ຫັນລະບົບເສດຖະກິດຈາກການເພິ່ງພາ ເອື່ອຍອີງ ກ້າວໄປສູ່ເສດຖະກິດເອກະລາດ ເປັນເຈົ້າຕົນເອງ 

ໂດຍ: ຜາຕຸງ

ນັບແຕ່ນີ້ໄປ ສປປ ລາວ ຈະໄດ້ເລັ່ງລັດການວາງນະໂຍບາຍຫັນປະເທດເຮົາ ລະບົບເສດຖະກິດຂອງຊາດເຮົາ ຈາກລະບອບເສດຖະກິດທີ່ເຕັມໄປດ້ວຍການເພິ່ງພາ ເອື່ອຍອີງ ໃຫ້ກ້າວໄປສູ່ ລະບົບ ແລະ ລະບອບເສດຖະກິດເອກະລາດ ເປັນເຈົ້າຕົນເອງ ຫຼື ອາດຈະໃຊ້ຕົວອັກສອນຫຍໍ້ ສອຈ ໂດຍທີ່ແນວຄິດແລະທັດສະນະຕໍ່ວຽກງານເສດຖະກິດເອກະລາດ ເປັນເຈົ້າຕົນເອງຢູ່ປະເທດເຮົາ ໄດ້ສະເໜີໃຫ້ບັນດານັກເສດຖະສາດ ນັກຄົ້ນຄວ້າເສດຖະກິດມະຫາພາກ ນັກການເງິນ ນັກທະນາຄານ ສະຖາບັນ ມະຫາວິ ທະຍາໄລ ສູນຄົ້ນຄວ້າວິໃຈຕ່າງໆ ໄດ້ນຳໄປສືບຕໍ່ຄົ້ນຄ້ວາວິໃຈອອກມາຢ່າງມີພື້ນຖານຕາມຫຼັກວິທະ ຍາສາດທີ່ແທດເໝາະກັບສະພາບຄວາມເປັນຈິງຂອງປະເທດເຮົາ.

ທ່ານທອງລຸນ ສີສຸລິດ  ປະທານປະເທດໄດ້ໃຫ້ທິດຊີ້ນຳໃນເວລາ ໂອ້ລົມກອງປະຊຸມການເງິນທົ່ວປະເທດປະຈຳປີ2023 ໃນທ້າຍເດືອນທັນວາຜ່ານມາ ກ່ຽວກັບ ການສ້າງເສດຖະ ກິດເອກະລາດເປັນເຈົ້າຕົນເອງວ່າ:  ເສດຖະກິດເອກະລາດ ເປັນເຈົ້າຕົນເອງ ຫຼື ສອຈ ໝາຍເຖິງເສດຖະກິດຂອງປະເທດໜຶ່ງທີ່ມີຄວາມພະຍາຍາມອອກຈາກລະບົບ ລະບອບເສດຖະກິດທີ່ເພິ່ງພາ ແລະ ເອື່ອຍອີງໃຫ້ກາຍເປັນເຈົ້າຕົນເອງຢ່າງມີບາດກ້າວເດີນທີ່ໜັກແໜ້ນ, ຖ້າຢາກເຮັດໄດ້ແນວນັ້ນ ປະເທດເອກະລາດໜຶ່ງໂດຍສະເພາະປະເທດລາວເຮົາຕ້ອງໄດ້ສ້າງຄວາມເປັນເຈົ້າຂອງຄວາມຮັບຮູ້ໃນສິ່ງທີ່ເຮົາມີ ສິ່ງທີ່ເຮົາເຮັດໄດ້ ອີງໃສ່ທ່າແຮງບົ່ມຊ້ອນຂອງປະເທດ ຮູ້ນຳໃຊ້ຊັບພະຍາກອນທຳມະຊາດທີ່ເຮົາມີຢ່າງກຸ້ມຄ່າ ແລະຮູ້ວາງແຜນໃນການຂຸດຄົ້ນຊັບພະຍາກອນຂອງຊາດໃຫ້ຄົນລາວເປັນເຈົ້າຫຼາຍຂຶ້ນ ໄດ້ເງິນມາຕ້ອງຮູ້ປະຢັດຮູ້ອົດອອມຮູ້ໃຊ້ຈ່າຍຢ່າງກຸ້ມຄ່າ ຮູ້ຕໍ່ຍອດແລະສ້າງມູນຄ່າເພີ່ມອອກມາເລື້ອຍໆ.

