ຍີ່ປຸ່ນກາຍເປັນປະເທດທີ 5 ໃນໂລກທີ່ປະສົບຜົນສຳເລັດໃນການລົງຈອດຍານອະວະກາດເທິງດວງຈັນ
ສຳນັກຂ່າວຕ່າງປະເທດລາຍງານ ວັນທີ 20 ມັງກອນ 2024, ອົງການສຳຫລວດອະວະກາດຍີ່ປຸ່ນ ຫຼື JAXA (Japan Aerospace Exploration Agency) ເປີດເຜີຍວ່າ ຍານອະວະກາດບໍ່ມີຄົນຂັບ “ສະມາດແລນເດີ” (Smart Lander for Investigating Moon) ຫຼື “ສະລິມ” ໄດ້ລົງຈອດເທິງພື້ນດວງຈັນຢ່າງສຳເລັດ.
ຄວາມສຳເລັດດັ່ງກ່າວເຮັດໃຫ້ຍີ່ປຸ່ນກາຍເປັນປະເທດທີ 5 ໃນໂລກທີ່ປະສົບຜົນສຳເລັດໃນການລົງຈອດຍານອະວະກາດເທິງດວງຈັນ ຫຼັງຈາກອາເມຣິກາ, ສະຫະພາບໂຊວຽດ, ຈີນ ແລະ ອິນເດຍ.
ໂດຍຍານສຳຫຼວດຂະໜາດນ້ອຍຂອງຍີ່ປຸ່ນ ໄດ້ບັນທຸກຍານພາຫະນະໂຣເວີຣ໌ ຂະໜາດນ້ອຍ 2 ລຳ ທີ່ຕິດຕັ້ງລະບົບ telemetry ທີ່ສົ່ງຄືນຂໍ້ມູນກັບມາວ່າ ຍານສຳຫຼວດສາມາດດີດຍານໂຣເວີຣ໌ອອກໄດ້ຕາມແຜນການກ່ອນທີ່ຈະລົງຈອດ ນອກຈາກນີ້, ຍານຍັງໄດ້ຕິດຕັ້ງກ້ອງອິນຟາເລດ ເພື່ອສຶກສາທໍລະນີສາດຢູ່ເທິງດວງຈັນ.
ໃນຂະນະດຽວກັນ, ຜູ້ຊ່ຽວຊານຂອງ JAXA ໄດ້ເປີດເຜີຍວ່າ ກໍາລັງເລັງດໍາເນີນຄວາມພະຍາຍາມເພື່ອແກ້ໄຂລະບົບການເຮັດວຽກຂັດຂ້ອງຂອງແຜງພະລັງງານແສງຕາເວັນເທິງຍານນັ້ນອາດເຮັດໃຫ້ແບັດເຕີຣີໝົດລົງ ແລະ ຍານຂາດການຕິດຕໍ່ໄດ້ໃນບໍ່ດົນນີ້, ເຊິ່ງຈະເຮັດໃຫ້ພາລະກິດສຳຫຼວດດວງຈັນຂອງຍີ່ປຸ່ນສິ້ນສຸດລົງໄວກວ່າແຜນການກຳນົດ.
