ພວກເຮົາມີຄວາມພ້ອມແລ້ວ ສຳລັບປີທ່ອງທ່ຽວລາວ 2024
ປີ 2024 ຍັງອີກບໍ່ພໍໃດມື້ກໍມາເຖິງແລ້ວ ແລະພວກເຮົາຕ່າງຕັ້ງຕາລໍຄອຍປີແຫ່ງການທ່ອງທ່ຽວລາວ ເຊິ່ງມີຄວາມຫວັງວ່າພວກເຮົາຈະສາມາດເລັ່ງຟື້ນຟູ ຂະແໜງທ່ອງທ່ຽວໃຫ້ໄດ້ດີ ແຕ່ພວກເຮົາມີຄວາມພ້ອມຮອບດ້ານແລ້ວບໍ່?
ປີ 2023 ສື່ຕ່າງປະເທດຫຼາຍສຳນັກ ກໍໄດ້ປະເມີນວ່າ ປະເທດເຮົາເປັນໜຶ່ງໃນ 23 ປະເທດ ທີ່ໜ້າມາທ່ຽວຊົມ ໂດຍທີ່ນອກຈາກມີຄວາມສວຍສົດງົດງາມທາງທຳມະຊາດ ແລະວັດທະນະທຳ ແລ້ວການເປີດເສັ້ນທາງລົດໄຟ ກໍຍິ່ງເພີ່ມຄວາມສະດວກສະບາຍໃນການເດີນຫາຈຸດໝາຍປາຍທາງຂອງທ່ອງທ່ຽວໃນ ປະເທດເຮົາ ເຊິ່ງສະເພາະ ປີ 2023 ລົດໄຟລາວ-ຈີນ ໄດ້ຂົນສົ່ງ ຜູ້ໂດຍສານທັງໝົດຮອດ 1,7 ລ້ານຄົນ ເຊິ່ງນັ້ນກໍສະແດງວ່າການເຂົ້າເຖິງ ຫຼື ການຄົມມະນາຄົມນັ້ນ ມີບົດບາດສຳຄັນຫຼາຍໃນການ ຊຸກຍູ້ການຂະຫຍາຍຕົວຂອງທ່ອງທ່ຽວ.
ໃນສອງສາມອາທິດຜ່ານມາ ບໍ່ວ່າທັງສູນກາງ ແລະທ້ອງຖິ່ນຫຼາຍແຂວງຕ່າງກໍໄດ້ປະກາດວ່າຕົນມີຄວາມພ້ອມ ໃນການຕ້ອນຮັບ ນັກທ່ອງທ່ຽວ ໂດຍສະເພາະ ບັນດາຮ້ານອາຫານ, ໂຮງແຮມ ແລະສະຖານທີ່ທ່ອງທ່ຽວຕ່າງໆ ເຊິ່ງກໍເປັນຂ່າວດີ.
ແຕ່ຢ່າງໃດກໍຕາມເຫັນວ່າຍັງມີຫຼາຍອັນທີ່ຈະຕ້ອງເລັ່ງແກ້ໄຂໃຫ້ທັນກັບສະພາບການ ເພື່ອອຳນວຍໃຫ້ການຂະຫຍາຍການທ່ອງທ່ຽວໃຫ້ໄດ້ດີແມ່ນການຄົມມະນາຄົມ, ໃນປັດຈຸບັນເຫັນວ່າ ສະພາບເສັ້ນທາງ ໂດຍສະເພາະທາງເລກທີ 13 ໃຕ້ ເຊື່ອມຕໍ່ຈາກນະຄອນຫຼວງວຽງຈັນ ຫາພາກກາງ ແລະ ພາກໃຕ້ນັ້ນ ຍັງມີຄວາມຫຍຸ້ງຍາກຫຼາຍ ເຖິງແມ່ນວ່າຈະສຳເລັດການກໍ່ສ້າງແລ້ວບາງໄລຍະ ແຕ່ກໍຍັງມີບາງໄລຍະ ທີ່ເປ່ເພໜັກ ແລະຍັງບໍ່ທັນໄດ້ ເລີ່ມການສ້ອມແປງ ຫຼືເຮັດໃໝ່ ໂດຍສະເພາະແຕ່ນະຄອນຫຼວງວຽງຈັນ ຫາ ເມືອງປາກງື່ມ ແລະ ຫຼາຍຊ່ວງຂອງແຂວງບໍລິຄຳໄຊ ແລະ ຄຳມ່ວນ ເປັນຕົ້ນ.
ດັ່ງໄດ້ກ່າວມາເບື້ອງຕົ້ນການ ເຂົ້າເຖິງ ຫຼື ສະພາບການຄົມມະນາຄົມນັ້ນ ແມ່ນໄປປັດໄຈສຳຄັນໃນການ ຊຸກຍູ້ສົ່ງເສີມການທ່ອງທ່ຽວ ເພາະສະນັ້ນ ການເລັ່ງປັບປຸງເສັ້ນທາງແມ່ນເລື່ອງຈຳເປັນ, ຖ້າມີຄວາມພ້ອມພຽງແຕ່ຂະແໜງການທ່ອງທ່ຽວ ແຕ່ຂະແໜງການອື່ນບໍ່ພ້ອມ ກໍສໍ່າກັບວ່າ “ໄມ້ລຳດຽວລ້ອມຮົ້ວບໍ່ໄຄວ່ ໄພ່ບໍ່ພ້ອມແປງບ້ານບໍ່ເຮືອງ” ແທ້ໆ.
