ປີ 2024 ຂໍໃຫ້ເປັນປີແຫ່ງຄວາມສົມຫວັງ ສ້າງຮັ່ງຄູນມີແດ່ທຸກໆຄົນພາຍໃນຊາດ
ໂດຍ: ທິດກໍ່າ
ຄືດັ່ງທຸກຄົນຮູ້ນໍາກັນແລ້ວວ່າ, ປີ 2023 ຜ່ານມາ ຖືວ່າເປັນປີໜຶ່ງທີ່ປະເທດຊາດບ້ານເມືອງຂອງພວກເຮົາຕົກຢູ່ໃນຍຸກເຂົ້າຍາກໝາກແພງ, ບັນຫາເສດຖະກິດ-ການເງິນຂອງປະເທດຕົກເຂົ້າຂັ້ນວິກິດຢ່າງຮ້າຍແຮງ ແລະ ໜັກໜ່ວງໃນປະຫວັດສາດຍຸກໜຶ່ງຂອງປະເທດ, ບັນຫາເງິນກີບອ່ອນຄ່າ, ລາຄາສິນຄ້າແພງ, ຄ່າແຮງຕໍ່າກະທົບໄປເຖິງຊີວິດການເປັນຢູ່ຂອງພະນັກງານ, ທະຫານ, ຕໍາຫລວດ ແລະ ປະຊາຊົນບັນດາເຜົ່າ ໂດຍສະເພາະຜູ້ທີ່ມີລາຍຮັບຕໍ່າ ເຮືອນເຊົ່າເຂົ້າຊື້ ຫາເຊົ້າກິນຄໍ່າ.
ກ້າວເຂົ້າປີ 2024 ມີຫລາຍກົມກອງທ້ອງຖິ່ນໄດ້ສ້າງຄວາມຫວັງຕັ້ງເປົ້າພັດທະນາເສດຖະກິດ-ສັງຄົມໃນທ້ອງຖິ່ນຂອງຕົນໃຫ້ບັນລຸຕາມແຜນທີ່ຄາດກະເອົາໄວ້ ເຊິ່ງໜຶ່ງໃນບັນດາເຂດແຂວງໃນທົ່ວປະເທດ ກໍຄືນະຄອນຫລວງວຽງຈັນ ໄດ້ຄາດະເຮັດໃຫ້ເສດຖະກິດຂະຫຍາຍຕົວ 5,5% ຂຶ້ນໄປ, ຄາດຄະເນມູນຄ່າເພີ່ມລວມຍອດຜະລິດຕະພັນໃຫ້ໄດ້ 85.799 ຕື້ກີບ, ສະເລ່ຍຕໍ່ຫົວຄົນໃຫ້ໄດ້ 81,7 ລ້ານກີບ. ສ່ວນວ່າເຂດແຂວງອື່ນໆໃນທົ່ວປະເທດກໍມີຄວາມຫວັງຕັ້ງເປົ້າຈະເຮັດໃຫ້ເສດຖະກິດພາຍໃນເຂດແຂວງຂອງຕົນຂະຫຍາຍຕົວລື່ນປີ 2023 ຜ່ານມາ.
ຈາກສະພາບທີ່ກ່າວມານີ້ ມັນກໍສືບເນື່ອງມາຈາກຫລາຍປັດໄຈ ແລະ ຫລາຍສາເຫດ ທັງພາຍໃນ ແລະ ພາຍນອກ ເປັນຕົ້ນປັດໄຈຈາກພາຍນອກກໍແມ່ນສະພາບເສດຖະກິດຂອງໂລກມີການປ່ຽນແປງຜັນຜວນ, ຄວາມຕ້ອງການຊົມໃຊ້ຂອງປະຊາຄົມໂລກນັບມື້ຫລາຍແຕ່ປັດໄຈການຜະລິດ ແລະ ການສະໜອງນັບມື້ໜ້ອຍ ບັນຫາຄວາມຂັດແຍ່ງຜົນປະໂຫຍດລະຫວ່າງມະຫາອໍານາດຈົນກໍ່ໃຫ້ເກີດສົງຄາມພາກພື້ນຝ່າຍຕາເວັນຕົກກັບຝ່າຍຕາເວັນອອກ.
