ເອກົວດໍສາມາດຄວບຄຸມສະຖານທີ່ກັກຂັງໄດ້ອີກເທື່ອໜຶ່ງ ຫລັງຊ່ວຍເຫລືອຕົວປະກັນສໍາເລັດ

ກອງກໍາລັງຄວາມໝັ້ນຄົງຂອງເອກົວດໍ ເຂົ້າຄວບຄຸມຄຸກຫລາຍແຫ່ງທີ່ຕົກຢູ່ໃນມືຂອງສະມາຊິກແກ້ງອາດຊະຍາກໍາໄດ້ອີກເທື່ອໜຶ່ງ ພາຍຫລັງການປ່ອຍຕົວເຈົ້າໜ້າທີ່ຫລາຍກວ່າ 200 ຄົນ ເຊິ່ງຖືກຈັບເປັນຕົວປະກັນ.

ວັນທີ 15 ມັງກອນ, ສໍານັກຂ່າວຕ່າງປະເທດລາຍງານວ່າ: ວິກິດດ້ານຄວາມໝັ້ນຄົງຂອງປະເທດ ເກີດຂຶ້ນໃນອາທິດຜ່ານມາ ເມື່ອລັດຖະບານເອກົວດໍ ແລະ ກຸ່ມອາດຊະຍາກໍາທີ່ມີອິດທິພົນ ປະກາດສົງຄາມເຕັມຮູບແບບ ຫລັງຫົວໜ້າແກ້ງຄ້າຢາເສບຕິດຄົນສໍາຄັນຂອງປະເທດ ຫລົບໜີອອກຈາກຄຸກ.

ໃນໄລຍະເວລາຂອງຄວາມບໍ່ສະຫງົບ, ນັກໂທດຈໍານວນຫລາຍກໍ່ເຫດຈະລາຈົນຢູ່ຄຸກຫລາຍແຫ່ງຂອງເອກົວດໍ ລວມທັງຈັບຜູ້ຄຸມ ແລະ ເຈົ້າໜ້າທີ່ບໍລິຫານເປັນຕົວປະກັນ. ຂະນະທີ່ຄວາມຮຸນແຮງຢູ່ຕາມທ້ອງຖະໜົນ ເຮັດໃຫ້ມີຜູ້ເສຍຊີວິດຢ່າງໜ້ອຍ 19 ຄົນ.

ຮອດວັນທີ 14 ມັງກອນຜ່ານມາ, ກອງທັບເອກົວດໍໄດ້ເຜີຍແພ່ວິດີໂອຂອງກໍາແພງຄຸກທີ່ຖືກລະເບີດ ແລະ ປະກາດ “ການຄວບຄຸມຢ່າງສໍາເລັດ” ຢູ່ຄຸກຂອງເມືອງຄູເອນກາ ທີ່ມີເຈົ້າໜ້າທີ່ 61 ຄົນ ຖືກຈັບເປັນຕົວປະກັນ.

ນອກຈາກນີ້, ທາງການເອກົວດໍຍັງປະກາດຊ່ວຍເຫລືອຜູ້ຄຸມ ແລະ ເຈົ້າໜ້າທີ່ຝ່າຍບໍລິຫານທັງໝົດ 201 ຄົນ ຈາກຄຸກໃນ 7 ແຂວງຂອງປະເທດ. ຂະນະທີ່ປະທານາທິບໍດີ ດານຽວ ໂນໂບອາ ຜູ້ນໍາເອກົວດໍ ກ່າວສະແດງຄວາມຍິນດີຕໍ່ການປ່ອຍຕົວດັ່ງກ່າວ ແລະ ຍ້ອງຍໍການປະຕິບັດໜ້າທີ່ຂອງກອງກໍາລັງຄວາມໝັ້ນຄົງ.

ວິກິດຄັ້ງຫລ້າສຸດນີ້ ມີຕົ້ນເຫດມາຈາກການຫລົບໜີອອກຈາກຄຸກຂອງທ້າວ ໂຮເຊ ອາດໍໂຟມາເຊຍ ຫົວໜ້າແກ້ງຄ້າຢາເສບຕິດ ໃນອາທິດຜ່ານມາ ເຮັດໃຫ້ລັດຖະບານ ກີໂຕ ປະກາດສະຖານະການສຸກເສີນ ແລະ ເຄີຟິວທົ່ວປະເທດເປັນເວລາຢ່າງໜ້ອຍ 60 ວັນ, ແຕ່ໄດ້ເຮັດໃຫ້ສະມາຊິກແກ້ງບໍ່ພໍໃຈ ຈົນນໍາໄປສູ່ການປະກາດ “ສົງຄາມ” ກັບພົນລະເຮືອນ ແລະ ກອງກໍາລັງຄວາມໝັ້ນຄົງຂອງເອກົວດໍ.