ເສັ້ນທາງເລກທີ 13 ເໜືອ ເຂດແຂວງວຽງຈັນ-ແຂວງຫລວງພະບາງ ມີຫລາຍຈຸດເປ່ເພ ຜູ້ໃຊ້ລົດໃຊ້ຖະໜົນຕ້ອງມີສະຕິລະມັດລະວັງໃຫ້ສູງຂຶ້ນ

ພັທ ພູວັນນີ ຫລິນວັນນະລາດ, ຫົວໜ້າພະແນກຕໍາຫລວດຈະລາຈອນແຂວງວຽງຈັນ ໃຫ້ສໍາພາດຜ່ານລາຍການຂັບຂີ່ປອດໄພຂອງວິທະຍຸກະຈາຍສຽງແຫ່ງຊາດລາວ ໃນວັນທີ 4 ມັງກອນ 2024 ວ່າ: ສະພາບການສັນຈອນຢູ່ເສັ້ນທາງ 13 ເໜືອ ມີຄວາມຫຍຸ້ງຍາກຫລາຍຈຸດ ໂດຍສະເພາະເຂດເມືອງຫີນເຫີບ, ວັງວຽງ – ກາສີ ແລະ ກາສີ – ສາລາພູຄູນ ແຂວງຫລວງພະບາງ ທີ່ໄດ້ຮັບຜົນກະທົບຈາກລະດູຝົນທີ່ຜ່ານມາ, ບວກກັບພຶດຕິກຳຂອງຜູ້ຂັບຂີ່ຈໍານວນໜຶ່ງບໍ່ປະຕິບັດກົດຈະລາຈອນຢ່າງເຂັ້ມງວດ, ລວມເຖິງການຢຸດພັກລົດຊົ່ວຄາວຂອງລົດບັນທຸກຂະໜາດໃຫຍ່ ເຮັດໃຫ້ການສັນຈອນຜ່ານເສັ້ນທາງນີ້, ພົບຄວາມຫຍຸ້ງຍາກ ແລະ ແອອັດເປັນບາງເວລາ ພາໃຫ້ມີອຸບັດເຫດເກີດຈາກລົດບັນທຸກເປັນປະຈໍາ.

ນອກຈາກເສັ້ນທາງ 13 ເໜືອໄລຍະທີ່ເນັ່ງຜ່ານແລ້ວ, ຢູ່ແຂວງວຽງຈັນຍັງມີເສັ້ນທາງອີກຫລາຍເສັ້ນທີ່ຢູ່ໃນສະພາບເປ່ເພສົມຄວນ ໂດຍສະເພາະ ເສັ້ນທາງເລກທີ 10, ເສັ້ນທາງເຂດພູເກົ້າຫລັກ ເນື່ອງຈາກໃນແຕ່ລະວັນ ມີລົດບັນທຸກສິນຄ້າ ແລະ ບໍລິການຕ່າງໆ ຜ່ານຈາກພາກເໜືອຫາພາກໃຕ້ ແລະ ຈາກພາກໃຕ້ສູ່ພາກເຫນືອ ລວມທັງການຂົນສົ່ງລະຫວ່າງປະເທດ ເປັນຈໍານວນຫລາຍ ເຮັດໃຫ້ມີອຸບັດເຫດຈາກລົດບັນທຸກເກີດຂຶ້ນຢ່າງຕໍ່ເນື່ອງ.