ອີຣານຂູ່ຕອບໂຕ້ອິດສະລາແອນ ແກ້ແຄ້ນສັງຫານເຈົ້າໜ້າທີ່ລະດັບສູງຂອງກອງທັບ
ກອງກໍາລັງພິທັກປະຕິວັດອິດສະລາມຂອງອີຣານ (Islamic Revolutionary Guard Corps: IRGC) ຂູ່ຕອບໂຕ້ອິດສະລາແອນຢ່າງຮຸນແຮງ ພາຍຫລັງການເສຍຊີວິດຂອງນາຍພົນຈັດຕະວາ ເຊເຢດ ຣາຊີ ມູຊາວີ (Seyed Razi Mousavi) ທີ່ປຶກສາທາງທະຫານລະດັບສູງຂອງ IRGC ເຊິ່ງຖືກສັງຫານດ້ວຍລູກສອນໄຟລະຫວ່າງຢູ່ໃນຟາມແຫ່ງໜຶ່ງ ນອກນະຄອນຫລວງກາມັດກັດ ຂອງຊີຣີ ໃນວັນທີ 25 ທັນວາ ໂດຍອີຣານກ່າວຫາວ່າ: ອິດສະລາແອນຢູ່ເບື້ອງຫລັງແຜນລອບສັງຫານ.
ຂໍ້ກ່າວຫາຂອງອີຣານມີຂຶ້ນທ່າມກາງຄວາມກັງວົນວ່າ: ສົງຄາມຢູ່ເຂດກາຊາລະຫວ່າງອິດສະລາແອນ ແລະ ກຸ່ມຮາມັດທີ່ອີຣານສະໜັບສະໜູນ ອາດຂະຫຍາຍວົງໄປສູ່ຄວາມຂັດແຍ່ງລະດັບພາກພື້ນ.
ຂະນະທີ່ລັດຖະບານອິດສະລາແອນປະຕິເສດຈະສະແດງຄວາມຄິດເຫັນໂດຍກົງຕໍ່ຂໍ້ກ່າວຫາຂອງອີຣານ ໂດຍທ່ານ ໂຢອາບ ກັລແລນ ລັດຖະມົນຕີວ່າການກະຊວງປ້ອງກັນປະເທດອິດສະລາແອນ ກ່າວໃນວັນທີ 26 ທັນວາວ່າ: ອິດສະລາແອນກໍາລັງຢູ່ໃນສົງຄາມຫລາຍແນວຮົບ ແລະ ກໍາລັງຕົກຢູ່ພາຍໃນການໂຈມຕີຈາກສັດຕູໃນ 7 ສະຖານທີ່ ໄດ້ແກ່ ເຂດກາຊາ, ເວສແບງ, ເລບານອນ, ຊີຣີ, ອີຣັກ, ເຢເມນ ແລະ ອີຣານ.
ນາຍພົນຈັດຕະວາ ເຊເຢດ ຣາຊີ ເປັນໜຶ່ງໃນທີ່ປຶກສາທາງທະຫານເກົ່າແກ່ທີ່ສຸດຂອງ IRGC ທີ່ປະຈໍາການຢູ່ຊີຣີ ແລະ ເຮັດໜ້າທີ່ເປັນທີ່ປຶກສາຕໍ່ຕ້ານການກໍ່ການຮ້າຍຢູ່ຊີຣີ.
ທ່ານເປັນໜຶ່ງໃນຄົນໃກ້ຊິດຂອງນາຍພົນ ຄາເຊັມ ຊູລີມານີ (Qasem Soleimani) ອະດີດຜູ້ບັນຊາການກອງກໍາລັງຮົບພິເສດຂອງ IRGC ທີ່ຖືກກອງທັບອາເມລິກາໃຊ້ໂດຣນສັງຫານເວລາຢູ່ນະຄອນຫລວງແບກແດດໃນປີ 2020 ເຊິ່ງເປັນປະຕິບັດການຕາມຄໍາສັ່ງຂອງປະທານາທິບໍດີ ໂດນັລ ທຣໍາ.
ຂະນະທີ່ຫລາຍຝ່າຍເຊື່ອວ່າທ່ານເປັນຜູ້ຮັບຜິດຊອບການຈັດສົ່ງລູກສອນໄຟ ແລະ ອາວຸດອື່ນໆໃຫ້ແກ່ກຸ່ມເຮດໂບລາຢູ່ເລບານອນ ແລະ ກຸ່ມຕິດອາວຸດອື່ນໆຢູ່ຊີຣີ ເຊິ່ງລ້ວນເປັນສັດຕູຕໍ່ອິດສະລາແອນ.
ໂດຍກຸ່ມເຮດໂບລາເອີ້ນທ່ານ ເຊເຢດ ຣາຊີ ວ່າເປັນ “ອ້າຍຜູ້ເປັນທີ່ຮັກ” ເຊິ່ງສໍານັກຂ່າວ Fars ຂອງອີຣານ ລະບຸວ່າ: ອິດສະລາແອນຈະຕ້ອງຊົດໃຊ້ໃຫ້ຕໍ່ການກໍ່ອາດຊະຍາກໍາຄັ້ງນີ້ແບບບໍ່ຕ້ອງສົງໄສ.
ອ້າງອີງ:
- https://www.nytimes.com/2023/12/26/world/middleeast/isran-military-official-israel-syria.html
- https://www.aa.com.tr/en/middle-east/iran-says-israel-to-face-tough-countdown-after-killing-of-its-military-adviser-in-syria/3092517
