ປີຜ່ານມາ ແຂວງຈຳປາສັກ ດຳເນີນການສືບສວນ ສອບສວນ ມີບຸກຄົນພົວພັນຄະດີສໍ້ລາດບັງຫລວງ 14 ຄົນ ຜົນເສຍຫາຍທັງໝົດ 67 ຕື້ກວ່າກີບ
ວັນທີ 11-12 ມັງກອນ 2024, ທ່ານ ຄໍາພັນ ພົມມະທັດ ປະທານອົງການກວດກາແຫ່ງລັດ, ຫົວໜ້າອົງການຕ້ານການສໍ້ລາດບັງຫລວງຂັ້ນສູນກາງ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຈໍາປາສັກ ພ້ອມທັງໄດ້ພົບປະໂອ້ລົມພະນັກງານກວດກາ ພາຍໃນແຂວງຈໍາປາສັກ ທີ່ສະໂມສອນຫ້ອງວ່າການປົກຄອງແຂວງ, ໂດຍໄດ້ຊີ້ນໍາໃຫ້ຄະນະພັກ, ຄະນະກວດກາແຕ່ລະຂັ້ນ ຈົ່ງເປັນ ເຈົ້າການຍົກສູງບົດບາດຂອງວຽກງານກວດກາ, ຕ້ອງຮັບປະກັນຄວາມສັກສິດດ້ານລະບຽບກົດໝາຍ ເພື່ອຈໍາກັດຊ່ອງວ່າງທີ່ກໍ່ໃຫ້ເກີດມີການກະທໍາຜິດ, ສ້າງຄວາມສະດຸ້ງໄວ ແລະ ວັດທະນະທໍາໃນການບໍລິການປະຊາຊົນ-ສັງຄົມໃນລະບົບການເມືອງ, ຕ້ອງຮັບປະກັນຄວາມບໍລິສຸດ, ໂປ່ງໃສ ແລະ ມີຄຸນນະພາບ ເພື່ອສະກັດກັ້ນການລະເມີດກົດໝາຍ, ຮັບປະກັນການແກ້ໄຂບັນຫາການກະທໍາຜິດຢ່າງຖືກຕ້ອງ, ຕີຖອຍການສວຍໃຊ້ໜ້າທີ່ຕໍາແໜ່ງໃນແຕ່ລະຂົງເຂດວຽກງານໃຫ້ຫລຸດໜ້ອຍຖອຍລົງ, ຍົກລະດັບຄວາມສາມາດໃນການສືບສວນ-ສອບສວນ, ການຕ້ານການສໍ້ລາດບັງຫລວງ, ເອົາໃຈໃສ່ປັບປຸງແບບແຜນການເຄື່ອນໄຫວໄລຍະຍາວໃນວຽກງານກວດກາຢ່າງມີຈຸດສຸມ, ສ້າງກົນໄກລະອຽດ, ຍົກສູງບົດບາດຂອງວຽກງານກວດກາ ໃຫ້ສັງຄົມໄດ້ຮັບຮູ້, ເຂົ້າໃຈ ແລະ ເຂົ້າຮ່ວມວຽກງານກວດກາຢ່າງກວ້າງຂວາງ.
ໄລຍະ 1 ປີຜ່ານມາແຂວງຈຳປາສັກ ໄດ້ປະຕິບັດວິໄນຕໍ່ສະມາຊິກພັກທີ່ລະເມີດກົດລະບຽບຂອງພັກ 23 ສະຫາຍ; ກວດກາໂຄງການລົງທຶນຂອງລັດທີ່ມີມູນຄ່າຫລາຍກວ່າ 10 ຕື້ກີບ 42 ໂຄງການ; ຕິດ ຕາມ ກວດກາໂຄງການລົງທຶນຂອງລັດ ທີ່ມີມູນຄ່າຕ່ຳກວ່າ 10 ຕື້ກີບ 207 ໂຄງການ; ໄດ້ຕິດຕາມ ກວດກາໂຄງການລົງທຶນຂອງລັດເລີ່ມແຕ່ຫົວທີ 2 ໂຄງການ; ພົບເຫັນການຮັບສິນບົນ, ຍັກຍອກຊັບສິນຂອງລັດ ຫລື ລວມໝູ່ ສ້າງຜົນເສຍຫາຍເບື້ອງຕົ້ນລວມມູນຄ່າ 8 ຕື້ກວ່າກີບ; ໄດ້ດຳເນີນການສືບສວນ-ສອບສວນບຸກຄົນທີ່ມີສ່ວນຮ່ວມກັບຄະດີສໍ້ລາດບັງຫລວງທັງໝົດ 4 ຄະດີ, ມີບຸກຄົນທີ່ພົວພັນທັງໝົດ 14 ຄົນ ພົບເຫັນຜົນເສຍຫາຍທັງໝົດ 67 ຕື້ກວ່າກີບ.
