ລົງນາມການສະໜອງອຸປະກອນໄຟຟ້າໃຫ້ໂຄງການໄຟຟ້າແສງຕາເວັນຢູ່ 2 ແຂວງຂອງລາວ
ພິທີລົງນາມການສະໜອງອຸປະກອນໄຟຟ້າ ແລະ ເງິນທຶນ ເພື່ອພັດທະ ນາໂຄງການພະລັງງານໄຟຟ້າແສງຕາເວັນຢູ່ແຂວງອັດຕະປື ແລະ ແຂວງບໍລິຄຳໄຊ ໄດ້ມີຂຶ້ນໃນວັນທີ 29 ກັນຍານີ້ຢູ່ນະຄອນຫລວງວຽງຈັນລະຫວ່າງທ່ານ ຫາລີ ອາຈູຕັງ (Hari Achuthan) ປະທານບໍລິສັດ ຄອນວອດພະລັງງານຈຳກັດ ແລະ ທ່ານ ວາວເຕີ ວັນເວີສ ປະທານບໍລິສັດ ເຈເນໂຣ ອີເລັກຕຼິກ ແລະ ທ່ານ ບີລີ ເບດສ ຕາງໜ້າທະນາຄານ ຄາເທ ຢູໄນເຕັດ ຈາກໃຕ້ຫວັນ, ໂດຍມີພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ.
ໂຄງການດັ່ງກ່າວ, ແມ່ນບໍລິສັດ ເຈເນໂຣ ອີເລັກຕຼີກ ຈະເປັນຜູ້ສະໜອງບັນດາອຸປະກອນໄຟຟ້າຕ່າງໆ ເປັນຕົ້ນ: ເຄື່ອງຄວບຄຸມໄຟຟ້າ, ອຸປະກອນໄຟຟ້າເພື່ອສ້າງສາຍສົ່ງ ແລະ ສະຖານີ, ສ່ວນທະນາຄານ ຄາເທ ຢູ່ໄນເຕັດ ຈະຊ່ວຍໃນດ້ານການສະໜອງທຶນຮອນໃຫ້ກັບໂຄງການ ແລະ ບໍລິສັດ ດີຈີໂຄເລັກ ຈາກສະຫະລັດອາເມລິກາ ຈະເຮັດໜ້າທີ່ໃນການສຶກສາຄວາມເປັນໄປໄດ້ລວມເຖິງການສຶກສາວິໄຈຜົນກະທົບຕໍ່ສິ່ງແວດລ້ອມ-ສັງຄົມ ແລະ ບັນດາການສຶກສາທາງວິຊາການທີ່ກ່ຽວຂ້ອງກັບໂຄງການ.
ໂຄງການພະລັງງານໄຟຟ້າແສງຕາເວັນແມ່ນການລົງທຶນຂອງສະຫະລັດອາເມລິກາ, ມີມູນຄ່າຫລາຍກວ່າ 400 ລ້ານໂດລາສະຫະລັດ, ຈະເລີ່ມລົງມືກໍ່ສ້າງພາຍໃນປີ 2019 ຢູ່ເຂດບ້ານນ້ຳເດື່ອເມືອງປາກກະດິງແຂວງບໍລິຄຳໄຊ ທີ່ມີກໍາລັງຕິດຕັ້ງ 50 MW ແລະ ຢູ່ແຂວງອັດຕະປື 250 MW. ໂຄງການດັ່ງກ່າວ, ຈະຊ່ວຍສະໜອງຄວາມຫລາກຫລາຍໃນດ້ານການຜະລິດພະລັງງານໄຟຟ້າທີ່ສະອາດຂອງລາວ.
