ກະຊວງເຕັກໂນໂລຊີ ແລະ ການສື່ສານ ຕ້ອງປັບປຸງພື້ນຖານໂຄ່ງລ່າງເຕັກນິກ ໃຫ້ມີສະຖຽນລະພາບ, ຄວາມໄວສູງ ແລະ ປອດໄພ

ວັນທີ 11 ມັງກອນ 2024, ໃນເວລາ ໂອ້ລົມໃນກອງປະຊຸມວຽກງານເຕັກໂນໂລຊີ ແລະ ການສື່ສານ (ຕສ) ປະຈໍາປີ 2023, ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ໄດ້ເນັ້ນໃຫ້ກະຊວງເຕັກໂນໂລຊີ ແລະ ການສື່ສານ ຍົກສູງບົດບາດການຄຸ້ມຄອງມະຫາພາກ ແລະ ພັດທະນານຳໃຊ້ພື້ນຖານໂຄງລ່າງຍຸດທະສາດໃຫ້ມີປະສິດທິຜົນ, ເອົາໃຈໃສ່ການແບ່ງຂັ້ນຄຸ້ມຄອງ ວຽກງານເຕັກໂນໂລຊີ ແລະ ການສື່ສານລະຫວ່າງ ສູນກາງ ແລະ ທ້ອງຖິ່ນ ໃຫ້ຊັດເຈນ, ສ້າງ ແລະ ປັບປຸງກົດໝາຍ ແລະ ບັນດານິຕິກໍາ ລຸ່ມກົດໝາຍດ້ານໄປສະນີ, ໂທລະຄົມມະ ນາຄົມ ແລະ ອິນເຕີເນັດ ໃຫ້ຄົບຖ້ວນທັນກັບສະພາບການໃໝ່, ເອົາໃຈໃສ່ສືບຕໍ່ສ້າງ ແລະ ປັບປຸງພື້ນຖານໂຄ່ງລ່າງເຕັກນິກມີສະຖຽນລະພາບ, ຄວາມໄວສູງ ແລະ ປອດໄພ ເພື່ອຮອງຮັບເຕັກໂນໂລຊີ ໃໝ່ ເຊັ່ນ: ຖານຂໍ້ມູນໃຫຍ່ (Bigdata), ກຸ່ມຂໍ້ມູນຜູກພັນ (Block Chain), ລະບົບສັນຍານ 5G.

ພ້ອມນີ້, ໃຫ້ສືບຕໍ່ເລັ່ງພັດທະນາລະບົບເຊື່ອມໂຍງຂໍ້ມູນພາກລັດ ເພື່ອແລກປ່ຽນ ແລະ ລວມສູນຂໍ້ມູນພາກລັດ ໃຫ້ທຸກພາກສ່ວນສາມາດນຳໃຊ້ ເພື່ອພັດທະນາບໍລິການໃຫ້ປະຊາຊົນ, ເລັ່ງປັບປຸງພື້ນ ຖານໂຄງລ່າງທີ່ຈຳເປັນ ໃຫ້ສະຖາບັນເຕັກໂນໂລຊີ ແລະ ການສື່ສານມີຫລັກສູດ ແລະ ມີສິ່ງອໍານວຍຄວາມສະດວກໃຫ້ແກ່ການຮຽນ-ການສອນ ເພື່ອສ້າງວິຊາການດີຈິຕອນ, ສືບຕໍ່ຊຸກຍູ້ບັນດາບໍລິສັດດ້ານໄປສະນີ, ໂທລະຄົມມະນາຄົມ ແລະ ອິນເຕີເນັດ ຍົກລະດັບ ແລະ ຂະຫຍາຍເຄືອຂ່າຍເຕັກນິກ ແລະ ລະບົບການບໍລິການ ທີ່ມີຄວາມສາມາດແຂ່ງຂັນກັນສູງຂຶ້ນ ແລະ ຂະຫຍາຍທຸລະກິດໄປຕ່າງ ປະເທດ ໃນອະນາຄົດ. ສິ່ງສຳຄັນແມ່ນການປະຕິບັດພັນທະ ປະກອບສ່ວນຢ່າງຕັ້ງໜ້າຕໍ່ພາລະກິດ ປົກປັກຮັກສາ ແລະ ສ້າງສາພັດທະນາປະເທດຊາດ.