ລັດຖະມົນຕີຄົມມະນາຄົມສິງກະໂປລາອອກ ຫລັງຖືກຟ້ອງຂໍ້ຫາສໍ້ລາດບັງຫລວງ
ພະນັກງານສອບສວນຂອງສິງກະໂປດໍາເນີນຄະດີກັບລັດຖະມົນຕີກະຊວງຄົມມະນາຄົມຂໍ້ຫາສໍ້ລາດບັງຫລວງ ເຊິ່ງເປັນກໍລະນີທີ່ບໍ່ຄ່ອຍເກີດຂຶ້ນມາກ່ອນໃນປະເທດທີ່ມີກົດໝາຍເຂັ້ມງວດແຫ່ງນີ້.
ວັນທີ 18 ມັງກອນ, ສໍານັກຂ່າວຕ່າງປະເທດລາຍງານວ່າ: ສໍານັກງານສອບສວນການປະພຶດແຫ່ງຊາດຂອງສິງກະໂປ (CPIB) ອອກຖະແຫລງການກ່ຽວກັບການດໍາເນີນຄະດີຂໍ້ຫາສໍ້ລາດບັງຫລວງ 27 ຂໍ້ຫາ ນໍາທ່ານ ສຸບຣາມານຽມ ອິສວາຣານ ລັດຖະມົນຕີກະຊວງຄົມມະນາຄົມ.
ຂະນະທີ່ທ່ານ ອິສວາຣານ ຍື່ນໜັງສືຕໍ່ນາຍົກລັດຖະມົນຕີ ລີຊຽນລຸງ ເພື່ອຂໍລາອອກຈາກຕໍາແໜ່ງລັດຖະມົນຕີ ແລະ ສະມາຊິກພັກກິດປະຊາຊົນ (PAP) ແລະ ຍື່ນໜັງສືຕໍ່ປະທານສະພາ ເພື່ອຂໍລາອອກຈາກການເປັນສະມາຊິກສະພາແຫ່ງຊາດນໍາອີກ ຫລັງໄດ້ຮັບແຈ້ງຈາກພະນັກງານສອບສວນວ່າຈະມີການດໍາເນີນຄະດີອາຍາ.
ມາຮອດປັດຈຸບັນ, ລັດຖະບານ ແລະ ພະນັກງານສອບສວນຂອງສິງກະໂປຍັງບໍ່ໃຫ້ລາຍລະອຽດກ່ຽວກັບການດໍາເນີນຄະດີຕໍ່ທ່ານ ອິສວາຣານ ເຊິ່ງຖືກພັກວຽກນັບແຕ່ເດືອນກໍລະກົດປີຜ່ານມາ, ແຕ່ລະບຸພຽງວ່າ: ເປັນການຮຽກຮັບສິນບົນ ແລະ ທ່ານ ອອງ ເບັງ ເສັງ ໜຶ່ງໃນມະຫາເສດຖີນັກທຸລະກິດຜູ້ຮັ່ງມີທີ່ສຸດຂອງສິງກະໂປ ຖືກຈັບ ແລະ ດໍາເນີນຄະດີ.
ທ່ານ ອອງ ເຊິ່ງເປັນຊາວມາເລເຊຍ ແລະ ໄດ້ຮັບສະຖານະອາໄສຖາວອນຢູ່ສິງກະໂປ ມີບົດບາດສໍາຄັນຕໍ່ການຈັດແຂ່ງຂັນລົດສູດໜຶ່ງ ລາຍການຟໍມູລ່າວັນ “ສິງກະໂປ ກຣັງປຣີ” ໃນປີ 2007. ນອກຈາກນີ້ ບໍລິສັດ ສິງກະໂປ ຈີພີ ແລະ ການທ່ອງທ່ຽວສິງກະໂປ ຕໍ່ສັນຍາຮ່ວມກັນໃນການຈັດແຂ່ງຂັນຟໍມູລ່າວັນ ຈົນຮອດປີ 2028.
ການເຄື່ອນໄຫວດັ່ງກ່າວຖືໄດ້ວ່າບໍ່ຄ່ອຍເກີດຂຶ້ນມາກ່ອນສໍາລັບສິງກະໂປ ປະເທດທີ່ມີອັດຕາການສໍ້ລາດບັງຫລວງໜ້ອຍເປັນອັນດັບຕົ້ນຂອງໂລກ.
ທັງນີ້, ຂໍ້ມູນຈາກສໍານັກງານບໍລິຫານບຸກຄະລາກອນລັດຂອງສິງກະໂປລະບຸວ່າ: ປັດຈຸບັນຜູ້ດໍາລົງຕໍາແໜ່ງນາຍົກລັດຖະມົນຕີມີລາຍໄດ້ລວມຄ່າຕອບແທນພິເສດ ປີລະ 2,2 ລ້ານໂດລາສິງກະໂປ, ສ່ວນລາຍໄດ້ລວມຄ່າຕອບແທນພິເສດຂອງລັດຖະມົນຕີ ຢູ່ທີ່ປີລະ 935.000 ໂດລາສິງກະໂປ.
