ແຜ່ນດິນໄຫວຢູ່ຍີ່ປຸ່ນຍັງສູນຫາຍເກືອບ 250 ຄົນ ຄວາມຫວັງພົບຜູ້ລອດຊີວິດມີໜ້ອຍ
ເຈົ້າໜ້າທີ່ກູ້ໄພຢູ່ຍີ່ປຸ່ນກໍາລັງເລັ່ງຄົ້ນຫາຜູ້ສູນຫາຍຈໍານວນ 242 ຄົນຈາກແຜ່ນດິນໄຫວຄັ້ງໃຫຍ່ໃນວັນທີ 1 ມັງກອນຜ່ານມາ. ຂະນະທີ່ຄວາມຫວັງຈະພົບຜູ້ລອດຊີວິດເພີ່ມອີກມີໜ້ອຍ ຫລັງຜ່ານພົ້ນກໍານົດເວລາວິກິດ 72 ຊົ່ວໂມງໃນການຄົ້ນຫາຜູ້ລອດຊີວິດໄປໃນຄືນວັນທີ 4 ມັງກອນຜ່ານມາ.
ສໍານັກຂ່າວ Kyodo ລາຍງານວ່າ: ກອງກໍາລັງປ້ອງກັນຕົນເອງຂອງຍີ່ປຸ່ນເພີ່ມຈໍານວນທະຫານເຂົ້າຮ່ວມປະຕິບັດການຊ່ວຍເຫລືອ ແລະ ບັນເທົາທຸກອີກສອງເທົ່າ ເປັນ 4.600 ຄົນ ໂດຍຄາດວ່າຜູ້ປະສົບໄພຫລາຍຄົນຕົກຄ້າງຢູ່ເຮືອນທີ່ເປ່ເພເສຍຫາຍ ໂດຍສ່ວນຫລາຍຢູ່ເມືອງຊູຊຸ ແລະ ວາຈິມະ ເຊິ່ງໂຄງສ້າງເຮືອນເປັນໄມ້ ແລະ ບໍ່ໄດ້ຖືກສ້າງຂຶ້ນເພື່ອຕ້ານແຜ່ນດິນໄຫວຮຸນແຮງ.
ທັງນີ້, ຂໍ້ມູນຫລ້າສຸດໃນວັນທີ 7 ມັງກອນ ຈໍານວນຜູ້ເສຍຊີວິດຈາກແຜ່ນດິນໄຫວຂະໜາດ 7,6 ແມກນິຈູດ ເພີ່ມຂຶ້ນເປັນ 126 ຄົນ.
ປະຊາຊົນຫລາຍໝື່ນຄົນຍັງບໍ່ມີໄຟຟ້າ ແລະ ນໍ້າປະປາໃຊ້. ຂະນະທີ່ຫລາຍຮ້ອຍຄົນຍັງລໍຖ້າການຊ່ວຍເຫລືອ ເນື່ອງຈາກດິນເຈື່ອນ ແລະ ເສດຊາກຫັກຖັງທີ່ຫລົ່ນລົງມາປິດກັ້ນຖະໜົນຖືເປັນອຸປະສັກສໍາຄັນຕໍ່ທີມກູ້ໄພ.
ອ້າງອີງ:
