ມອບ-ຮັບ ໂຄງການກໍ່ສ້າງ ສວນສາທາລະນະມິດຕະພາບ ໄຊສົມບູນ-ເຊີນລາ ທີ່ໄດ້ຮັບທຶນຊ່ວຍເຫລືອລ້າ ຈາກ ແຂວງເຊິນລາ

ການມອບ-ຮັບ ໂຄງການກໍ່ສ້າງສວນສາທາລະນະມິດຕະພາບ ໄຊສົມບູນ-ເຊີນລາ (ຫໍຫຼັກເມືອງ) ໄດ້ຈັດຂຶ້ນວັນທີ 7 ມັງກອນ 2024 ທີ່ບ້ານພູຫົວຊ້າງ ເມືອງອະນຸວົງ ແຂວງໄຊສົມບູນ ໂດຍການເຂົ້າຮ່ວມຂອງ ທ່ານ ພອຍຄຳ ຮຸ່ງບຸນຍວງ ເຈົ້າແຂວງໄຊສົມບູນ, ທ່ານ ຈ່າ ອາ ກົ່ວ, ຮອງປະທານສະພາປະຊາຊົນ ແຂວງເຊິນລາ ສສ ຫວຽດນາມ.

ທ່ານ ທົງສະຫວັນ ໂພສະລາດ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງໄຊສົມບູນກ່າວວ່າ: ສວນສາທາລະນະມິດຕະພາບໄຊສົມບູນ-ເຊີນລາ ເປັນໂຄງການຊ່ວຍເຫຼືອລ້າ ຈາກການນຳແຂວງເຊີນລາ ສສ ຫວຽດນາມ ລວມມູນຄ່າໃນການກໍ່ສ້າງທັງໝົດ 5 ຕື້ກວ່າກີບ ເລີ່ມກໍ່ສ້າງແຕ່ເດືອນຕຸລາ 2022 ເປັນຕົ້ນມາ, ການສ້າງສວນສາທາລະນະ ມິດຕະພາບໄຊສົມບູນ-ເຊີນລາ ແຫ່ງນີ້ ເພື່ອເປັນການສ່ອງແສງເຖິງມູນເຊື້ອຄວາມສາມັກຄີ, ມິດຕະພາບແບບພິເສດ ແລະ ການຮ່ວມມືຮອບດ້ານ ລະຫວ່າງສອງປະເທດລາວ-ຫວຽດນາມ ເວົ້າລວມ, ເວົ້າສະເພາະແຂວງໄຊສົມບູນ ກັບແຂວງເຊີນລາ ຈະນັບມື້ພັດທະນາສາຍສຳພັນອັນດີງາມ ແລະ ຈະສືບຕໍ່ເສີມຂະຫຍາຍຢ່າງຕໍ່ເນື່ອງ ທັງເປັນການຢັ້ງຢືນ ການປະກອບສ່ວນອັນສຳຄັນ ໃນການພັດທະນາ ແຂວງໄຊສົມບູນ ເພື່ອໃຫ້ຄົນຮຸ່ນໜຸ່ມຂອງສອງປະເທດ ກໍຄືສອງແຂວງ ໄດ້ເຂົ້າໃຈຢ່າງເລີກເຊິ່ງ ແລະ ສືບຕໍ່ຖະນຸທະໜອມ ສາຍພົວພັນທີ່ມີລັກ ສະນະພິເສດ ທີ່ມີໜຶ່ງດຽວໃນໂລກ ລະຫວ່າງ ແຂວງໄຊສົມບູນ   ແລະ ແຂວງເຊີນລາ   ແລະ ເປັນສະຖານທີ່ທ່ອງທ່ຽວທາງດ້ານວັດທະນະທຳ ເພື່ອໃຫ້ບັນດາແຂກ, ນັກທ່ອງທ່ຽວ ທັງພາຍໃນ ແລະ ຕ່າງປະເທດ ທີ່ໄດ້ມາທ່ຽວຊົມ ໄດ້ມາກາບໄຫ້ວ, ສັກກະລະບູຊາ,   ຊຶ່ງຫໍຫຼັກເມືອງແຫ່ງນີ້ ຈະກາຍເປັນປູສະນີຍະສະຖານ ເປັນມິ່ງຂວັນຂອງຂອງຊາວ ແຂວງໄຊສົມບູນ ແລະ ເປັນມໍລະດົກສືບຕໍ່ຢູ່ຄູ່ກັບ ແຂວງໄຊສົມບູນຕະຫຼອດໄປ.