ຄວາມຮູ້ເລື່ອງອິນຊູລິນຄວບຄຸມນ້ຳຕານໃນເລືອດ

ຮ່າງກາຍຄວບຄຸມລະດັບນຳ້ຕານໃນເລືອດໂດຍອາໄສຮໍໂມນຫລັກທີ່ເອີ້ນວ່າ : ອິນຊູລິນ ເຊິ່ງຜະລິດຈາກບີຕາແຊນໃນມ້າມ ທີ່ເຮັດວຽກຢ່າງດຸ່ນດ່ຽງຮ່ວມກັບ ກລູຄາກອນ ແລະ ຮໍໂມນອື່ນ ໄດ້ແກ່ : ໂກ໊ດຮໍໂມນ, ຄໍຕິໂຊນ ແລະ ແຄທິຄໍລາມີນ ທັງນີ້ ອິນຊູລິນເປັນຮໍໂມນພຽງຊະນິດດຽວທີ່ສາມາດຫລຸດລະດັບນຳ້ຕານໃນເລືອດໄດ້. ສ່ວນກລູຄາກອນ ເຊິ່ງຜະລິດຈາກແອລຟາແຊນໃນມ້າມ ແລະ ຮໍໂມນອື່ນໆເຮັດໜ້າທີ່ກົງກັນຂ້າມກັນຄືສົ່ງເສີມການສ້າງນຳ້ຕານ.

ອິນຊູລິນຄວບຄຸມລະດັບນຳ້ຕານໃນເລືອດຜ່ານການອອກລິດຢູ່ແຊນຫລັກ 3 ຊະນິດ ຄື : ແຊນຕັບ, ແຊນກ້າມຊິ້ນລາຍ ແລະ ແຊນໄຂມັນ. ການອອກລິດຂອງອິນຊູລິນຂຶ້ນກັບລະດັບຄວາມເຂັ້ມຂຸ້ນຂອງອິນຊູລິນທີ່ມີຢູ່ໃນຂະນະນັ້ນ ຫລັງກິນອາຫານ ລະດັບອິນຊູລິນຈະສູງຂຶ້ນທັນທີສອດຮັບກັບລະດັບນຳ້ຕານໃນເລືອດທີ່ສູງຂຶ້ນ ເອີ້ນວ່າລະດັບອິນຊູລິນສູງສຸດ ຖືເປັນການຕອບສະໜອງຢ່າງໄວວາຂອງບີຕາແຊນຕໍ່ລະດັບນຳ້ຕານໃນເລືອດທີ່ສູງຂຶ້ນຈາກອາຫານ ແລະ ຈະຫລຸດລົງຢ່າງໄວວາຫລັງການດູດຊຶມນຳ້ຕານຈາກທໍ່ອາຫານຈົບລົງ ທັງນີ້ໃນຂະນະທີ່ບໍ່ມີການຍ່ອຍອາຫານ ແລະ ຂະນະອົດອາຫານດົນໆ ເຊັ່ນ : ນອນຫລັບໃນເວລາກາງຄືນ ມ້າມຈະຫລັ່ງອິນຊູລິນໃນປະລິມານໜ້ອຍຢ່າງຕໍ່ເນື່ອງ ເອີ້ນວ່າລະດັບອູນຊູລິນພື້ນຖານ ຂະບວນການເຮັດວຽກຂອງອິນຊູລິນໃນແຊນຫລັກ 3 ຊະນິດ ເປັນດັ່ງນີ້ :