ສ່ວນປັດໄຈພາຍໃນກໍຍິ່ງມີຜົນພວງມາກມາຍກ່າຍກອງເຊັ່ນ: ປະເທດເຮົາຍັງເປັນປະເທດທີ່ບໍລິໂພກຫລາຍກວ່າການຜະລິດ, ການນໍາເຂົ້າຫລາຍກວ່າການສົ່ງອອກ, ປັດໄຈການຜະລິດບໍ່ທັນເຂັ້ມແຂງ, ບໍ່ສາມາດເພິ່ງຕົນເອງ, ກຸ້ມຕົນເອງທາງດ້ານເສດຖະກິດ, ບັນຫາການຄຸ້ມຄອງລັດ-ຄຸ້ມຄອງສັງຄົມດ້ວຍມາດຕະການທາງກົດໝາຍຍັງເປັນໄປແບບລ່າມໂສ້, ບໍ່ເຂັ້ມແຂງເດັດຂາດ. ຍັງມີກຸ່ມກ້ອນພັກພວກ ຊໍ້າບໍ່ໜໍາ ເກີດມີການສໍ້ລາດບັງຫລວງໃນຖັນແຖວພະນັກງານລັດຢ່າງແຜ່ລາມໜັກໜ່ວງຈົນເຮັດໃຫ້ປະເທດຊາດຕ້ອງຕົກຢູ່ໃນຊາຕາກໍາລໍາບາກກາຍເປັນບັນຫາວິກິດອັນໃຫຍ່ຫລວງມາກົດໜ່ວງ ແລະ ທໍາລາຍບາດກ້າວເດີນຂອງຊາດ.
ຢ່າງໃດກໍດີ, ດ້ວຍຄວາມຮັບຜິດຊອບສູງຕໍ່ການນໍາພາ, ຕໍ່ຊາດ, ຕໍ່ປະຊາຊົນ ແລະ ຕໍ່ພາລະກໍາປະຫວັດສາດຂອງຊາດ, ພັກ ແລະ ລັດຖະບານເຮົາກໍບໍ່ໄດ້ນິ້ງນອນໃຈບຸກທະລຸຜ່ານຜ່ານໍາພາສ້າງສາພັດທະນາປະເທດຊາດໃຫ້ເດີນໜ້າໄປຢ່າງບໍ່ຢຸດຢັ້ງ ເຊິ່ງໃນປີ 2023 ຜ່ານມາ, ພວກເຮົາກໍສາມາດເຫັນພາບພົດອັນພົ້ນເດັ່ນລວມຍອດຫລາຍປະການເຊັ່ນ: ການສ້າງສາພັດທະນາພື້ນຖານໂຄງລ່າງ, ຖະໜົນຫົນທາງ, ສໍານັກງານອົງການ, ໂຮງຈັກໂຮງງານ, ເຂດເສດຖະກິດພິເສດ, ເຂດເສດຖະກິດສະເພາະ, ການສົ່ງເສີມການລົງທຶນພາຍໃນ ແລະ ຕ່າງປະເທດ, ການທ່ອງທ່ຽວ, ການຜະລິດ ແລະ ອື່ນໆ.
ພິເສດໜຶ່ງປີຜ່ານມາ ເຖິງວ່າປະເທດຊາດບ້ານເມືອງຂອງພວກເຮົາປະສົບບັນຫາວິກິດ, ແຕ່ເມື່ອເບິ່ງສະພາບໂດຍລວມແລ້ວ ຖືໄດ້ວ່າປະເທດຊາດຂອງພວກເຮົາຍັງມີຄວາມສະຫງົບໝັ້ນຄົງ, ການເມືອງມີສະຖຽນລະພາບ, ເສດຖະກິດຍັງຂະຫຍາຍຕົວຕໍ່ເນື່ອງ, ສັງຄົມນັບມື້ມີຄວາມຈະເລີນຮຸ່ງເຮືອງ ແລະ ພັດທະນາໄປຕາມຍຸກສະໄໝ. ນີ້ຄືໝາກຜົນອັນລວມຍອດໃນພາລະກິດສ້າງສາພັດທະນາປະເທດຊາດ ພາຍໃຕ້ການນໍາພາຂອງພັກ ແລະ ລັດຖະບານໃນເງື່ອນໄຂທີ່ປະເທດຊາດພວມຖືກຜົນກະທົບຈາກປັດໄຈພາຍໃນ ແລະ ພາຍນອກຫລາຍປະການ.
ເຖິງຢ່າງໃດກໍດີ, ໃນປີ 2024 ແມ່ນເປັນປີທ່ອງທ່ຽວລາວ ຂໍໃຫ້ເປັນປີເງິນປີຄໍາ, ສິ່ງຫຍໍ້ທໍ້ຕ່າງໆທີ່ເກີດຈາກແນວຄິດ ແລະ ການກະທໍາທີ່ຜິດເຂວກັບແນວທາງຂອງພັກ, ກັບກົດໝາຍຂອງລັດຈົ່ງມະຫັບດັບຫາຍໄປໃນປີເກົ່າ 2023, ປີໃໝ່ 2024 ຂໍໃຫ້ສົມຄວາມມຸ່ງມາດປາດຖະໜາ ແລະ ບຸກທະລຸຕາມເປົ້າໝາຍທີ່ໄດ້ຄາດຫວັງເອົາໄວ້.
