ທາງເພຍ້ອນຝົນໜ້ຳ
ໂດຍ: ທິດກໍ່າ
ເວົ້າເລື່ອງທາງເພໄລຍະລະດູຝົນຜ່ານມາ ມັນບໍ່ສະເພາະແຕ່ຢູ່ນະຄອນຫລວງວຽງຈັນເຮົາ, ຢູ່ຕ່າງແຂວງ ຫລື ເກືອບເວົ້າໄດ້ວ່າໃນທົ່ວປະເທດກໍປະສົບບັນຫານີ້ຄືກັນ. ເທົ່າທີ່ທິດກໍ່າໄດ້ໄປເຫັນເສັ້ນທາງຫລວງ, ເສັ້ນທາງຊອຍຫລາຍແຫ່ງຢູ່ແຖວບໍລິຄໍາໄຊ, ຄໍາມ່ວນ ແລະ ສະຫວັນນະເຂດ ກໍມີຫລາຍເສັ້ນເປັນບວກເປັນຂຸມ ເຊິ່ງຈະຕ້ອງໄດ້ມີການບູລະນະສ້ອມແປງ ແລະ ໃຊ້ງົບຫລາຍພັນຕື້ ຈຶ່ງຈະກັບຄືນມາເປັນເສັ້ນທາງທີ່ໃຊ້ການໄດ້ຢ່າງສະດວກສະບາຍ. ໃນບັນດາເສັ້ນທາງທີ່ໄດ້ກ່າວມານີ້ສ່ວນຫລາຍເປັນທາງລາດຢາງ ຫລື ແລດຢາງທີ່ບໍ່ໄດ້ມາດຕະຖານມີການເປ່ເພ ແລະ ເສຍຫາຍໜັກກວ່າໝູ່. ບັນດາເສັ້ນທາງທີ່ກ່າວມານີ້, ເມື່ອມີຝົນຕົກມາມັນກໍຖືກນ້ຳກັດເຊາະເປັນຂຸມເວີງກວ້າງ ແຕ່ພໍມີແດດກໍເປັນຂຸມເຕັມແຕ່ຂີ້ຝຸ່ນໄຫງ່ກຸ້ມສົມທົບກັບລົດລາງພາຫະນະທີ່ມີນ້ຳໜັກຫລາຍສິບໂຕນແລ່ນໄປມາຢ່າງບໍ່ຂາດໄລຍະ. ນີ້ຄືສາເຫດໜຶ່ງທີ່ເຮັດໃຫ້ທາງເພ ເຊິ່ງພວກເຮົາໄດ້ຜະເຊີນໃນເວລາເດີນທາງ ກໍຄືການນໍາໃຊ້ລົດໃຊ້ຖະໜົນໃນໄລຍະທີ່ບໍ່ທັນມີການສ້ອມແປງ. ຕາມທິດກໍ່າວ່າ, ຈາກສະພາບທີ່ກ່າວມານີ້ຖ້າບໍ່ມີສະຕິ ແລະ ບໍ່ລະມັດລະວັງໃນການໄປມາແດ່ ກໍຈະເຮັດໃຫ້ເຮົາປະສົບອຸປະຕິເຫດ ຫລື ມີອັນກະທົບຕ່າງໆນາໆໃນການທຽວທາງ. ນອກນັ້ນ, ແຫລ່ງຂ່າວທາງອຸຕຸນິຍົມຍັງແຈ້ງເຕືອນຕື່ມວ່າ ຝົນຍັງຈະສືບຕໍ່ຕົກໄປອີກຈົນຮອດເດືອນຕຸລາຈຶ່ງຈະຄ່ອຍເບົາບາງລົງ. ເມື່ອຫາກເປັນຄືດັ່ງວ່າ, ບັນດາເສັ້ນທາງທີ່ມັນເປ່ເພແລ້ວມັນກໍຈະເພຕື່ມ. ສ່ວນວ່າເສັ້ນໃດທີ່ພວມຈະເກີດມີບັນຫາມັນກໍຈະເກີດຂຶ້ນຕາມຄຸນນະພາບ ແລະ ສະພາບແວດລ້ອມຂອງເສັ້ນທາງຢ່າງຫລີກເວັ້ນບໍ່ໄດ້.
