ຄະນະນໍາກະຊວງປ້ອງກັນປະເທດ ຢ້ຽມຢາມໂອ້ລົມ ອະດີດນາຍ ແລະ ພົນທະຫານ ຢູ່ສູນເສຍອົງຄະພິເສດ 790

ວັນທີ 16 ມັງກອນ 2024, ພົນຕີ ວໍລະສານ ວິລັດດາວົງ ຮອງຫົວໜ້າກົມໃຫຍ່ການເມືອງກອງທັບ ພ້ອມດ້ວຍຄະນະ, ໄດ້ເຄື່ອນໄຫວຢ້ຽມຢາມ ແລະ ພົບປະໂອ້ລົມຕໍ່ອະດີດນາຍ ແລະ ພົນທະຫານຢູ່ສູນເສຍອົງຄະພິເສດ 790 ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ (20 ມັງກອນ 1949- 20 ມັງກອນ 2024).

ໂອກາດນີ້, ພົນຕີ ວໍລະສານ ວິລັດດາວົງ ໄດ້ສະແດງຄວາມດີໃຈທີ່ໄດ້ ຕາງໜ້າຄະນະນໍາກະຊວງປ້ອງກັນປະເທດ ເດີນທາງມາຢ້ຽມຢາມຖາມຂ່າວຕໍ່ພະນັກງານບໍານານອາວຸໂສທີ່ໄດ້ເສຍສະຫລະເຫື່ອແຮງ, ສະຕິປັນຍາປະກອບສ່ວນເຂົ້າໃນການການຕໍ່ສູ້ກູ້ຊາດ ແລະ ສ້າງສາພັດທະນາປະເທດຊາດສະແດງເຖິງຄວາມເປັນຫ່ວງເປັນໃຍຂອງຂັ້ນເທິງ ແລະ ສະແດງຄວາມຮູ້ບຸນຄຸນຢ່າງລົ້ນເຫລືອຕໍ່ຄຸນງາມຄວາມດີທີ່ມີໃຫ້ປະເທດຊາດ. ພ້ອມນັ້ນ, ກໍໄດ້ເນັ້ນຄະນະການຳສູນເອົາໃຈໃສ່ສືບຕໍ່ຮັກສາມູນເຊື້ອນໍ້າໃຈປະຕິວັດນໍາໄປໝູນໃຊ້ເຂົ້າໃນການສຶກສາອົບຮົມລູກຫລານ, ເພີ່ມທະວີຄວາມສາມັກຄີປອງດອງເປັນປຶກແຜ່ນ, ຮັກສາຄຸ້ມຄອງສະຖານທີ່ໂຄງຮ່າງພື້ນຖານທີ່ກະຊວງປ້ອງກັນປະເທດຈັດສັນໃຫ້ໄດ້ນໍາໃຊ້ໄດ້ຍາວນານສ່ວນຄະນະພັກ-ຄະນະບັນຊາກໍເອົາໃຈໃສ່ຊີ້ນໍາ-ນໍາພາສູນຕາມພາລະບົດບາດໜ້າທີ່ຂອງຕົນຢ່າງຕັ້ງໜ້າ.