ລາຄານໍ້າມັນ WTI ເພີ່ມຂຶ້ນເກືອບ 2% ສູງເຖິງ 75 ໂດລາ ຫລັງສະຕັອກນໍ້າມັນດິບຫລຸດລົງ
ວັນທີ 25 ມັງກອນ, ສໍານັກຂ່າວຕ່າງປະເທດລາຍງານວ່າ: ລາຄານໍ້ມັນ WTI ເພີ່ມຂຶ້ນເກືອບ 2% ສູງເຖິງລະດັບ 75 ໂດລາ ພາຍຫລັງອາເມລິກາເປີດເຜີຍສະຕັອກນໍ້າມັນດິບຫລຸດລົງຫລາຍກວ່າການຄາດຄະເນ ເຊິ່ງບົ່ງບອກເຖິງອຸປະສົງຈໍານວນຫລາຍໃນຕະຫລາດ.
ເວລາ 00:07 ໂມງ ຕາມເວລາປະເທດລາວ ລາຄານໍ້າມັນດິບເວສເທັກຊັສ (WTI) ສົ່ງມອບເດືອນມີນາ ບວກ 1,43 ໂດລາ ຫລື 1,92% ສູ່ລະດັບ 75,80 ໂດລາ/ບາເຣລ.
ສໍານັກງານຂໍ້ມູນຂ່າວສານດ້ານພະລັງງານຂອງລັດຖະບານອາເມລິກາ (EIA) ເປີດເຜີຍວ່າ: ສະຕັອກນໍ້າມັນດິບອາເມລິກາຫລຸດລົງ 9,2 ລ້ານບາເຣລໃນອາທິດຜ່ານມາ. ຂະນະທີ່ນັກວິເຄາະຄາດວ່າຫລຸດລົງພຽງ 2,1 ລ້ານບາເຣລ.
ນອກຈາກນີ້, ລາຄານໍ້າມັນໄດ້ປັດໄຈບວກຈາກການອ່ອນຄ່າຂອງໂດລາ ເຊິ່ງຈະເພີ່ມຄວາມດຶງດູດຂອງສັນຍາ ເຮັດໃຫ້ສັນຍານໍ້າມັນມີລາຄາຖືກລົງສໍາລັບຜູ້ຖືຄອງເງິນສະກຸນອື່ນ.
ສ່ວນລີບີເລີ່ມກັບມາຜະລິດນໍ້າມັນຈາກບໍ່ຊາຣາຣາ ຫລັງຈາກມີການຢຸດການຜະລິດເປັນເວລາ 2 ອາທິດ ຈາກການປະທ້ວງຂອງກໍາມະກອນ.
ນັກລົງທຶນຍັງຕິດຕາມສະຖານະການຢູ່ທະເລແດງ ລວມທັງການເຮັດສົງຄາມລະຫວ່າງຣັດເຊຍ ແລະ ອູແກຣນ ເຊິ່ງອາດສົ່ງຜົນກະທົບຕໍ່ອຸປະທານນໍ້າມັນໃນຕະຫລາດ.