ຕາມທິດກໍ່າວ່າ, ສາເຫດທີ່ເຮັດໃຫ້ເສັ້ນທາງເປ່ເພໜັກໃນປີນີ້ມັນກໍເນື່ອງມາຈາກຫລາຍປັດໄຈ ແລະ ຫລາຍສາເຫດ, ແຕ່ອັນໂຕທີ່ໜັກກວ່າໝູ່ແມ່ນຍ້ອນຝົນຕົກຈາກພາຍຸເຫັນວ່າໜັກໜ່ວງຫລາຍ ເຮັດໃຫ້ເກີດນ້ຳຖ້ວມກັດເຊາະບັນດາເສັ້ນທາງຕ່າງໆລາມໄປຮອດຖ້ວມເຮືອນຊານບ້ານຊ່ອງ, ວັດວາອາຮາມ ແລະ ພື້ນຖານການຜະລິດຂອງປະຊາຊົນ. ພາຍຸທີ່ຊ້ຳທ້າຍໝູ່ກໍແມ່ນ “ດອກສຸຣິ” ສ່ວນວ່າໃນຂັ້ນຕໍ່ໄປຈະແມ່ນດອກຫຍັງເພີ່ມຕື່ມພວກເຮົາກໍຍັງບໍ່ທັນຮູ້ ແລະ ໃຫ້ພາກັນມີສະຕິ. ອັນສອງມາ, ເຮົາເຫັນວ່າການກໍ່ສ້າງທາງໃນໄລຍະຜ່ານມາໃນບາງເສັ້ນຍັງບໍ່ທັນໄດ້ມາດຕະຖານເທົ່າທີ່ຄວນ, ເມື່ອສໍາເລັດການກໍ່ສ້າງບໍ່ພໍເທົ່າໃດປີມັນກໍເປ່ເພ ຕົວຢ່າງເສັ້ນທາງເລກທີ 13 ເໜືອ ແລະ ໃຕ້ ມາຮອດດຽວນີ້ແມ່ນສົມຄວນລົງມືກໍ່ສ້າງໃໝ່ແລ້ວ ເພາະມັນມີອາຍຸເກືອບ 20 ປີແລ້ວ. ເວົ້າເຖິງການກໍ່ສ້າງເສັ້ນທາງບາງເສັ້ນໃນຫລາຍປີຜ່ານມາ, ລັດມອບໃຫ້ເອກະຊົນລົງທຶນກ່ອນ 100% ຫລັງຈາກນັ້ນລັດຄ່ອຍຊໍາລະຕາມຫລັງ ຈຶ່ງເປັນສາເຫດໜຶ່ງເຮັດໃຫ້ເສັ້ນທາງມັນຫລຸດມາດຕະຖານ. ນອກນັ້ນ ການກໍ່ສ້າງເສັ້ນທາງບາງເສັ້ນກໍມີຫລາຍບໍລິສັດຕິດຕໍ່ກັນ ຍ້ອນຜູ້ຮັບເໝົາບໍ່ມີເງິນພຽງພໍແຕ່ພັດຢາກເຮັດ ເມື່ອປະມູນໄດ້ແລ້ວພັດໄປຂາຍຕໍ່ມັນກໍເລີຍຕົກຢູ່ໃນເຄືອຂ່າຍຂອງການສໍ້ລາດບັງຫລວງ. ຍິ່ງໄປກວ່ານັ້ນ, ທາງບາງເສັ້ນມີໂຄງການເຮັດໄດ້ງົບໄປແລ້ວກວດກາຫາເສັ້ນທາງບໍ່ເຫັນມັນເລີຍເປັນຜີກະສືດູດເລືອດ ເຊິ່ງບໍ່ທັນມີໃຜເຄີຍເຮັດ.
ເຖິງຢ່າງໃດກໍດີ, ຕາມທິດກໍ່າຄິດ ແລະ ທັງຢືນຢັນວ່າໃນຂັ້ນຕໍ່ໄປທຸກສິ່ງທຸກຢ່າງບໍ່ວ່າແຕ່ເສັ້ນທາງ ມັນກໍຕ້ອງໄດ້ມີການປັບປຸງປ່ຽນແປງ ແລະ ແກ້ໄຂຢ່າງແນ່ນອນ ໂດຍສະເພາະລັດຖະບານຊຸດປັດຈຸບັນເພິ່ນກໍໄດ້ເລັ່ງປັບປຸງທຸກຂົງເຂດທີ່ເຫັນວ່າມັນເປັນຂອດກົດໜ່ວງບາດກ້າວເດີນຂອງຊາດ. ຍ້ອນໃນຫລາຍສິບປີຜ່ານມາ ປະເທດຊາດພວກເຮົາປະສົບບັນຫາໃນຫລາຍດ້ານ ໂດຍສະເພາະແມ່ນບັນຫາການຄຸ້ມຄອງເສດຖະກິດມະຫາພາກ, ການກໍ່ສ້າງເສັ້ນທາງທີ່ເປັນປາຍແຫລມຂອງການຄົມມະນາຄົມຂົນສົ່ງ, ມາຮອດປັດຈຸບັນພວກເຮົາເວົ້າໄດ້ວ່າໄດ້ເຊື່ອມຈອດທຸກເມືອງທຸກແຂວງໃນທົ່ວປະເທດແລ້ວ. ສິ່ງເຫລົ່ານີ້ເປັນເງື່ອນໄຂການທ່ອງທ່ຽວໄປມາມີຄວາມສະດວກສະບາຍຍິ່ງຂຶ້ນ, ທຽບໃສ່ສະໄໝກ່ອນອອກແຕ່ວຽງຈັນໄປນອນປາກຊັນ, ອອກແຕ່ປາກຊັນໄປນອນທ່າແຂກ, ອອກແຕ່ທ່າແຂກໄປນອນສະຫວັນ. ພໍຕົກມາສະໄໝປັດຈຸບັນອອກຈາກວຽງຈັນໄປນອນສະຫວັນ ແລະ ໄປໄດ້ທັງເວັນ ແລະ ຄືນວ່າແຕ່ເຮົາມີຄວາມພ້ອມ.
ສະນັ້ນ, ຈຶ່ງເວົ້າໄດ້ວ່າບັນຫາທາງເພມັນເປັນພຽງຊົ່ວຄາວ ແລະ ເປັນໄລຍະລະດູຝົນ. ອີກບໍ່ນານເກີນລໍພວກເຮົາຈະໄດ້ເຫັນເສັ້ນທາງເລກທີ 13 ແຕ່ເໜືອຮອດໃຕ້ ແລະ ເສັ້ນທາງຍຸດທະສາດສໍາຄັນອື່ນໆໃນທົ່ວປະເທດໄດ້ມີການປັບປຸງປົວແປງ ແລະ ກໍ່ສ້າງຂຶ້ນມາໃໝ່ຢ່າງງົດງາມ ແລະ ທັນສະໄໝ.
