ລອດແອນເຈລິສທາມ ຫລຸດຕໍ່າແໜ່ງວຽກໃນຫ້ອງຂ່າວຫລາຍກວ່າ 20%
ໜັງສືພິມລາຍວັນ ລອດແອນເຈລິສທາມ ປະກາດໄລ່ນັກຂ່າວຂອງບໍລິສັດຫລາຍກວ່າ 20% ອອກ ຖືເປັນອີກໜຶ່ງຕົວຢ່າງທີ່ສະແດງໃຫ້ເຫັນວ່າ: ສື່ໃນອາເມລິກາ ແລະ ທົ່ວໂລກ ກໍາລັງປະສົບສະຖານະການຢຸດສະງັກໃນຍຸກອິນເຕີເນັດ.
ວັນທີ 24 ມັງກອນ, ສໍານັກຂ່າວຕ່າງປະເທດລາຍງານວ່າ: ລອດແອນເຈລິສທາມ ເຊິ່ງປະສົບບັນຫາຂາດທຶນຢ່າງຕໍ່ເນື່ອງ ລະບຸວ່າ: ຈະເລີກຈ້າງຕໍາແໜ່ງວຽກໃນຫ້ອງຂ່າວຢ່າງໜ້ອຍ 115 ຕໍາແໜ່ງ ເນື່ອງຈາກບໍລິສັດພະຍາຍາມແກ້ໄຂງົບດູນທີ່ຈົດທະບຽນ.
“ການຕັດສິນໃຈຄັ້ງນີ້ເປັນເລື່ອງທີ່ເຈັບປວດສໍາລັບທຸກຄົນ, ແຕ່ມີຄວາມຈໍາເປັນຕ້ອງດໍາເນີນຢ່າງຮີບດ່ວນ ລວມທັງສ້າງໜັງສືພິມທີ່ຍືນຍົງ ແລະ ກ້າວໜ້າ ສໍາລັບຄົນລຸ້ນຕໍ່ໄປ. ເຈົ້າຂອງລອດແອນເຈລິສທາມ ກ່າວ.
ລອດແອນເຈລິສທາມ ເຊັ່ນດຽວກັບສື່ລຸ້ນເກົ່າ ປະສົບຄວາມລໍາບາກໃນການປັບຕົວໃຫ້ເຂົ້າກັບເສດຖະສາດຂອງໂລກອອນລາຍ ໂດຍສະເພາະການສູນເສຍລາຍໄດ້ຈາກການໂຄສະນາ ແລະ ຈໍານວນສະມາຊິກທີ່ຫລຸດລົງ.
ທັງນີ້, ນັກຂ່າວຫລາຍຄົນຂອງລອດແອນເຈລິສທາມ ຢຸດວຽກປະທ້ວງໃນອາທິດຜ່ານມາ ຫລັງມີລາຍງານລະບຸວ່າ: ຄະນະຜູ້ຈັດການຂອງບໍລິສັດ ກໍາລັງພິຈາລະນາຫລຸດຈໍານວນພະນັກງານລົງຈໍານວນຫລາຍ.
ເຈົ້າຂອງລອດແອນເຈລິສ ກ່າວວ່າ: ການນັດຢຸດວຽກບໍ່ຊ່ວຍຫຍັງ ແລະ ສະແດງຄວາມຜິດຫວັງທີ່ສະມາຄົມຫ້ອງຂ່າວບໍ່ໄດ້ຮ່ວມມືກັບຄະນະຜູ້ຈັດການ ເພື່ອຫາທາງຮັກສາຕໍາແໜ່ງວຽກເອົາໄວ້.
ສ່ວນສະມາຄົມລອດແອນເຈລິສທາມ ເຊິ່ງເປັນຕົວແທນນັກຂ່າວສ່ວນຫລາຍຂອງບໍລິສັດ ກ່າວວ່າ: ການປະກາດໄລ່ພະນັກງານອອກ “ສ້າງຄວາມເສຍຫາຍຢ່າງໜັກ”.
ລອດແອນເຈລິສທາມ ເຄີຍໄລ່ພະນັກງານອອກຫລາຍກວ່າ 70 ຕໍາແໜ່ງ ໃນປີຜ່ານມາ. ອີກທັງການປະກາດຄັ້ງຫລ້າສຸດນີ້ ຍັງເກີດຂຶ້ນພຽງບໍ່ເທົ່າໃດວັນຫລັງທ່ານ ເຄວິນ ເມຣິດາ ບັນນາທິການບໍລິຫານຂອງບໍລິສັດ ເສຍຊີວິດຢ່າງກະທັນຫັນ.
