ສະຫະພັນມວຍລາວ ກຽມຈັດການແຂ່ງຂັນຊົກມວຍ ຊີງແຊ້ມສາຍແອວ ກຽດຕິຄຸນ ຈາກການນຳລັດຖະບານ

ສະຫະພັນມວຍລາວແຫ່ງຊາດ ຈະຈັດການແຂ່ງຂັນ ຊົກມວຍລາວລະດັບຊາດ 3 ຮຸ່ນ ຊີງແຊັມສາຍແອວກຽດຕິຄຸນ ຈາກການນຳລັດຖະບານ ເພື່ອເປັນການຄັດເລືອກເອົານັກກິລາມວຍດາວເດັ່ນໜຶ່ງດຽວຂອງ ສປປ ລາວ ໃນແຕ່ລະຮຸ່ນ ກຽມສົ່ງເຂົ້າຮ່ວມແຂ່ງຂັນໃນລະດັບພາກພື້ນ ແລະ ສາກົນ. ທັງນີ້, ແນໃສ່ ສ້າງຂະບວນການຂ່ຳນັບຮັບຕ້ອນ ວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ແລະ ຕ້ອນຮັບປີທ່ອງທ່ຽວລາວ 2024 ໃຫ້ມີຂະບວນການຟົດຟື້ນ.

 ທ່ານ ພຶດສະພາ ພູມມະສັກ ຮອງປະທານສະຫະພັນມວຍລາວ ລາຍງານໃຫ້ຮູ້ວ່າ: ການຈັດງານແຂ່ງຂັນມວຍລາວລະດັບຊາດ ຄັ້ງນີ້ ກໍເພື່ອເປັນການຊອກຫານັກກິລາດາວເດັ່ນໜຶ່ງດຽວຂອງ ສປປ ລາວ ໃນຮຸ່ນນ້ຳໜັກ 51 ກິໂລ, ຮຸ່ນ 57 ກິໂລ ແລະ ຮຸ່ນ 65 ກິໂລ ເພື່ອຄັດເລືອກເອົານັກກິລາທີ່ມີຄວາມສາມາດ ແລະ ເກັ່ງລະດັບຕົ້ນໆຂອງປະເທດ ກຽມສົ່ງເຂົ້າຮ່ວມແຂ່ງຂັນລາຍການຕ່າງໆ ທັງພາຍໃນ ແລະ ຕ່າງປະເທດ ເວົ້າລວມ, ເວົ້າສະເພາະແມ່ນກຽມຄວາມພ້ອມໃຫ້ແກ່ງານມະຫະກຳກິລາຊີເກມ ຄັ້ງທີ 33 ທີ່ປະເທດໄທ ຮັບກຽດເປັນເຈົ້າພາບ ໃນປີ 2025. ສະນັ້ນ, ເພື່ອເປັນການສ້າງໂອກາດ ໃຫ້ກັບນັກກິລາມວຍລາວ ໄດ້ມີເວທີແຂ່ງຂັນຢ່າງຕໍ່ເນື່ອງ, ສະຫະພັນມວຍລາວແຫ່ງຊາດ ຈຶ່ງກຽມຈັດການແຂ່ງຂັນກິລາມວຍລາວ ລາຍການດັ່ງກ່າວຂຶ້ນ ຊຶ່ງເປັນມວຍຮອບ ໂດຍຮອບທີ 1 ແຕ່ລະຮຸ່ນກຳນົດເອົາ 8 ຄູ່ (16 ຄົນ) ຄັດເລືອກໄປເລື້ອຍໆ ຈົນກວ່າຈະໄດ້ນັກມວຍດາວເດັ່ນພຽງໜຶ່ງດຽວ ໂດຍເປີດຮັບສະໝັກຈົນຮອດວັນທີ 12 ມັງກອນ 2024 ແລະ ໃນວັນທີ 13 ມັງກອນ 2024 ຈະມີການຈັບສະຫລາກປະກົບຄູ່ ໃນແຕ່ລະຮຸ່ນນ້ຳໜັກ ກ່ອນຈະມີພິທີເປີດການແຂ່ງຂັນຢ່າງເປັນທາງການໃນວັນທີ 20 ມັງກອນ 2024 ທີ່ດ້ານຫລັງສູນການຄ້າພາກຊັນ ເມືອງສີສັດຕະນາກ ນະຄອນຫລວງວຽງຈັນ. ຫລັງຈາກນັ້ນ ກໍຈະມີການຈັດແຂ່ງຂັນຕໍ່ໄປເປັນແຕ່ລະເດືອນ ໂດຍກຳນົດເອົາສະຖານທີ່ຈັດແຕກຕ່າງກັນໄປ ເຊັ່ນ: ສວນນ້ຳພຸ, ແຄມຂອງ ນະຄອນຫລວງວຽງຈັນ, ເມືອງວັງວຽງ ແຂວງວຽງຈັນ, ນະຄອນຫລວງພະບາງ ແຂວງຫລວງພະບາງ, ນະຄອນປາກເຊ ແຂວງຈຳປາສັກ ແລະ ແຂວງອື່ນໆທີ່ມີເງື່ອນໄຂ. ຢ່າງໃດກໍຕາມ, ນອກຈາກການແຂ່ງຂັນມວຍຮອບແລ້ວ ຍັງມີມວຍປະກອບລາຍການ ຫລື ມວຍສະໝັກຫລິ້ນ ຖ້າຫາກນັກກິລາຄົນໃດສົນໃຈກໍສາມາດສະໝັກເຂົ້າຮ່ວມແຂ່ງຂັນໄດ້.

