ຜູ້ນຳອິດສະລາແອນຄັດຄ້ານແຜນຕັ້ງລັດປາແລັສຕິນ ເດີນໜ້າບຸກກາຊາຕໍ່

ນາຍົກລັດຖະມົນຕີ ເບນຈາມິນ ເນທັນຢາຮູ ຜູ້ນໍາອິດສະລາແອນ ປະກາດຕອບໂຕ້ອາເມລິກາວ່າ: ທ່ານຄັດຄ້ານແນວຄິດຈະຈັດຕັ້ງລັດປາແລັສຕິນເມື່ອຄວາມຂັດແຍ່ງຢູ່ເຂດກາຊາສິ້ນສຸດລົງ ແລະ ອິດສະລາແອນຈະເດີນໜ້າບຸກໂຈມຕີເຂດກາຊາຕໍ່ໄປຈົນກວ່າຈະໄດ້ຮັບໄຊຊະນະໂດຍສົມບູນ, ທໍາລາຍກຸ່ມຮາມັດໃຫ້ສໍາເລັດ ແລະ ນໍາຕົວປະກັນຊາວອິດສະລາແອນທີ່ຍັງຫລົງເຫລືອຢູ່ກັບຄືນມາ. ພ້ອມກ່າວວ່າ: ການສູ້ຮົບອາດຕ້ອງໃຊ້ເວລາອີກຫລາຍເດືອນ.

ກະຊວງສາທາລະນະສຸກປາແລັສຕິນ ເຊິ່ງຄວບຄຸມໂດຍກຸ່ມຮາມັດລະບຸວ່າ: ຊາວປາແລັສຕິນເກືອບ 25.000 ຄົນ ຖືກສັງຫານຢູ່ເຂດກາຊາ ແລະ ປະຊາກອນເຖິງ 85% ຕ້ອງພັດຖິ່ນ. ຂະນະທີ່ອິດສະລາແອນຜະເຊີນແຮງກົດດັນຢ່າງໜັກທີ່ຈະຕ້ອງຄວບຄຸມການໂຈມຕີບໍ່ໃຫ້ລຸກລາມ ແລະ ເລັ່ງເຈລະຈາເພື່ອຫາທາງຢຸດສົງຄາມແບບຍືນຍົງໃຫ້ໄດ້.

ຂະນະດຽວກັນ, ພັນທະມິດຂອງອິດສະລາແອນ ລວມທັງອາເມລິກາ ແລະ ປະເທດປໍລະປັກອີກຫລາຍປະເທດ ໄດ້ຮຽກຮ້ອງໃຫ້ໃຊ້ທາງອອກແບບ Two-State Solution ໂດຍໃຫ້ຈັດຕັ້ງລັດປາແລັສຕິນ ເພື່ອໃຫ້ຢູ່ນໍາລັດອິດສະລາແອນ.

ສໍານັກຂ່າວ BBC ລາຍງານວ່າ: ຫລາຍຝ່າຍຕ່າງຄາດຫວັງໃຫ້ວິກິດໃນປັດຈຸບັນບີບໃຫ້ທັງສອງຝ່າຍຫັນມາເຈລະຈາທາງການທູດ ເພື່ອຫາທາງຢຸດຄວາມຮຸນແຮງໄຮ້ບ່ອນສິ້ນສຸດນີ້. ເຖິງຢ່າງໃດກໍຕາມ, ຜູ້ນໍາອິດສະລາແອນຈະມີຄວາມຄິດເຫັນສວນທາງກັບແນວຄິດດັ່ງກ່າວ.

ໃນການຖະແຫລງຂ່າວວັນທີ 18 ມັງກອນ, ທ່ານ ເນທັນຢາຮູ ກ່າວວ່າ: ອິດສະລາແອນຕ້ອງຄວບຄຸມຄວາມໝັ້ນຄົງເໜືອທຸກດິນແດນທາງຕາເວັນຕົກຂອງແມ່ນໍ້າຈໍແດນ ເຊິ່ງອາດລວມທຸກພື້ນທີ່ທີ່ຈະເປັນຂອງລັດປາແລັສຕິນໃນອະນາຄົດ.