ລາວ-ກຳປູເຈຍ-ມາເລເຊຍ-ໄທ-ຫວຽດນາມ ຫາລືຂໍ້ລິເລີ່ມລາຍການ ຂັບລົດທ່ອງທ່ຽວດ້ວຍຕົນເອງ

ຈຸດປະສົງການພົບປະແລກປ່ຽນ ຄັ້ງນີ້, ຣາຊະອານາຈັກໄທ ໄດ້ສະເໜີຂໍ້ລິເລີ່ມ ​Self-drive partnership program ຊຶ່ງພາບລວມເຫັນວ່າ ມີຫລາຍກິດຈະກຳ ແລະ ເປັນການຮ່ວມມືໄລ ຍະຍາວ (ໃນເອກະສານບໍໄດ້ລະບຸເລື່ອງກຳນົດເວລາຂອງການ ຮ່ວມມື) ແຕ່ເບິ່ງຈາກຂອບເຂດການຮ່ວມມືແລ້ວ ປະກອບມີ ທັງການອຳນວຍຄວາມສະດວກ, ການຕະຫລາດທ່ອງທ່ຽວ, ການພັດທະນາຊັບພະຍາກອນມະນຸດ, ການພັດທະນາຜະລິດຕະພັນ ການທ່ອງທ່ຽວ ເຊິ່ງເປົ້າໝາຍລວມ ກໍເພື່ອຕອບສະໜອງ ແລະ ສົ່ງເສີມການຮ່ວມມື Self-drive partnership program ຕາມຂໍ້ສະເໜີຂອງ ໄທ ເພື່ອຮ່ວມມືກັບ ສປປ ລາວ ເພື່ອຜັນຂະຫຍາຍຜົນການປຶກສາຫາລື ຮ່ວມກັນ ຂອງວິຊາການທັງຂອງສອງຝ່າຍ ໃນໂອກາດຈັດຕັ້ງກອງປະຊມ ຄະນະກຳມະການທ່ອງທ່ຽວອາຊຽນ ໃນເດືອນກັນຍາ 2023 ທີ່ແຂວງຫລວງພະບາງ ແລະ ຜັນຂະຫຍາຍ ແຜນປະຕິບັດງານການຮ່ວມມື ດ້ານການທ່ອງທ່ຽວ ລາວ-ໄທ ທີ່ໄດ້ກຳນົດໄວ້ໃນ ກອງປະຊຸມຄະນະກຳມະການຮ່ວມ ລາວ ໄທ ຄັ້ງທີ 22 ນັບແຕ່ ເດືອນພະຈິກ 2021 ທີ່ບາງກອກ ປະເທດໄທ.

ພ້ອມກັນນັ້ນ ຍັງໄດ້ລົງເລິກແຜນການຈັດຕັ້ງປະຕິບັດ ແລະ ສົ່ງເສີມການທ່ອງທ່ຽວລຽບຕາມຊາຍແດນຂອງສອງປະເທດ ປະກອບສ່ວນສົ່ງເສີມ ການທ່ອງທ່ຽວໃນຫລາຍຮູບແບບ ຂອງຂໍ້ລິເລີ່ມ Self-drive partnership program ເຊິ່ງປະກອບມີຄື: ການຮ່ວມມືອຳນວຍຄວມສະດວກ ການທ່ອງທ່ຽວ ແລະ ຊາຍແດນ, ການຮ່ວມມືພັດທະນາບຸກຄະລາກອນ, ການຮ່ວມມືສົ່ງເສີມການຕະຫລາດຮ່ວມກັນ, ການຮ່ວມມືພັດທະນາຜະລິດຕະພັນ ແລະ ເຊື່ອມໂຍງການທ່ອງທ່ຽວ.

ທັງຫມົດນີ້ ແມ່ນແນໃສ່ໂຄສະນາສົ່ງເສີມ ການທ່ອງທ່ຽວ ແລະ ການແລກປ່ຽນໄປມາຫາສູ່ກັນ ໃຫ້ຫລາຍຂຶ້ນກວ່າເກົ່າ ໃນຂົງເຂດການຮ່ວມມື ດ້ານການທ່ອງທ່ຽວ ຂອງປະເທດ CLMTV. ສ່ວນການຈັດຕັ້ງປະຕິບັດຕົວຈິງ ຂໍໃຫ້ວິຊາການ ຂອງແຕ່ລະປະເທດ ໄດ້ມີການປຶກສາຫາລື ຮ່ວມກັນ ເພື່ອກຳນົດບັນດາກິດຈະກຳ ເພື່ອເຊື່ອມໂຍງ ການທ່ອງທ່ຽວ ຕາມຂໍ້ລິເລີ່ມ Self-drive partnership program.

ສໍາລັບສະຖິຕິ ນັກທ່ອງທ່ຽວສາກົນ ເຂົ້າມາທ່ອງທ່ຽວ ສປປ ລາວ ໃນ 11 ເດືອນ ປີ 2023 ແມ່ນມີ 3.088.323 ເທື່ອຄົນ, ໃນນັ້ນ ນັກທ່ອງທ່ຽວ ບັນດາປະເທດ CMVT ຄື: ກໍາປູເຈຍ 16.620 ເທື່ອຄົນ, ມາເລເຊຍ 14.900 ເທື່ອຄົນ,​ ໄທ 1,2 ລ້ານເທື່ອຄົນ ແລະ ຫວຽດນາມ 756.133 ເທື່ອຄົນ.