ແຂວງອັດຕາປື ກວດພົບລາຍຈ່າຍເງິນບໍລິຈາກ ແລະ ເງິນຊົດເຊີຍບໍ່ຖືກຕ້ອງ 84 ຕື້ກວ່າກີບ ແລະ 100.000 ໂດລາ
ທ່ານພົນໂທ ວັນທອງ ກອງມະນີ ເຈົ້າແຂວງອັດຕະປື ລາຍງານ ເນື່ອງໃນໂອກາດທ່ານ ຄໍາພັນ ພົມມະທັດ ປະທານຄະນະກວດກາສູນກາງພັກ ປະທານອົງການກວດກາແຫ່ງລັດ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງອັດຕະປື ວັນທີ 10 ມັງກອນ 2024 ນີ້ວ່າ:
ສະພາບລວມຂອງການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ກອງປະຊຸມຄົບຄະນະບໍລິຫານງານພັກແຂວງກາງສະໄໝ, ການຈັດຕັ້ງປະຕິບັດ 2 ວາລະແຫ່ງຊາດ ໂດຍຍົກໃຫ້ ເຫັນວ່າ ລວມຍອດຜະລິດຕະພັນພາຍໃນ (GDP) ຂອງແຂວງຂະຫຍາຍຕົວ 6,77%, ລວມຍອດຜະລິດຕະພັນພາຍໃນສະເລ່ຍຕໍ່ຫົວຄົນປະມານ 36 ລ້ານກວ່າກີບ ຫຼື 1.855 ໂດລາ; ສາມາດຈັດເກັບລາຍຮັບງົບປະມານພາຍໃນແຂວງບັນລຸໄດ້ 743 ຕື້ກວ່າກີບ; ມອບເຮືອນຢູ່ຖາວອນ 700 ຫຼັງໃຫ້ປະຊາຊົນທີ່ໄດ້ຮັບຜົນກະທົບ ຈາກເຂື່ອນໄຟຟ້າເຊປຽນ-ເຊນໍ້ານ້ອຍ ທີ່ເມືອງສະໜາມໄຊ, ໄດ້ກວດກາການຊົດເຊີຍຜົນກະທົບໃຫ້ປະຊາຊົນຈາກເຂື່ອນໄຟຟ້າເຊປຽນ-ເຊນໍ້ານ້ອຍ ເມືອງສະໜາມໄຊ ພົບເຫັນການໃຊ້ຈ່າຍບ້ວງເງິນບໍລິຈາກ ແລະ ເງິນຊົດເຊີຍທີ່ບໍ່ຖືກຕ້ອງ ຈໍານວນ 84 ຕື້ກວ່າກີບ ແລະ 100.000 ໂດລາ; ກວດກາໂຄງການ ທີ່ມີມູນຄ່າ 10 ຕື້ກີບຂຶ້ນໄປ ແລະ 10 ຕື້ກີບລົງມາ ຂອງແຂວງ ທັງໝົດ 239 ໂຄງການ, ມູນຄ່າ 1.922 ຕື້ກວ່າກີບ, ກວດກາຕົວຈິງມີ 165 ໂຄງການ; ໄດ້ຈັດຕັ້ງປະຕິບັດ 2 ວາລະແຫ່ງຊາດ ໃນການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ໂດຍໄດ້ຈັດຕັ້ງຜັນຂະຫຍາຍ ດໍາລັດວ່າດ້ວຍການປະຢັດຕ້ານການຟຸມເຟືອຍ.
ນອກນີ້, ຍັງໄດ້ຍົກໃຫ້ເຫັນບາງບັນຫາທີ່ຍັງຄົງຄ້າງ ແລະ ທິດທາງແຜນການໃນການນໍາພາ-ຊີ້ນໍາວຽກງານຈຸດສຸມ ໃນປີ 2024 ແລະ ໃນຕອນບ່າຍຂອງວັນດຽວກັນ ທ່ານ ຄໍາພັນ ພົມມະທັດ ໄດ້ພົບປະໂອ້ລົມພະນັກງານກວດກາ ແຂວງ, ກວດກາ 5 ເມືອງ, ປະທານກວດກາຂອງຄະນະພັກຮາກຖານ ແລະ ຜູ້ກວດກາໜ່ວຍພັກອ້ອມຂ້າງແຂວງ, ໂດຍໄດ້ຮັບຟັງການລາຍງານສະພາບການເຄື່ອນໄຫວວຽກງານກວດກາ, ຕິດຕາມ ແກ້ໄຂຜົນການກວດກາ ຈາກ ທ່ານ ຄໍາຫວັນ ຈັນທະໂຄດ ຄະນະປະຈໍາພັກ ປະທານຄະນະກວດກາພັກ-ລັດ ແຂວງ ຊຶ່ງທ່ານໄດ້ໃຫ້ຮູ້ວ່າ: ໄລຍະຜ່ານມາ ໄດ້ຊຸກຍູ້ໃຫ້ພະແນກການ, ອົງການທຽບເທົ່າ, ຂະແໜງກ່ຽວຂ້ອງ ປະຕິບັດການແກ້ໄຂຜົນການກວດກາ ມີຜົນສໍາເລັດຫຼາຍດ້ານ. ພ້ອມນີ້ ຍັງໄດ້ຍົກໃຫ້ເຫັນຂໍ້ສະດວກ, ຂໍ້ຫຍຸ້ງຍາກ ຂອງການເຄື່ອນໄຫວວຽກງານກວດກາ ແລະ ບາງຄໍາສະເໜີຕໍ່ຂັ້ນເທິງ.
