ນັກທ່ອງທ່ຽວຕ່າງປະເທດ ຖືກໝີຄວາຍກັດຢູ່ປະເທດໄທໃນຂະນະທີ່ກຳລັງໃຫ້ອາຫານໝີ ຕ້ອງຕັດແຂນໂຕເອງເພື່ອເອົາຊີວິດລອດ

ສຳນັກຂ່າວຕ່າງປະເທດລາຍງານ ວັນທີ 25 ມັງກອນ 2024 ເກີດເຫດນັກທ່ອງທ່ຽວຕ່າງປະເທດ ຖືກໝີຄວາຍກັດແຂນບໍ່ຍອມປ່ອຍ ໃນຂະນະທີ່ກຳລັງໃຫ້ອາຫານໝີ ຈົນເຮັດໃຫ້ອາການບາດເຈັບສາຫັດ ຢູ່ທີີ່ອຳເພີ ຊຽງດາວ ຈັງຫວັດຊຽງໃໝ່ ປະເທດໄທ

ຈາກການກວດສອບພົບເຫັນຜູ້ບາດເຈັບເປັນນັກທ່ອງທ່ຽວຊາຍ ສັນຊາດສະວິດເຊີແລນ ອາຍຸ 32 ປີ ເຊິ່ງເປັນອາສາສະໝັກຂອງມູນນິທິເອກະພາບສັດປ່າ ຕັ້ງຢູ່ພື້ນທີ່ຕຳບົນເມືອງງາຍ ອຳເພີຊຽງດາວ ຈັງຫວັດຊຽງໃໝ່ ຖືກໝີຄວາຍ ທີ່ຢູ່ໃນຄວາມດູແລຂອງມູນນິທິກັດທີ່ແຂນເບື້ອງຂວາຈົນໄດ້ຮັບບາດເຈັບສາຫັດ ໃນຂະນະທີ່ຍື່ນມືເຂົ້າໄປໃນກົງໝີ ເພື່ອໃຫ້ອາຫານ ໂດຍໝີໂຕດັ່ງກ່າວໄດ້ກັດເຂົ້າທີ່ແຂນ ແລະ ບໍ່ຍອມປ່ອຍ.

ຄາດວ່ານັກທ່ອງທ່ຽວຄົນດັ່ງກ່າວເກີດຄວາມຕົກໃຈ ແລະ ຄິດວ່າຈະໄດ້ຮັບອັນຕະລາຍເຖິງຊີວິດ ເຮັດໃຫ້ນັກທ່ອງທ່ຽວຕັດສິນໃຈໃຊ້ມີດທີ່ຕິດໂຕຕັດແຂນໂຕເອງຈົນຂາດເພື່ອເອົາຊີວິດລອດ, ຫລັງຈາກທີ່ເກີດເຫດມີຜູ້ທີ່ຢູ່ໃນເຫດການໄດ້ຊ່ວຍກັນປະຖົມພະຍາບານເບື້ອງຕົ້ນ ແລະ ນຳຕົວສົ່ງປິ່ນປົວຢູ່ໂຮງໝໍຢ່າງເລັ່ງດ່ວນ, ປັດຈຸບັນໄດ້ຖືກນຳສົ່ງໄປປິ່ນປົວຢູ່ໂຮງໝໍເອກະຊົນແຫ່ງໜຶ່ງໃນຕົວເມືອງຊຽງໃໝ່ແລ້ວ ເພື່ອທຳການຜ່າຕັດ.