 ສ່ວນປະເພດເງິນລາງວັນ ຮຸ່ນນ້ຳໜັກ 57-65 ກິໂລ ຊະນະເລີດ ໄດ້ຮັບສາຍແອວກຽດຕິຄຸນ ຂອງການນຳລັດຖະບານ ພ້ອມເງິນລາງວັນ 100 ລ້ານກີບ ແລະ ຮອງຊະນະເລີດ ໄດ້ຮັບເງິນລາງວັນ 50 ລ້ານກີບ. ສ່ວນຮຸ່ນນ້ຳໜັກ 51 ກິໂລ ໄດ້ຮັບສາຍແອວກຽດຕິຄຸນ ການນຳລັດຖະບານ ພ້ອມເງິນລາງວັນ 60 ລ້ານກີບ ແລະ ຮອງຊະນະເລີດ ໄດ້ຮັບເງິນລາງວັນ 30 ລ້ານກີບ.

 ທ່ານຮອງປະທານສະຫະພັນມວຍລາວແຫ່ງຊາດ ໄດ້ກ່າວຕື່ມອີກວ່າ: ການຈັດແຂ່ງຂັມມວຍລາວລະດັບຊາດ ຄັ້ງນີ້, ນອກຈາກເປັນການຄັດເລືອກ ເອົານັກກິລາມວຍລາວເບີໜຶ່ງ ຂອງປະເທດໃນແຕ່ລະຮຸ່ນແລ້ວ ຍັງເປັນການສ້າງຂະບວນການຂ່ຳນັບຮັບຕ້ອນ ແລະ ສະເຫລີມສະຫລອງ ວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ (20 ມັງກອນ 1949-20 ມັງກອນ 2024) ແລະ ສະເຫລີມສະຫລອງການເປີດປີທ່ອງທ່ຽວລາວ 2024 ໃຫ້ມີບັນຍາກາດຟົດຟື້ນ ແລະ ເບີກບານມ່ວນຊື່ນ. ສະນັ້ນໃນໂອກາດນີ້ຂໍເຊີນຊວນບັນດາພໍ່ແມ່ປະຊາຊົນ ຊາວນະຄອນຫລວງວຽງຈັນ ຕະຫລອດຮອດແຟນມວຍລາວພັນແທ້ ທັງພາຍໃນ ແລະ ຕ່າງປະເທດ ເຂົ້າຮ່ວມຊົມ ຮ່ວມເຊຍກັນໃຫ້ຫລາຍໆ ເພື່ອເປັນກຳລັງໃຈໃຫ້ກັບນັກກິລາ ແລະ ຖ້າຫາກທ່ານໃດບໍ່ສາມາດມາຊົມດ້ວຍຕົນເອງ ຢູ່ສະຖານທີ່ຈັດການແຂ່ງຂັນກໍສາມາດຊົມຜ່ານທາງອອນລາຍ ເພຈເຟດບຸກ ສະຫະພັນມວຍລາວແຫ່ງຊາດ MuayLao National Federationມວຍລາວ.