ການຄ້າ ເມືອງຍົມມະລາດ ກໍານົດລາຄາຂາຍຊີ້ນງົວ-ຄວາຍ 100.000 ກີບ/ກິໂລ ແລະ ຊີ້ນໝູ 70.000 ກີບ/ກິໂລ
ທ່ານ ຄໍາຫວາ ແກ້ວມາລາ ຮອງຫົວໜ້າຫ້ອງການອຸດສາຫະກໍາ ແລະ ການຄ້າ ເມືອງຍົມມະລາດ ແຂວງຄໍາມ່ວນ ລາຍງານວ່າ: ປັດຈຸບັນ ຫ້ອງການອຸດສາຫະກໍາ ແລະ ການຄ້າເມືອງ ໄດ້ແຕ່ງຕັ້ງເຈົ້າໜ້າທີ່ກວດກາການຄ້າ ລົງຕິດຕາມການເໜັງຕິງທາງດ້ານລາຄາຢູ່ຕາມທ້ອງຕະຫລາດເຊັ່ນ: ເຂົ້າ, ອາຫານ , ຊີ້ນງົວ-ຄວາຍ ແລະ ກໍານົດລາຄາສະເພາະຊີ້ນງົວ-ຄວາຍ 100.000 ກີບ/ກິໂລ, ຊີ້ນໝູ 70.000 ກີບ/ກິໂລ.
ພ້ອມກັນນັ້ນກໍໄດ້ເອົາໃຈໃສ່ຕິດຕາມການຊື້-ຂາຍມັນຕົ້ນຢູ່ພາຍໃນເມືອງແຕ່ບໍ່ໄດ້ເປັນຜູ້ກໍານົດດ້ານລາຄາເນື່ອງຈາກວ່າລາຄາມີການຂຶ້ນ-ລົງຕາມທ້ອງຕະຫລາດ ແຕ່ເປັນມັນຕົ້ນແຫ້ງຕາມການແຈ້ງການຂອງກະຊວງກະສິກໍາເຊິ່ງໃນປັດຈຸບັນມັນຕົ້ນແຫ້ງລາຄາຊື້ຢູ່ໂຮງງານ 4.600 ກີບ/ກິໂລ, ມັນຕົ້ນດິບ 2.000 ກີບ/ກິໂລ. ສ່ວນລາຄາເຂົ້າແມ່ນ 80.000 ກີບ/ໝື່ນ. ນອກນັ້ນຍັງໄດ້ມີການຕິດຕາມຄາລານໍ້າມັນທີ່ທາງກະຊວງແຈ້ງມາກ່ຽວກັບການຂຶ້ນ-ລົງຂອງລາຄານໍ້າມັນຕ້ອງໄດ້ມີການລົງກວດກາຖ້າຫາກຜູ້ປະກອບການບໍ່ປະຕິບັດຕາມລະບຽບການແມ່ນຈະໄດ້ມີການເຮັດບົດບັນທຶກສຶກສາອົບຮົມຕາມແຕ່ລະກໍລະນີ.
