ປະທານອົງການກວດກາແຫ່ງລັດ ລົງຕິດຕາມໂຄງການເຂດພັດທະນາເສດຖະກິດໃໝ່ສີທັນດອນ ແຂວງຈຳປາສັກ

ວັນທີ 13 ມັງກອນ 2024, ທ່ານ ຄໍາພັນ ພົມມະທັດ ປະທານອົງການກວດກາແຫ່ງລັດ, ຫົວໜ້າອົງການຕ້ານການສໍ້ລາດບັງຫລວງຂັ້ນສູນກາງ ພ້ອມຄະນະ ໄດ້ລົງເຄື່ອນໄຫວຢ້ຽມຢາມໂຄງການເຂດພັດທະນາເສດຖະກິດໃໝ່ສີທັນດອນ ເຊິ່ງປັດຈຸບັນໂຄງການດັ່ງກ່າວກຳລັງຢູ່ໃນໄລຍະທີ 1 ລວມມີ: ສ້າງໂຮງແຮມແຄນຄູ່ ຫລື ຕຶກອະເນກປະສົງແຄນຄູ່ ລວມທັງກິດຈະກຳການບັນເທີງຄົບວົງຈອນ, ເຂດບ້ານຈັດສັນ, ການກໍ່ສ້າງພື້ນຖານໂຄງລ່າງເສັ້ນທາງ ສະຖານທີ່ຈອດລົດ, ນໍ້າປະປາ, ປັບປຸງສະຖານທີ່ທ່ອງທ່ຽວສວນອຸທິຍານນໍ້າຕົກຕາດຄອນພະເພັງ ແລະ ນ໊ຳຕົກຕາດສົມພະມິດ (ຫລີ່ຜີ), ສາງຄ່ຽນຖ່າຍສິນຄ້າປອດພາສີ, ເຂດລ້ຽງປາສະຫວາຍ ເພື່ອສົ່ງອອກຕ່າງປະເທດ ແລະ ເຂດກ້າເບ້ຍໄມ້ ເພື່ອນຳໄປປູກປະດັບໃນເຂດໂຄງການ.

ສຳລັບຕຶກອະເນກປະສົງແຄນຄູ່ ຫລື ເອີ້ນວ່າ ຕຶກຕິບເຂົ້າ ເປັນອາຄານ 15 ຊັ້ນ, ຊັ້ນໃຕ້ດິນມີ 2 ຊັ້ນ, ມີຄວາມສູງ 60,90 ແມັດ, ເນື້ອທີ່ປຸກສ້າງ 67.132.2 ຕາແມັດ. ໃນນັ້ນ, ຊັ້ນພື້ນໃຕ້ດິນ ມີເນື້ອທີ່ 17.067.05 ຕາແມັດ, ຄາດຄະເນມູນຄ່າການລົງທຶນ 300 ລ້ານໂດລາ ເລີ່ມກໍ່ສ້າງມາແຕ່ຕົ້ນປີ 2023, ຕາມແຜນການກໍ່ສ້າງໂຄງສ້າງໃຫ້ສຳເລັດໃນຕົ້ນເດືອນພຶດສະພາ 2024 ແລະ ຈະເລີ່ມມີການຕົບແຕ່ງໃນເດືອນພຶດສະພາ ແລະ ຈະໃຫ້ສຳເລັດພ້ອມເປີດໃຫ້ບໍລິການໃນທ້າຍປີ 2025.