ໝອກລົງໜາແໜ້ນ ເຮັດໃຫ້ລົດຕຳກັນຫລາຍຄັນຕໍ່ເນື່ອງ ມີຜູ້ເສຍຊີວິດຢ່າງໜ້ອຍ 10 ຄົນ

ສຳນັກຂ່າວຕ່າງປະເທດລາຍງານ ວັນທີ 29 ທັນວາ 2023: ເກີດອຸບັດເຫດລົດຕຳກັນເຖິງ 7 ຄັນ ຢູ່ຖະໜົນມໍເຕີເວ ແຂວງຊາການາ ທາງຕາເວັນຕົກສ່ຽງເໜືອຂອງຕວກກີ ຫ່າງຈາກນະຄອນອິສຕັນບູ ປະມານ 150 ກິໂລແມັດ, ສົ່ງຜົນໃຫ້ມີຜູ້ເສຍຊີວິດຢ່າງໜ້ອຍ 10 ຄົນ ແລະ ບາດເຈັບອີກ 57 ຄົນ, ໃນນີ້ ບາດເຈັບສາຫັດ 7 ຄົນ ສາເຫດຂອງອຸບັດເຫດຄັ້ງນີ້ເກີດຂຶ້ນເນື່ອງຈາກມີໝອກລົງໜາແໜ້ນໃນຂະນະເກີດເຫດ ເຮັດໃຫ້ການເບິ່ງເຫັນຫລຸດຕໍ່າລົງ.

ສ່ວນທາງການ ຄາດວ່າຜູ້ທີ່ເສຍຊີວິດສ່ວນໃຫຍ່ເກີດຈາກການລົງມາຈາກລົດ ແລ້ວເຮັດໃຫ້ລົດທີ່ຂັບມານຳຫລັງຕຳເອົາຈົນເສຍຊີວິດ ໂດຍລ່າສຸດ ແລະ ໜ່ວຍກູ້ໄພໄດ້ເລັ່ງເຂົ້າກວດສອບພື້ນທີ່ ແລະ ເກັບກວາດຊາກລົດອອກຈາກເສັ້ນທາງເພື່ອເຮັດໃຫ້ລົດສາມາດສັນຈອນໄປມາໄດ້ຕາມປົກກະຕິ.