ຕວກກີໃຫ້ສັດຕະຍາບັນຍອມຮັບສະວີເດັນເຂົ້າເປັນສະມາຊິກ NATO
ລັດຖະສະພາຕວກກີໃຫ້ສັດຕະຍາບັນຮັບຮອງການເຂົ້າເປັນສະມາຊິກ NATO ຂອງສະວີເດັນຮຽບຮ້ອຍແລ້ວໃນວັນທີ 23 ມັງກອນຜ່ານມາ ຫລັງຊັກຊ້າກວ່າ 20 ເດືອນ.
ສະມັດຊາໃຫຍ່ຂອງຕວກກີລົງມະຕິດ້ວຍຄະແນນສຽງ 287 ຕໍ່ 55 ສຽງ ເພື່ອອະນຸມັດຄໍາຂໍຂອງສະວີເດັນທີ່ມີຂຶ້ນແຕ່ກາງປີ 2022 ຫລັງການຮຸກຮານອູແກຣນຂອງຣັດເຊຍ ເຮັດໃຫ້ປະເທດທີ່ເຄີຍມີສະຖານະເປັນກາງຄືສະວີເດັນຕ້ອງສະແຫວງຫາຄວາມໝັ້ນຄົງທາງທະຫານມາເປັນເກາະປ້ອງກັນດິນແດນກວ່າເກົ່າ.
ຕາມຂະບວນການແລ້ວ ປະເທດສະມາຊິກ NATO ທຸກປະເທດຈະຕ້ອງອະນຸມັດການສະໝັກເຂົ້າເປັນສະມາຊິກໃໝ່ຈາກປະເທດໃດໆກໍຕາມທີ່ຕ້ອງການເຂົ້າຮ່ວມເປັນພັນທະມິດ ໂດຍໃນປີ 2022 ສະວີເດັນ ແລະ ຟິນແລນໄດ້ສະໝັກເຂົ້າເປັນສະມາຊິກໃໝ່ພ້ອມກັນ ກ່ອນທ້າຍທີ່ສຸດຟິນແລນຈະໄດ້ເຂົ້າເປັນສະມາຊິກລໍາດັບທີ 31 ຂອງ NATO ຢ່າງເປັນທາງການໃນເດືອນເມສາ 2023.
ແຕ່ສະວີເດັນຕ້ອງຜະເຊີນອຸປະສັກ ເພາະລັດຖະບານຕວກກີເບິ່ງວ່າທາງການສະວີເດັນໂຍະຍານຕໍ່ກຸ່ມຊາວເຄີດພາຍໃນປະເທດຫລາຍເກີນໄປ ທັງຍັງເບິ່ງວ່າກຸ່ມນີ້ເປັນໄພຄຸກຄາມດ້ານຄວາມໝັ້ນຄົງ ແລະ ອາດມີສ່ວນກ່ຽວຂ້ອງຕໍ່ຄວາມພະຍາຍາມໂຄ່ນລົ້ມອໍານາດລັດຖະບານປະທານາທິບໍດີ ເຣເຈບ ໄຕຢິບ ແອຣໂດອັນ ໃນປີ 2016 ນໍາອີກ.
ນອກຈາກນີ້, ເຈົ້າໜ້າທີ່ຕວກກີຍັງກ່າວຫາເຈົ້າໜ້າທີ່ສະວີເດັນວ່າ: ສົມຮູ້ຮ່ວມຄິດໃນການເດີນຂະບວນປະທ້ວງຕ່າງໆ ທີ່ເກີດຂຶ້ນທ່າມກາງກະແສ Islamophobia ຫລື ຄວາມຢ້ານກົວສາສະໜາອິດສະລາມເຊັ່ນ: ການຈູດຄໍາພີອັລກຸຣອານ ເຊິ່ງທາງການຕວກກີຕ້ອງການເຫັນສິ່ງທີ່ເປັນຮູບປະທໍາຫລາຍຂຶ້ນຈາກສະວີເດັນ.
ເຖິງຢ່າງໃດກໍຕາມ, ນັບແຕ່ເລີ່ມສະໝັກສະມາຊິກ ສະວີເດັນພະຍາຍາມດໍາເນີນການຢ່າງເຂັ້ມງວດໃນການບັງຄັບໃຊ້ກົດໝາຍຕໍ່ຕ້ານການກໍ່ການຮ້າຍ ແລະ ຕົກລົງຈະເຮັດວຽກກັບຕວກກີຢ່າງໃກ້ຊິດ ເພື່ອແກ້ໄຂຄວາມກັງວົນຂອງຕວກກີເລື່ອງກ່ຽວກັບຄວາມໝັ້ນຄົງ. ຈົນໃນທີ່ສຸດທ່ານ ແອຣໂດອັນ ຍອມສະເໜີໃຫ້ລັດຖະສະພາຕວກກີໃຫ້ສັດຕະຍາບັນຮັບຮອງການເປັນສະມາຊິກ NATO ຂອງສະວີເດັນໃນເດືອນຕຸລາ 2023, ແຕ່ໃນເວລານັ້ນບໍ່ໄດ້ລະບຸໄລຍະເວລາທີ່ແນ່ນອນ ຈົນຂະບວນການເລື່ອນມາຮອດເດືອນມັງກອນ 2024.
ອ້າງອີງ:
- https://www.reuters.com/business/aerospace-defense/biden-administration-urges-us-congress-approve-f-16-sale-turkey-sources-2024-01-24/
- https://www.reuters.com/world/us-says-it-is-looking-forward-turkey-finalizing-swedens-nato-process-2024-01-24/
- https://www.reuters.com/world/turkey-set-approve-swedens-nato-membership-bid-after-long-delay-2024-01-23/
