ແຄລິຟໍເນຍກຽມຣີໄຊເຄິລນໍ້າໃນຫ້ອງນໍ້າກັບມາໃຊ້ໃໝ່

ໃນອະນາຄົດນີ້ ຊາວແຄລິຟໍເນຍອາດຕ້ອງດື່ມ ແລະ ໃຊ້ນໍ້າປະປາທີ່ມາຈາກການຣີໄຊເຄິລນໍ້າຈາກທໍ່ນໍ້າຖິ້ມ ແລະ ນໍ້າໃນຫ້ອງນໍ້າ.

ເມື່ອບໍ່ດົນມານີ້, ຄະນະກໍາມາທິການເບິ່ງແຍງຊັບພະຍາກອນນໍ້າແຫ່ງລັດແຄລິຟໍເນຍ ສະຫະລັດອາເມລິກາ ຫາກໍຮັບຮອງກົດໝາຍທີ່ອະນຸຍາດໃຫ້ລະບົບປະປາຂອງລັດສາມາດນໍາເອົານໍ້າທີ່ໃຊ້ແລ້ວເຊັ່ນ: ນໍ້າຈາກທໍ່ນໍ້າຖິ້ມ, ນໍ້າຈາກທໍ່ລະບາຍຂອງຫ້ອງນໍ້າ ກັບມາໃຊ້ໃໝ່ ໂດຍຜ່ານຂະບວນການທີ່ເຮັດໃຫ້ສະອາດ ແລະ ບໍລິສຸດພໍພຽງທີ່ຈະດື່ມໄດ້.

ຂ່າວທີ່ເຜີຍແພ່ອອກມາຈາກຄະນະກໍາມາທິການເບິ່ງແຍງຊັບພະຍາກອນນໍ້າແຫ່ງລັດແຄລິຟໍເນຍ ໃນວັນທີ 19 ທັນວາຜ່ານມາ ລະບຸວ່າ: ກົດໝາຍນີ້ຈະເຮັດໃຫ້ລັດແຄລິຟໍເນຍເປັນລັດທີ່ມີຄວາມລໍ້າໜ້າທີ່ສຸດໃນປະເທດກ່ຽວກັບການອອກກົດໝາຍກໍາກັບມາດຕະຖານນໍ້າສະອາດເພື່ອການບໍລິໂພກ ໂດຍນໍາເອົານໍ້າທີ່ບໍ່ໃຊ້ແລ້ວກັບມາໃຊ້ໃໝ່ ເຊິ່ງຈະເຮັດໃຫ້ລະບົບນໍ້າປະປາໃນລັດມີນໍ້າສໍາລັບບໍລິໂພກເພີ່ມຂຶ້ນເປັນຈໍານວນຫລາຍລ້ານແກລລອນ. ຂະນະດຽວກັນ ກໍສາມາດຫລຸດປະລິມານນໍ້າທີ່ໃຊ້ແລ້ວປ່ອຍລົງທະເລນໍາອີກ.

ປະທານຄະນະກໍາມາທິການເບິ່ງແຍງຊັບພະຍາກອນນໍ້າກ່າວໃນຖະແຫລງການວ່າ: ນີ້ຄືການພັດທະນາທີ່ໜ້າຕື່ນເຕັ້ນທີ່ລັດພະຍາຍາມຈະໃຊ້ນະວັດຕະກໍາເພື່ອຫາທາງແກ້ໄຂບັນຫາມາຈາກສະພາບອາກາດປ່ຽນແປງ ແລະ ສົ່ງຜົນກະທົບຢ່າງຮຸນແຮງ.

ນອກຈາກການສ້າງແຫລ່ງຜະລິດນໍ້າເພື່ອບໍລິໂພກແລ້ວ, ຂະບວນການນີ້ຍັງເປັນການປະຢັດພະລັງງານ ແລະ ມີຜົນປະໂຫຍດຕໍ່ການຮັກສາສິ່ງແວດລ້ອມ ແລະ ສິ່ງສໍາຄັນທີ່ສຸດ ຄືກົດໝາຍນີ້ຈະສ້າງຄວາມໝັ້ນໃຈໄດ້ວ່າ: ນໍ້າທີ່ນໍາເອົາກັບມາຜະລິດໃໝ່ເພື່ອບໍລິໂພກນີ້ ຈະປອດໄພຕໍ່ການດື່ມ ແລະ ໃຊ້ປະໂຫຍດອື່ນໆ, ແຕ່ຍັງມີຄວາມສະອາດບໍລິສຸດຍິ່ງກວ່ານໍ້າຈາກແຫລ່ງນໍ້າດື່ມອື່ນໆທີ່ທາງລັດຕ້ອງອາໄສເປັນແຫລ່ງຜະລິດນໍ້າປະປາ.

ປັດຈຸບັນ, ແຄລິຟໍເນຍເປັນລັດທີ່ກໍາລັງຜະເຊີນບັນຫາໄພແຫ້ງແລ້ງຢ່າງໜັກ ເຖິງວ່າຝົນທີ່ຕົກຢ່າງໜັກໃນປີນີ້ຈະຊ່ວຍເພີ່ມແຫລ່ງນໍ້າໄດ້, ແຕ່ສະພາບອາກາດທີ່ປ່ຽນແປງເຂົ້າຂັ້ນວິກິດໄດ້ເຮັດໃຫ້ທາງການກັງວົນຕໍ່ບັນຫາການຂາດເຂີນນໍ້າກິນນໍ້າໃຊ້ທີ່ອາດຮຸນແຮງຂຶ້ນໃນອະນາຄົດ.

ຄະນະກໍາມາທິການເບິ່ງແຍງຊັບພະຍາກອນນໍ້າແຫ່ງລັດແຄລິຟໍເນຍ ຄາດວ່າກົດໝາຍໃໝ່ກ່ຽວກັບການຣີໄຊເຄິລນໍ້າບໍ່ໄດ້ໃຊ້ແລ້ວອາດຈະໄດ້ຮັບການຮັບຮອງໃນຂັ້ນສຸດທ້າຍພາຍໃນປີໜ້າ ແລະ ເມື່ອປະກາດບັງຄັບໃຊ້ແລ້ວ ລະບົບນໍ້າປະປາຂອງລັດຈະເລີ່ມດໍາເນີນຕາມແຜນ ແລະ ນໍາເອົານໍ້າທີ່ບໍ່ໃຊ້ແລ້ວມາຜ່ານຂະບວນການເຮັດໃຫ້ບໍລິສຸດເພື່ອບໍລິໂພກໄດ້ອີກ.