ຫາລືແຜນການຍົກຍ້າຍຈັດສັນ ແລະ ຟື້ນຟູຊີວິການເປັນຢູ່ຂອງປະຊາຊົນ ເພື່ອສ້າງເຂື່ອນໄຟຟ້າເຊລະນອງ III ຢູ່ແຂວງສະຫວັນນະເຂດ

ວັນທີ 24 ມັງກອນ 2024, ພະແນກພະລັງງານ ແລະ ບໍ່ແຮ່ ແຂວງສາລະວັນ ຈັດກອງປະຊຸມປຶກສາຫາລື ກ່ຽວກັບແຜນການຍົກຍ້າຍຈັດສັນ ແລະ ຟື້ນຟູຊີວິການເປັນຢູ່ຂອງປະຊາຊົນ ໃນຂອບເຂດ ຂອງໂຄງການເຂື່ອນໄຟຟ້າເຊລະນອງ III ເຂດເມືອງຕະໂອ້ຍ ແຂວງສາລະວັນ, ໂດຍການເປັນປະທານຂອງ ທ່ານ ທົງໄຊ ບຸນທິສະຫວັດ ຮອງຫົວໜ້າພະແນກພະລັງງານ ແລະ ບໍ່ແຮ່ແຂວງ.
ຈຸດປະສົງ ເພື່ອເຮັດໃຫ້ປະຊາຊົນ ຜູ້ໄດ້ຮັບຜົນກະທົບຈາກໂຄງການ ໄດ້ມີວຽກເຮັດງານທຳ ທັງສາມາດ ຟື້ນຟູເສດຖະກິດ ຂອງຕົນໄດ້ ໂດຍການສົ່ງເສີມກິດຈະກຳການຜະລິດ ແລະ ການສ້າງລາຍຮັບໃຫ້ຄອບຄົວ, ສາມາດກຸ້ມກິນດ້ວຍຕົນເອງໄດ້ ແລະ ຜະລິດເປັນສິນຄ້າປ້ອນຕະຫຼາດໃກ້ຄຽງ ຫຼື ພາຍໃນປະເທດ ໃຫ້ບັນລຸຕາມຄາດໝາຍທີ່ວາງໄວ້ ຢ່າງໜ້ອຍ ພາຍໃນປີທີ 10 ຂອງການດຳເນີນໂຄງການ ຄືໃຫ້ໄດ້ລາຍຮັບຢ່າງຕໍ່າ 200% ຂອງລາຍຮັບ ກ່ອນການຍົກຍ້າຍຈັດສັນ ຕ້ອງມີລາຍຮັບສູງກວ່າເກົ່າ, ເພື່ອຮັບປະກັນດ້ານສະບຽງອາຫານ, ການພັດທະນາທາງດ້ານສຸຂະພາບຂອງຜູ້ຖືກຜົນກະທົບ ໃນໄລຍະຂ້າມຜ່ານໃຫ້ມີການດຳລົງຊີວິດແບບຢືນຍົງ

ທ່ານ ນາງ ແກ້ວພູສອນ ພົນຫາລາດ ຊ່ຽວຊານ ປະຈຳບໍລິສັດ ລາຍງານວ່າ: ໂຄງການເຂື່ອນໄຟຟ້າເຊລະນອງ III ຕັ້ງຢູ່ບ້ານຕະຢົງ ເມືອງນອງ ແຂວງສະຫວັນນະເຂດ ຊຶ່ງອ່າງເກັບນໍ້າໄດ້ກວມເອົາເມືອງຕະໂອ້ຍ ແຂວງສາລະວັນ. ໂຄງການດັ່ງກ່າວ ເປັນເຂື່ອນປະເພດຊີມັງອັດແໜ້ນມີຄວາມສູງ 92,5 ແມັດ, ສັນເຂື່ອນມີຄວາມຍາວເກືອບ470 ແມັດ, ເນື້ອທີ່ອ່າງເກັບນໍ້າ 3.343 ເຮັກຕາ, ມີກໍາລັງຕິດຕັ້ງ 60 ເມກາວັດ ໃຊ້ເວລາໃນການກໍ່ສ້າງປະມານ 5 ປີ, ໂດຍຈະເລີ່ມລົງມືກໍ່ສ້າງໃນປີ 2024ນີ້ ຊຶ່ງຜ່ານການລົງສຶກສາ ເກັບກຳຂໍ້ມູນ ຂອບເຂດ ແລະ ພື້ນທີ່ຂອງເມືອງຕະໂອ້ຍ ແຂວງສາລະວັນ ແມ່ນເປັນເຂດອ່າງເກັບນໍ້າທັງໝົດ ຊຶ່ງມີ ຈໍານວນ 11 ບ້ານ. ໃນນັ້ນ, ຈະໄດ້ຍົກຍ້າຍ 4 ບ້ານຄື: ບ້ານຕຸ້ມລີເກົ່າ, ບ້ານຕຸ້ມລີຂາວ, ບ້ານຕຸ້ມລີທົ່ງ ແລະ ບ້ານສະແໜງ; ຍົກຍ້າຍບາງສ່ວນຂອງ 2 ບ້ານຄື: ບ້ານປະສົງ ແລະ ບ້ານປະງັນດາວ; ສ່ວນອີກ 5 ບ້ານ ຄື: ບ້ານຫຸນ, ບ້ານຕະຫູງລະລາວ, ບ້ານພໍ່ເຊັນ, ບ້ານປະງັນສິງ ແລະ ບ້ານພໍ່ເບີຍ ຈະບໍ່ໄດ້ຍົກຍ້າຍຈັດສັນ ແຕ່ວ່າຈະສູນເສຍເນື້ອທີ່ດິນທຳການຜະລິດ ແລະ ຈະໄດ້ຮັບການທົດແທນຄ່າເສຍຫາຍຈາກການການສູນເສຍຊັບສິນ ແລະ ຜົນລະປູກ ທີ່ເກີດຈາກກິດຈະກຳຂອງໂຄງການ.