ມອບ-ຮັບໜ້າທີ່ ຫົວໜ້າສ່ວຍສາອາກອນປະຈຳນະຄອນຫລວງວຽງຈັນ ຜູ້ເກົ່າ ແລະ ຜູ້ໃໝ່

ວັນທີ 16 ມັງກອນ 2024, ພະແນກການເງິນນະຄອນຫລວງວຽງຈັນ ໄດ້ຈັດພິທີມອບ-ຮັບໜ້າທີ່ຫົວໜ້າສ່ວຍສາອາກອນປະຈຳນະຄອນຫລວງວຽງຈັນ ລະຫວ່າງ ທ່ານ ຄຳພັນ ພັນທຸລັກ ຜູ້ເກົ່າ ແລະ ທ່ານ ວິໄນ ທິບດາລາ ຜູ້ໃໝ່.

ທ່ານ ຄຳພັນ ພັນທຸລັກ ຫົວໜ້າສ່ວຍສາອາກອນປະຈຳນະຄອນຫລວງວຽງຈັນ ຜູ້ເກົ່າ ມີຄຳເຫັນວ່າ: ຕະຫລອດໄລຍະຜ່ານມາວຽກງານສ່ວຍສາອາກອນປະຈຳນະຄອນຫລວງວຽງຈັນ ເປັນວຽກງງານໝາກຫົວໃຈສຳຄັນໜຶ່ງ ໃນການຈັດເກັບລາຍຮັບຂອງພະແນກການເງິນນະຄອນຫລວງວຽງຈັນ, ສະນັ້ນ ເຊື່ອໝັ້ນວ່າດ້ວຍຄວາມຮູ້, ຄວາມສາມາດຂອງຜູ້ໃໝ່ ບວກກັບຄວາມເອົາໃຈໃສ່ໃກ້ສິດຕິດແທດຂອງຂັ້ນເທິ່ງ ຈະສາມາດສືບຕໍ່ຈັດຕັ້ງປະຕິບັດແຜນງານຕ່າງໆ ໃຫ້ສາມາດບັນລຸຕາມລະດັບຄາດໝາຍທີ່ວາງໄວ້.

ໂອກາດນີ້, ທ່ານ ສິຣິລາດ ທົງສິນທອງເພັງ ຫົວໜ້າພະແນກການເງິນນະຄອນຫລວງວຽງຈັນ   ມີຄຳເຫັນ ແລະ ຍ້ອງຍໍຊົມເຊີຍຕໍ່ຜົນ ງານຂອງຫົວໜ້າສ່ວຍສາອາກອນປະຈຳນະຄອນຫລວງວຽງຈັນ ຜູ້ເກົ່າ ແລະ ສະເໜີໃຫ້ຜູ້ຮັບຕຳແໜ່ງໃໝ່ ສືບຕໍ່ເພີ່ມຄວາມຮັບຜິດຊອບສູງຂຶ້ນຕື່ມ, ສືບຕໍ່ປະສານສົມທົບກັບທຸກຂັ້ນ ທຸກພາກສ່ວນ ເພື່ອເຮັດໃຫ້ວຽກງານມີຄວາມຄ່ອງຕົວ ໃຫ້ສຳເລັດຕາມແຜນງານທີ່ຂັ້ນເທິງມອບໝາຍໃຫ້ຢ່າງມີປະສິທິພາບ ແລະ ປະສິດທິຜົນ ດີຂຶ້ນເປັນກ້າວໆ.