແລະ ການຊ່ວຍເຫລືອຊາວປາແລັສຕິນຢູ່ເຂດກາຊາ. ເວສແບງ, ຈໍແດນ, ຊີຣີ ແລະ ລີບັງ ທາງໜ່ວຍງານໃຫ້ການຊ່ວຍເຫລືອຊາວປາແລັສຕິນປະມານ 2 ໃນ 3 ຂອງປະຊາກອນ 2,3 ລ້ານຄົນຢູ່ເຂດກາຊາ ແລະ ມີບົດບາດສໍາຄັນໃນພາລະກິດດ້ານມະນຸດສະທໍາ ແລະ ບັນເທົາທຸກໃນສົງຄາມທີ່ດໍາເນີນຢູ່ລະຫວ່າງອິດສະລາແອນກັບກຸ່ມຮາມັດ.
ອ້າງອີງ:
- https://www.reuters.com/world/britain-italy-finland-pause-funding-un-refugee-agency-gaza-2024-01-27/
