ເຈົ້າໜ້າທີ່ພາສີ ປະຈຳຈຸດປະສານງານແກ້ງສາວ ເມືອງປາກລາຍ ຢຶດລົດບັນທຸກ 12 ລໍ້ ບໍ່ເສຍພາສີ-ອາກອນ

ວັນທີ 14 ມັງກອນ 2024, ເຈົ້າໜ້າທີ່ພາສີພະແນກສືບ-ສອບສວນ ແລະ ປາບປາມການລັກລອບໜີພາສີ (ພສປ) ປະຈຳຈຸດປະສານງານແກ້ງສາວ, ໄດ້ຮັບແຫລ່ງຂ່າວຈາກພົນລະເມືອງດີລາຍງານວ່າມີ: ລົດບັນທຸກ (12 ລໍ້) 1 ຄັນ, ເຄື່ອນໄຫວຢູ່ໃນເຂດບ້ານແກ້ງສາວ ເມືອງປາກລາຍ ແລະ ເມືອງແກ່ນທ້າວ ແຂວງໄຊຍະບູລີ.

ດັ່ງນັ້ນ, ເຈົ້າໜ້າພາສີຈຶ່ງໄດ້ເຄື່ອນໄຫວຕິດຕາມໄດ້ພົບເຫັນລົດເປົ້າໝາຍ ຍັງບໍ່ໄດ້ເສຍພາສີ-ອາກອນ ແລະ ພັນທະອື່ນໆ, ຜ່ານການສອບສວນເບື້ອງຕົ້ນໃຫ້ຮູ້ວ່າ: ລົດຄັນດັ່ງກ່າວໄດ້ຊື້ຂາຍຕໍ່ມືກັນ ສອງ-ສາມເທື່ອແລ້ວໃນລາຄາ 800.000 ບາດ (ສະກຸນເງິນໄທ), ຈຶ່ງໄດ້ເຮັດບົດບັນທຶກ ແລະ ນໍາລົດຄັນດັ່ງກ່າວມອບໃຫ້ພາສີ ປະຈຳແຂວງໄຊຍະບູລີ, ດຳເນີນຂັ້ນຕອນຕາມກົດໝາຍ ແລະ ລະບຽບການຕໍ່ໄປ.