ແຕ່ວຽກງານ ສອຈ ນີ້  ບໍ່ໄດ້ໝາຍຄວາມວ່າ ອັນໃດກໍເຮັດເອງ ອັນໃດກໍຕ້ອງໄດ້ໃຫ້ມີເປັນຂອງໂຕເອງ ໃຜຜະລິດຫຍັງຂຶ້ນ ເຮົາກໍ່ຕ້ອງຜະລິດໃຫ້ມີຄືເຂົາທັງໝົດ ຈະໃຫ້ມີຄຸນນະພາບ ຫຼືຈະໃຫ້ກາຍເປັນສິນຄ້າຫຼືບໍແມ່ນບໍ່ກ່ຽວ,  ຖ້າຄິດແນວນັ້ນແມ່ນຜິດ, ຕ້ອງຮູ້ເຂົາຮູ້ເຮົາດີ ແລະ ເລິກເຊິ່ງ ຕ້ອງຮູ້ຕະຫຼາດພາຍໃນ ແລະ ຕ້ອງຮູ້ການແບ່ງປັນຈາກຕະຫຼາດສາກົນ ຕ້ອງຮູ້ຈັກເຂົ້າເຖິງຕະຫຼາດແລະເຂົ້າເຖິງ ເຕັກໂນໂລຊີໃໝ່ທີ່ທັນສະໄໝຈາກໂລກ ແລະ ນຳໃຊ້ສິ່ງທີ່ເຂົາມີແຕ່ເຮົາບໍ່ມີໃຫ້ໄດ້ຢ່າງເໝາະສົມ ແລະມີການເລືອກເຟັ້ນ ຕ້ອງເດັດດ່ຽວເອົາເສດຖະກິດເຮົາເຂົ້າສູ່ການເປັນໂລກາພິວັດ ເອົາສິນຄ້າພາຍໃນອອກສູ່ໂລກ ໃຊ້ຊັບພະຍາກອນຂອງຊາດໃຫ້ອອກມາເປັນສິນຄ້າເພື່ອໃຫ້ອອກສູ່ຕະຫຼາດໂລກ ແລະ ເປັນເຈົ້ານຳເອົາຈາກໂລກພາຍນອກມາໃຊ້ພາຍໃນຢ່າງມີການຄິດໄລ່ໄຕ່ຕອງ ເອົາສິ່ງທີ່ເຮົາມີຢູ່ນີ້ກະທົບໃສ່ໂລກພາຍນອກໃຫ້ເກີດອອກມາເປັນເງິນເປັນທຶນທີ່ຈັບຕ້ອງໄດ້ ຮູ້ຈັກນຳເອົາທຶນ ນຳເອົາຄວາມຮູ້ເຕັກໂນໂລຊີຈາກພາຍນອກມາກະທົບໃສ່ ຊັບພະຍາກອນຂອງປະເທດເຮົາໃຫ້ມີມູນຄ່າເພີ່ມຢ່າງເປັນເຈົ້າການ ແລະ ອື່ນໆ.

ທັງໝົດເຫຼົ່ານີ້ຢາກໃຫ້ເຂົ້າໃຈວ່າ ພວກເຮົາຮູ້ຫາເງິນດ້ວຍມັນສະໝອງຂອງພວກເຮົາ ຮູ້ຫາເງິນດ້ວຍການນຳໃຊ້ຊັບພະຍາກອນຢ່າງກຸ້ມຄ່າ ແລະ ຫາເງິນໄດ້ແຕ່ຮັກສາໄດ້ຊັບພະຍາກອນທີ່ສາມາດນຳໃຊ້ໄດ້ຍາວນານແລະຍືນຍົງ ຖ້າເຮົາເຮັດໄດ້ດີຖ້າເຮົານຳໃຊ້ມັນສະໝອງສະຕິປັນຍາໃນການຫາເງິນ ຊັບພະຍາກອນທີ່ເຮົາມີຈະເພີ່ມມູນຄ່າຂຶ້ນ ບໍ່ສູນເສຍໄປໃສ ແຕ່ພັດໄດ້ເງິນມາ ຍ້ອນເຮົາໄດ້ເງິນມາຈາສິ່ງໜຶ່ງຈະໄປພັດທະນາສິ່ງອື່ນໃຫກັບມາມີຄຸນຄ່າໃຫຍ່ກ່ວາເກົ່າເປັນປະໂຫຍດໃນການພັດທະນາກວ່າເກົ່າ ແລະ ສ້າງສິ່ງຕອບແທນທີ່ດີກວ່າເກົ່າ ນີ້ຄືເປົ້າໝາຍສຳຄັນຂອງ ສອຈ, ທັງໝົດນັ້ນແມ່ນຄົນລາວພວກເຮົາເປັນເຈົ້າຕົນເອງແຫ່ງຄວາມຄິດ ເຮັດໃຫ້ເກີດມີທຶນຮອນເປັນເຈົ້າຂອງສິ່ງທີ່ໄດ້ມາເປັນເຈົ້າແຫ່ງການໃຊ້ຈ່າຍຕາມການວາງແຜນໄວ້ເພື່ອຄວາມເຕີບໃຫຍ່ຂະຫຍາຍ ຕົວຂອງປະເທດຊາດ ຜົນສຸດທ້າຍແມ່ນຄົນລາວທຸກໆຄົນຈະໄດ້ຮັບຜົນປະໂຫຍດຈາກການພັດທະນາຢ່າງຢືນຍົງ.