ປີ 2023 ກະຊວງການເງິນ ສຸມໃສ່ຈັດຕັ້ງປະຕິບັດ ແຜນງົບປະມານແຫ່ງລັດ ສາມາດປະຕິບັດລາຍ ຮັບໄດ້ ລື່ນຄາດໝາຍຂອງແຜນການປີ
ກອງປະຊຸມຄົບຄະນະບໍລິຫານງານພັກກະຊວງການເງິນ ເປີດກວ້າງຄັ້ງທີ 6 ສະໄໝທີ 3 ດຳເນີນໄປວັນທີ 5 ມັງກອນ 2024, ໂດຍການເປັນປະທານ ຂອງທ່ານ ສັນຕິພາບ ພົມວິຫານ ລັດຖະມົນຕີກະຊວງການເງິນ.
ທ່ານ ສັນຕິພາບ ພົມວິຫານ ມີຄຳເຫັນ ແລະ ກ່າວເປີດກອງປະຊຸມ ໂດຍມີເນື້ອໃນບາງຕອນສຳຄັນວ່າ: ຄະນະບໍລິຫານງານພັກກະຊວງການເງິນ ແລະ ຮາກຖານພັກແຕ່ລະຂັ້ນ ໄດ້ຍົກສູງບົດບາດເປັນເສນາທິການ ໃຫ້ແກ່ກົມການເມືອງ ແລະ ຄະນະເລຂາທິການສູນກາງພັກ ຄົ້ນຄວ້າ, ຈັດຕັ້ງຜັນຂະຫຍາຍແນວທາງ, ແຜນນະໂຍບາຍຂອງພັກ ນໍາພາການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ; ຖືສຳຄັນວຽກງານກໍ່ສ້າງພັກ ໂດຍສະເພາະແມ່ນ ການສຶກສາອົບຮົມການເມືອງ-ແນວຄິດ ໃຫ້ຖັນແຖວສະມາຊິກພັກ-ພະນັກງານ ມີຄວາມເຂົ້າໃຈເປັນເອກະພາບສູງ ຕໍ່ແນວທາງ, ນະໂຍບາຍຂອງພັກ, ກົດໝາຍ, ມະຕິ, ຄໍາສັ່ງຂອງພັກ-ລັດຖະບານ ວາງອອກ ໃນແຕ່ລະໄລຍະ, ມີແນວຄິດທຸ່ນທ່ຽງຕໍ່ກັບສະພາບຄວາມຫຍຸ້ງຍາກ ແລະ ສິ່ງທ້າທາຍຕ່າງໆ.
ພ້ອມນັ້ນ, ກໍໄດ້ເອົາໃຈໃສ່ປັບປຸງ ແລະ ກໍ່ສ້າງພັກ ດ້ານການຈັດຕັ້ງ ໃຫ້ມີຄວາມໜັກແໜ້ນ, ເຂັ້ມແຂງ ສາມາດປະຕິບັດບົດບາດເປັນແກນນໍາໃນລະບົບການເມືອງຢູ່ແຕ່ລະຂັ້ນ; ປັບປຸງເເບບເເຜນການນຳພາ ເເລະ ວິທີການເຮັດວຽກ, ລວມທັງການນໍາພາ-ຊີ້ນໍາວຽກງານອົງການຈັດຕັ້ງມະຫາຊົນ ໃຫ້ໄດ້ເຄື່ອນໄຫວຕາມພາລະບົດບາດ. ທາງດ້ານການນຳພາ-ຊີ້ນຳ ໜ້າທີ່ການເມືອງ ໃນການຄຸ້ມຄອງບໍລິຫານລັດ, ຄະນະບໍລິຫານງານພັກກະຊວງການເງິນ ແລະ ຮາກຖານພັກແຕ່ລະຂັ້ນ ໄດ້ສຸມໃສ່ຈັດຕັ້ງປະຕິບັດ ແຜນງົບປະມານແຫ່ງລັດ ປະຈໍາປີ 2023, ເຊິ່ງສາມາດປະຕິບັດລາຍຮັບທັງໝົດໄດ້ 110,6%ລື່ນຄາດໝາຍຂອງແຜນການປີ ກວມຫຼາຍກວ່າ 18% ຂອງ GDP (ທຽບໃສ່ໄລຍະດຽວກັນ ຂອງປີຜ່ານມາເພີ່ມຂຶ້ນ 31%). ໂດຍໄດ້ສຸມໃສ່ເບີກຈ່າຍເງິນເດືອນເປັນບູລິມະສິດ, ຊຳລະໜີ້ສິນພາຍໃນ ແລະ ຕ່າງປະເທດ, ລາຍຈ່າຍບໍລິຫານກົງຈັກພັກ-ລັດ ແລະ ລາຍຈ່າຍອື່ນໆທີ່ຈຳເປັນໄດ້ໂດຍພື້ນຖານ.
