ອຸຕຸເຕືອນ! ວັນທີ 8-14 ມັງກອນ 2024 ນີ້ ອາກາດຈະໜາວເຢັນ ຫາ ໜາວຫລາຍ ໂດຍສະເພາະແຂວງພາກເໜືອ ແລະ ຈະມີຝົນຕົກຄ່ອຍ

ກົມອຸຕຸນິຍົມ ແລະ ອຸທົກກະສາດ ລາຍງານວ່າ: ຄາດຄະເນສະພາບອາກາດໃນໄລຍະວັນທີ 8-14 ມັງກອນ 2024 ຄວາມກົດດັນສູງຂອງອາກາດເຢັນທີ່ປະເທດຈີນຈະປົກຄຸມຢູ່ທົ່ວທຸກພາກຂອງປະເທດລາວດ້ວຍກໍາລັງປານກາງ, ສົມທົບກັບກະແສລົມຕາເວັນອອກສ່ຽງເໜືອພັດປົກຄຸມ. ເຊິ່ງຈະເຮັດໃຫ້ ອາກາດໜາວເຢັນ ພ້ອມມີໝອກບາງປົກຫຸ້ມຢູ່ທົ່ວໄປໃນຕອນເຊົ້າຢູ່ແຕ່ລະພາກ. ໂດຍສະເພາະຢູ່ແຂວງພາກເໜືອ, ພາກ ກາງ, ແຂວງໄຊສົມບູນ ແລະ ເຂດພູພຽງບໍລະເວນ ອາກາດຈະໜາວເຢັນ ຫາ ໜາວຫລາຍ ແລະ ຈະມີຝົນຕົກຄ່ອຍເປັນບາງ ບໍລິເວນ ພ້ອມມີລົມພັດແຮງເປັນບາງໂອກາດ.

ພາກເໜືອດ້ານຕາເວັນອອກ: ອາກາດຈະໜາວເຢັນ ຫາ ໜາວຫລາຍ ພ້ອມມີໝອກໜາປົກຫຸ້ມຢູ່ທົ່ວໄປໃນຕອນເຊົ້າ ແລະ ມີຝົນຕົກໃນລະດັບຄ່ອຍຢູ່ບາງທ້ອງຖິ່ນ. ອຸນຫະພູມຕໍ່າສຸດ 8 ອົງສາ ແລະ ສູງສຸດ 24 ອົງສາ.

ພາກເໜືອດ້ານຕາເວັນຕົກ: ອາກາດຈະໜາວເຢັນ ຫາ ໜາວຫລາຍ ພ້ອມມີ ໝອກບາງປົກຫຸ້ມໃນຕອນເຊົ້າ ແລະ ໝອກໜາປົກຫຸ້ມຢູ່ບາງທ້ອງຖິ່ນເຂດພູສູງ ແລະ ເນີນພູ ແລະ ມີຝົນຕົກໃນລະດັບຄ່ອຍ ຢູ່ບາງທ້ອງຖິ່ນ. ອຸນຫະພູມຕໍ່າສຸດ 12 ອົງສາ ແລະ ສູງສຸດ 30 ອົງສາ.

ພາກກາງ: ອາກາດໜາວເຢັນໃນຕອນກາງຄືນ ຫາຕອນເຊົ້າ, ພ້ອມມີລົມພັດແຮງ ຢູ່ບາາງທ້ອງຖິ່ນທາງດ້ານຕາເວັນອອກຂອງພາກ. ອຸນຫະພູມຕໍ່າສຸດ 14 ອົງສາ ແລະ ສູງສຸດ 32 ອົງສາ. ສໍາລັບ ແຂວງ ໄຊສົມບູນ: ອາກາດໜາວເຢັນ ພ້ອມມີໝອກໜາໃນຕອນເຊົ້າ. ອຸນຫະພູມຕໍ່າສຸດ 8 ອົງສາ ແລະ ສູງສຸດ 25 ອົງສາ.

ພາກໃຕ້: ອາກາດເຢັນໃນຕອນເຊົ້າ, ພ້ອມມີລົມພັດແຮງຢູ່ບາງທ້ອງຖິ່ນ. ອຸນຫະພູມຕໍ່າສຸດ 17 ອົງສາ ແລະ ສູງສຸດ 32 ອົງສາ.

ສໍາລັບເຂດພູພຽງບໍລະເວນ: ອາກາດຈະໜາວເຢັນຫລາຍ ພ້ອມມີໝອກໜາໃນຕອນເຊົ້າ. ອຸນຫະພູມຕໍ່າສຸດ 7 ອົງສາ ແລະ ສູງສຸດ 27 ອົງສາ.

ນະຄອນຫລວງວຽງຈັນ: ອາກາດຈະເຢັນ ຫາ ໜາວເຢັນ ໃນຕອນກາງຄືນ ຫາ ຕອນເຊົ້າ ພ້ອມມີໝອກບາງປົກຫຸ້ມຢູ່ທົ່ວໄປ. ອຸນຫະພູມຕໍ່າສຸດ 15 ອົງສາ ແລະ ສູງສຸດ 30 ອົງສາ.