ໝາກຍົມມີສັບພະຄຸນຊ່ວຍບຳລຸງເລືອດ

ໝາກຍົມເປັນພືດທີ່ທຸກຄົນຮູ້ຈັກກັນດີ ມັກນິຍົມປູກໄວ້ໜ້າບ້ານ ເຊື່ອກັນວ່າຄົນຈະນິຍົມຊົມຊອບ. ນອກຈາກທີ່ເຮົາຈະຮູ້ຈັກຕົ້ນໄມ້ຊະນິດນີ້ກັນດີ ແລະ ໝາກຍົມກໍມີລົດຊາດສົ້ມຫວານແລ້ວໝາກຍົມຍັງມີສັບພະຄຸນເປັນຢາດີ.

ໝາກຍົມມີຄາໂບໄຮເດຣດ, ເສັ້ນໄຍອາຫານ, ໂປຣຕິນ, ທາດການຊຽມ, ທາດເຫລັກ, ວິຕາມິນອາ, ວິຕາມິນເບ 1, ວິຕາມິນເບ 2 ແລະ ວິຕາມິນເຊ. ໃນໝາກຍົມຈະມີສານ  tannin, dextrose, levulose, sucrose, vitamin C ເຊິ່ງມີລົດຊາດສົ້ມ ຫລື ສົ້ມຫວານ ຊ່ວຍກັດຂີ້ກະເທີ່, ແກ້ໄອ, ບຳລຸງເລືອດ ແລະ ລະບາຍທ້ອງ ຊ່ວຍໃຫ້ຖ່າຍງ່າຍຂຶ້ນ.

ໃນຕ່າງປະເທດມີການໃຊ້ໝາກຍົມສົ້ມໃນການຟອກເລືອດ ແລະ ກະຕຸ້ນໃຫ້ມີການຢາກອາຫານ, ປິ່ນປົວອາການຫລອດລົມອັກເສບ ແລະ ພົກຍ່ຽວອັກເສບ ລວມໄປເຖິງພະຍາດລິດສີດວງທະວານ ແລະ ໃຊ້ບຳລຸງຕັບ.