ພົບເຫັນນໍ້າເປື້ອນໄຫລຊຶມລົງສູ່ແຫລ່ງນໍ້າທໍາມະຊາດ ແລະ ມີສຽງດັງລົບກວນໃນເວລາກາງຄືນ ຈາກໂຮງງານຜະລິດແປ້ງມັນຕົ້ນ ຢູ່ເມືອງໄຊບູລີ

ວັນທີ 13 ມັງກອນ 2024, ຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມ ເມືອງໄຊບູລີ ແຂວງສະຫວັນນະເຂດ ຮ່ວມກັບຄະນະທີມງານຂັ້ນເມືອງ, ຂັ້ນບ້ານ ນຳໂດຍ ທ່ານ ສຸລິວົງ ສີວໍລະວົງ ຮອງເຈົ້າເມືອງໄຊບູລີ ຜູ້ຊີ້ນໍາວຽກງານວັດທະນະທໍາ-ສັງຄົມ ໄດ້ລົງພົບ ທ່ານ ຟານເທ໋ເລືອງ ເຈົ້າຂອງໂຮງງານຜະລິດແປ້ງມັນຕົ້ນ ລາວທີທີແອວ ພັດທະນາຄົບວົງຈອນຈໍາກັດ ຕັ້ງຢູ່ ບ້ານມະນີລາດ ເມືອງໄຊບູລີ ແຂວງສະຫວັນນະເຂດ ເພື່ອຕິດຕາມ ກວດກາ ວຽກງານດ້ານສິ່ງແວດລ້ອມ ຕາມຫາງສຽງສັງຄົມທີ່ເກີດຂື້ນພາຍໃນໂຮງງານ.

ປັດຈຸບັນ ໂຮງງານຜະລິດແປ້ງມັນຕົ້ນລາວທີທີແອວ ພັດທະນາຄົບວົງຈອນ ຈໍາກັດ ໄດ້ສໍາເລັດແລ້ວໃນເດືອນພະຈິກ ປີ 2023, ແຕ່ຍັງບໍ່ທັນສົມບູນ 100% ແລະ ເລີ່ມດໍາເນີນການຜະລິດແບບທົດລອງໃນຄັ້ງວັນທີ 20 ພະຈິກ ປີ 2023 ເປັນຕົ້ນມາ. ດ້ານການຄຸ້ມຄອງສິ່ງແວດລ້ອມ ພາຍໃນ ແລະ ອ້ອມຂ້າງໂຮງງານ ມີສິ່ງທີ່ສາມາດຈັດຕັ້ງປະຕິບັດໄດ້ ແລະ ບໍ່ສາມາດຈັດຕັ້ງປະຕິບັດໄດ້.

ຜ່ານການລົງຕິດຕາມກວດກາຕົວຈິງ ຂອງຄະນະທີມງານກວດກາພາກສະໜາມຂັ້ນເມືອງ ພົບເຫັນບັນຫາຜົນກະທົບທາງດ້ານສິ່ງແວດລ້ອມເປັນຕົ້ນ: ເກີດມີກິ່ນເໜັນຈາກການຜະລິດ, ມີບັນຫານໍ້າເປື້ອນທີ່ໄຫຼຊຶມລົງ ແຫຼ່ງນໍ້າທໍາມະຊາດ, ເກີດມີບັນຫາຝຸ່ນລະອອງໃນເວລາຂົນສົ່ງ ແລະ ເກີດມີສຽງດັງໃນການດຳເນີນງານເວລາກາງຄືນ.

ດັ່ງນັ້ນ, ທາງຄະນະກໍາມະການຕິດຕາມກວດກາຕົວຈິງ ຈຶ່ງໄດ້ ສະເໜີໃຫ້ເຈົ້າຂອງໂຮງງານ ປະຕິບັດຕາມບົດບັນທຶກຂອງການຕິດຕາມກວດກາດ້ານສິ່ງແວດລ້ອມໂຄງການລົງທຶນໃນພາກສະໜາມສໍາລັບໂຮງງານ ຂອງພະແນກ ຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ ສະຫວັນນະເຂດ ຮ່ວມກັບຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມເມືອງໄຊບູລີ ໃນຄັ້ງວັນທີ 10 ມັງກອນ ປີ 2024 ນີ້. ແນະນໍາ ແລະ ເຮັດບົດບັນທຶກເພີ່ມເຕີມເນັ້ນໃຫ້ໂຮງງານ ເຮັດທຸກວິທີທາງເພື່ອບໍ່ໃຫ້ນ້ຳທີ່ບໍ່ທັນບໍາບັດ ໄຫຼຊຶມລົງສູ່ແຫຼ່ງນໍ້າທໍາມະຊາດ,  ຢຸດຕິການປ່ອຍນໍ້າເປື້ອນລົງໃສ່ແຫຼ່ງນໍ້າທໍາມະຊາດ, ໃຫ້ໂຮງງານປົກປິດອ່າງນໍ້າເປື້ອນ ອ່າງທີ 2 ເຊິ່ງເປັນອ່າງທີ່ສົ່ງກິ່ນເໜັນໃຫ້ສໍາເລັດພາຍໃນ 1 ເດືອນ. ສໍາລັບຂໍ້ມູນບາງດ້ານທີ່ຄະນະວິຊາການລົງຕິດຕາມກວດກາແລ້ວບໍ່ພົບເຫັນຕາມຫາງສຽງສັງຄົມ ທີ່ເກີດຂື້ນ ແມ່ນມອບໃຫ້ຄະນະປົກຄອງບ້ານມະນີລາດ ເປັນຜູ້ເກັບກໍາຂໍ້ມູນຕື່ມອີກ ແລະ ກ່ອນຈະເປີດທໍາການຜະລິດຢ່າງເປັນທາງການຕ້ອງໄດ້ກວດກາຄືນທັງໝົດໂດຍອີງຕາມລະບຽບຫຼັກການຂອງໂຮງງານ ແລະ ພາກ ສ່ວນທີ່ກ່ຽວຂ້ອງ.