ມາເລເຊຍ ຍົກຍ້າຍປະຊາຊົນອອກຈາກເຂດນ້ຳຖ້ວມ 10.000 ຄົນ ພ້ອມທັງອອກປະກາດເຕືອນໄພຝົນຕົກໜັກ
January 11, 2024 - 4:15 PM
ສຳນັກຂ່າວຕ່າງປະເທດລາຍງານ ວັນທີ 10 ມັງກອນ 2024, ເຈົ້າໜ້າທີ່ ມາເລເຊຍ ເປີດເຜີຍວ່າ: ປັດຈຸບັນ ມີປະຊາຊົນ ເກືອບ 10.000 ຄົນ ຢູ່ມາເລເຊຍ ຕ້ອງຖືກຍົກຍ້າຍ ອອກຈາກເຂດນໍ້າຖ້ວມ, ໃນນັ້ນ ມີລັດ Johor ໄດ້ຮັບຜົນກະທົບຮ້າຍແຮງທີ່ສຸດ, ຕ້ອງຍົກຍ້າຍປະຊາຊົນ ຈຳນວນ 8.180 ຄົນ, ໃນຂະນະທີ່ ລັດ ປະຫັງ (Pahang) ທີ່ຢູ່ໃກ້ຄຽງ ຕ້ອງຍົກຍ້າຍ 1.501 ຄົນ ໄປຍັງສູນ ບັນເທົາທຸກ ນໍ້າຖ້ວມ. ນໍ້າຖ້ວມຄັ້ງນີ້ ສ້າງຄວາມເສຍຫາຍ ໃຫ້ແກ່ຊັບສິນອື່ນໆ ເປັນວົງກວ້າງ. ນອກນີ້ ກົມອຸຕຸນິຍົມວິທະຍາມາເລເຊຍ ຍັງອອກປະກາດເຕືອນໄພ ຝົນຕົກໜັກເນື່ອງຈາກ ຂະນະນີ້ ຍັງຢູ່ໄລຍະລະດູມໍລະສຸມຕາເວັນອອກສ່ຽງເໜືອ ຊຶ່ງປົກກະຕິ ຈະເລີ່ມຕັ້ງແຕ່ ເດືອນຕຸລາ ປີກາຍເຖິງເດືອນມີນາປີນີ້.
