ການຢາສູບທົ່ວໂລກຫລຸດລົງ ແຕ່ການເສຍຊີວິດ ຍັງຢູ່ໃນລະດັບສູງ
ຂ່າວຕ່າງປະເທດລາຍງານ, WHO ເປີດເຜີຍບົດລາຍງານໂດຍລະບຸວ່າ: ຈຳນວນຜູ້ໃຫຍ່ທີ່ສູບຢາຫລຸດລົງຢ່າງຕໍ່ເນື່ອງໃນໄລຍະບໍ່ເທົ່າໃດປີທີ່ຜ່ານມາ
ບົດລາຍງານລະບຸວ່າ: ເມື່ອພິຈາລະນາທ່າອ່ຽງຂອງການໃຊ້ຢາສູບໃນລະຫວ່າງປີ 2000-2030 ສະແດງໃຫ້ເຫັນວ່າ 150 ປະເທດພົບກັບຄວາມສຳເລັດໃນການຫລຸດການໃຊ້ຢາສູບ. ດັ່ງນັ້ນ, WHO ໄດ້ກ່າວເຕືອນວ່າ: ເຖິງແມ່ນວ່າປະເທດສ່ວນໃຫຍ່ມີອັດຕາການສູບຢາຫລຸດລົງຢ່າງຕໍ່ເນື່ອງ ແຕ່ການເສຍຊີວິດທີ່ກ່ຽວຂ້ອງກັບຢາສູບຄາດວ່າຍັງຄົງຢູ່ໃນລະດັບສູງໃນອີກຫຼາຍປີຂ້າງໜ້າ ຊຶ່ງໃນປັດຈຸບັນການໃຊ້ຢາສູບຍັງສາມາດເຮັດໃຫ້ຜູ້ຄົນເສຍຊີວິດຫລາຍກວ່າ 8 ລ້ານຄົນຕໍ່ປີ ລວມທັງເຮັດໃຫ້ຜູ້ບໍ່ສູບຢາປະມານ 1,3 ລ້ານຄົນເສຍຊີວິດຈາກການສຳຜັດກັບຄວັນຢາສູບມືສອງ.
WHO ລະບຸວ່າ: ປະເທດຕ່າງໆທີ່ໃຊ້ມາດຕະການຄວບຄຸມຢາສູບຢ່າງເຂັ້ມງວດ ສາມາດຄາດຫວັງວ່າອັດຕາການສູບຢາຈະປ່ຽນຈາກເພີ່ມຂຶ້ນເປັນຫລຸດລົງໃນປະມານ 30 ປີ ແລະ ເກີດການປ່ຽນແປງທີ່ກ່ຽວຂ້ອງກັບຈຳນວນຜູ້ເສຍຊີວິດຈາກຢາສູບ. ເຖິງຢ່າງໃດກໍຕາມ, ທ່ານ ຣູດິເກີ ເຄຣສ ຜູ້ອຳນວຍການແຜນການສົ່ງເສີມສຸຂະພາບຂອງ WHO ກ່າວວ່າ: ນີ້ຖືວ່າເປັນຄວາມຄືບໜ້າທີ່ດີໃນການຄວບຄຸມຢາສູບ ໃນໄລຍະບໍ່ເທົ່າໃດປີທີ່ຜ່ານມາ ແຕ່ມັນກໍບໍ່ມີເວລາໃຫ້ສະບາຍໃຈເພາະພວກເຮົາເຫັນວ່າ ທັນທີທີ່ລັດຖະບານຄິດວ່າພວກເຂົາສາມາດເອົາຊະນະກັບຄວັນຢາສູບແລ້ວ ອຸດສາຫະກຳຢາສູບກໍສວຍໂອກາດທີ່ຈະຈັດການນະໂຍບາຍດ້ານສຸຂະພາບ ແລະ ຈຳໜ່າຍຜະລິດຕະພັນທີ່ເປັນອັນຕະລາຍຕໍ່ຊີວິດ.
ທັງນີ້, WHO ຮຽກຮ້ອງໃຫ້ທຸກປະເທດຮັກສາ ແລະ ຮັດກຸມນະໂຍບາຍການຄວບຄຸມຢາສູບ ຕະຫຼອດຈົນຮອດການຕໍ່ສູ້ກັບການແຊກແຊງຈາກອຸດສາຫະກຳຢາສູບ ແລະ ຄວນໃຫ້ຄວາມສົນໃຈເປັນພິເສດໃນການຮວບຮວມຂໍ້ມູນທີ່ດີຂຶ້ນກ່ຽວກັບການໃຊ້ຢາສູບໃນກຸ່ມເຍົາວະຊົນ ໂດຍສະເພາະຢ່າງຍິ່ງຜະລິດຕະພັນໃໝ່ທີ່ເອີ້ນວ່າ: ຢາສູບໄຟຟ້າ.