ຂະແໜງການທ່ອງທ່ຽວກໍຕ້ອງອີງໃສ່ຄວາມພ້ອມຂອງຂະແໜງການອື່ນໆ, ນອກຈາກສະພາບເສັ້ນທາງຄືວ່ານັ້ນ ແລ້ວ ກໍຍັງມີລະດັບການບໍລິການແຂກ ຢູ່ຕາມສະຖານທີ່ຕ່າງໆ ທີ່ນັກທ່ອງທ່ຽວໄປ ໂດຍສະເພາະ ບັນດາຮ້າງຮ້ານ ຕ່າງໆ ຕ້ອງຮັບປະກັນບໍ່ເອົາປຽບນັກທ່ອງທ່ຽວ. ມາດຕະຖານການໂຮງແຮມ ເຮືອນພັກ, ຮ້ານອາຫານ, ຫ້ອງນໍ້າທີ່ ສະອາດນັ້ນ ກໍລ້ວນແຕ່ແມ່ນປັດໄຈ ທີ່ມັດໃຈນັກທ່ອງທ່ຽວ.
ອີກດ້ານໜຶ່ງທີ່ຄວນເລັ່ງການປັບປຸງ ກໍແມ່ນການກຳຈັດສິ່ງເສດເຫຼືອ, ການຖີ້ມຂີ້ເຫຍື້ອຊະຊາຍຕາມເສັ້ນທາງ ແລະສະຖານທີ່ທ່ອງທ່ຽວຕ່າງໆ ທັງໃນຕົວເມືອງ ແລະຊົນນະບົດ. ຜູ້ຂຽນຈື່ບໍ່ລືມທີ່ເຄີຍຖາມນັກທ່ອງທ່ຽວ ຕ່າງປະເທດທ່ານໜຶ່ງວ່າ ເຈົ້າປະທັບໃຈຫຍັງມາທ່ຽວລາວ ແລະມີຫຍັງຄວນປັບປຸງຕື່ມ? ລາວຕອບວ່າ “ນອກຈາກຄວາມສວາຍງາມທາງທຳມະຊາດ ແລະວັດທະນະທຳແລ້ວ ຄົນລາວຍັງມີໄມຕີຈິດທີ່ດີ ແຕ່ສິ່ງທີ່ຄວນປັບປຸງແມ່ນການຢຸດຖີ້ມຂີ້ເຫຍື້ອຊະຊາຍ ຕາມແມ່ນໍ້າ ແລະສະຖານທີ່ທ່ອງທ່ຽວນັ້ນ ໃຫ້ໄດ້”.
ຜູ້ຂຽນໄດ້ໂອ້ລົມນຳ ນັກທຸລະກິດອາວຸໂສທ່ານໜຶ່ງ ທີ່ປະກອບການທາງດ້ານການທ່ອງທ່ຽວມາກວ່າ 20 ປີ ມີຄຳເຫັນວ່າ “ພວກເຮົາຄວນບິແບ່ງງົບປະມານໃນການສ້າງສື່ໂຄສະນາຢ່າງເຂັ້ມແຂງກວ່າເກົ່າ ແລະຊ່ວຍກັນປົກປັກຮັກສາ ມໍລະດົກທາງວັດທະນະທຳ ແລະທຳມະຊາດຂອງລາວໄວ້ໃຫ້ໝັ້ນຄົງ”.
ໃນປີ 2023 ສປປ ລາວ ໄດ້ຕັ້ງເປົ້າໝາຍຈະໃຫ້ນັກທ່ອງທ່ຽວ ມາທ່ຽວຊົມປະເທດເຮົາ ໃຫ້ໄດ້ 1,4 ລ້ານ ເທື່ອຄົນ ແຕ່ແລ້ວກໍລື່ນຄາດໝາຍ ເພາະພຽງແຕ່ 9 ເດືອນທຳອິກຂອງປີ ມີນັກທ່ອງທ່ຽວເຂົ້າມາປະເທດເຮົາ ຮອດ 2,4 ລ້ານຄົນ ນັ້ນສະແດງໃຫ້ເຫັນວ່າ ພວກເຮົາມີທ່າແຮງ ໃນການດຶງດູດນັກທ່ອງທ່ຽວບໍ່ແມ່ນໜ້ອຍ ແລະ ໃນປີ 2024 ນີ້ ກໍໄດ້ຕັ້ງ ໄວ້ວ່າ ຢ່າງໜ້ອຍ ນັກທ່ອງທ່ຽວເຂົ້າມາປະເທດເຮົາປະມານ 4,6 ລ້ານເທື່ອຄົນ.
ພວກເຮົາທັງໝົດກໍຮູ້ຢູ່ແລ້ວວ່າ ທ່າແຮງການທ່ອງທ່ຽວຂອງ ສປປລາວໜ້ອຍຫຼາຍສໍ່າໃດ ແຕ່ຖ້າບໍ່ສວຍໃຊ້ ແລະປັບປຸງຕົນເອງກໍຈະເສຍໂອກາດນີ້ໄປລ້າໆ.