1. ຢູ່ແຊນຕັບ : ເມື່ອລະດັບອິນຊູລິນຂຶ້ນສູງຈະອອກລິດຂັດຂວາງການສ້າງ ແລະ ການສົ່ງນຳ້ຕານຈາກຕັບ ແລະ ຄວບຄຸມ ຕັບໃຫ້ສະສົມນຳ້ຕານທີ່ເຫລືອຈາກການໃຊ້ງານໄວ້ໃນຮູບໄກລໂຄເຈນ ເມື່ອລະດັບອິນຊູລິນຫລຸດລົງສູ່ລະດັບອິນຊູລິນພື້ນຖານຈະກະຕຸ້ນໃຫ້ຕັບສ້າງນຳ້ຕານ ແລະ ສົ່ງເຂົ້າສູ່ກະແສເລືອດຕໍ່ເນື່ອງຕະຫລອດເວລາ.
2. ຢູ່ແຊນກ້າມຊີ້ນລາຍ : ອິນຊູລິນອອກລິດໂດຍເອົານຳ້ຕານເຂົ້າສູ່ກ້າມຊີ້ນລາຍ ເຊິ່ງເປັນແຊນຂອງກ້າມຊີ້ນມັດຕ່າງໆທົ່ວທັງຮ່າງກາຍ ເພື່ອໃຫ້ແຊນກ້າມຊີ້ນລາຍໃຊ້ເປັນພະລັງງານໃນຂະນະທີ່ມີການໃຊ້ງານ ຫລື ອອກແຮງເຮັດວຽກຍິ່ງມີການອອກແຮງຫລາຍ ການໃຊ້ນຳ້ຕານກໍຈະຫລາຍຂຶ້ນ ຫາກບໍ່ມີອິນຊູລິນ ຫລື ມີບໍ່ພຽງພໍ ແຊນກ້າມຊີ້ນລາຍຈະບໍ່ສາມາດໃຊ້ນຳ້ຕານເປັນພະລັງງານໄດ້ ເຖິງວ່າລະດັບນຳ້ຕານໃນເລືອດຈະສູງປານໃດກໍຕາມ ນອກຈາກນີ້, ອິນຊູລິນຍັງຊ່ວຍສົ່ງເສີມໃຫ້ກ້າມຊີ້ນລາຍເກັບສະສົມນຳ້ຕານໃນຮູບແບບໄກລໂຄເຈນໄວ້ ເພື່ອໃຊ້ເປັນພະລັງງານເມື່ອກ້າມຊີ້ນຢຸດການເຮັດວຽກ ຫລື ຢຸດ ອອກແຮງ.
3. ຢູ່ແຊນໄຂມັນ : ເມື່ອລະດັບອິນຊູລິນຂຶ້ນສູງຈະອອກລິດຂັດຂວາງການສະຫລາຍກົດໄຂມັນອິດສະຫລະຈາກໄຂມັນທີ່ສະສົມຢູ່ໃນແຊນໄຂມັນ ແລະ ສົ່ງເສີມການເກັບພະລັງງານສ່ວນເກີນໃນຮູບກົດໄຂມັນອິດສະຫລະໄວ້. ໃນແຊນໄຂມັນ ເມື່ອລະດັບອິນຊູລິນຫລຸດລົງສູ່ລະດັບອິນຊູລິນພື້ນຖານ ຈະກະຕຸ້ນໃຫ້ມີການສະຫລາຍກົດໄຂມັນອິດສະຫລະເຂົ້າສູ່ກະແສເລືອດ ເຊິ່ງຖືກເອົາໄປຫາຕັບເພື່ອສ້າງເປັນນຳ້ຕານຕໍ່ໄປ.

ດັ່ງນັ້ນ, ເມື່ອມີການຂາດອິນຊູລິນ ຫລື ການຕອບສະໜອງຂອງແຊນຕັບ, ແຊນກ້າມຊີ້ນລາຍ ແລະ ແຊນໄຂມັນຕໍ່ລິດຂອງອິນຊູລິນຫລຸດລົງ ຈຶ່ງເຮັດໃຫ້ເກີດຄວາມຜິດປົກກະຕິທາງເມຕາບໍລິຊຶມຂອງນຳ້ຕານ, ໄຂມັນ ແລະ ໂປຣຕິນ.