ຄະນະຮັບຜິດຊອບແກ້ໄຂສຽງເນືອງນັນ ເມືອງສີໂຄດຕະບອງ ກວດພົົບຮ້ານອາຫານ-ກິນດື່ມ ລະເມີດລະບຽບການ 4 ຮ້ານ

ວັນທີ 23 ທັນວາ 2023, ຄະນະຮັບຜິດຊອບຕິດຕາມ, ກວດກາ ແລະ ແກ້ໄຂສຽງເນືອງນັນໃນທຸລະກິດຮ້ານອາຫານ ແລະ ຮ້ານບັນເທີງຢູ່ ນວ ຈຸທີ 4, ໄດ້ສືບຕໍ່ເຄື່ອນໄຫວຕິດຕາມກວດກາສະພາບຕົວຈິງຢູ່ຮ້ານອາຫານ ແລະ ຮ້ານບັນເທີງ ໃນເມືອງສີໂຄດຕະບອງ ກວດພົບ ຮ້ານກິນ-ດື່ມກຣີນບາ ຢູ່ບ້ານສີຖານເໜືອ ເປີດບໍລິການສຽງເພງກາຍເວລາທີ່ກໍານົດ; ຮ້ານກິນ-ດື່ມຄອນເທີນເນີແຄມຂອງ ບ້ານສີຖານເໜືອ ເປີດບໍລິການສຽງເພງກາຍເວລາທີ່ກໍານົດ; ຮ້ານອາຫານທູຊິດເຕີ້ ບ້ານສີຖານເໜືອ ເປີດບໍລິການສຽງເພງກາຍເວລາທີ່ກໍານົດ, ຮ້ານອາຫານເບຍແຄັມ ບ້ານດົງນາໂຊກ ເປີດບໍລິການສຽງເພງກາຍເວລາທີ່ກໍານົດ; ສ່ວນຮ້ານບັນເທີງ ທີຈີ ທ່ຽນກຸ່ງ ບ້ານດົງນາໂຊກ, ຮ້ານອາຫານ 4 ເອື້ອຍນ້ອງ ແລະ ຮ້ານອາຫານແຄມຂອງເຈົ້າເກົ່າ ບ້ານສີຖານເໜືອ ແມ່ນບໍ່ພົບການລະເມີດ ມີການເປີດ-ປີດຕາມເວລາທີ່ກໍານົດໄວ້.

ສໍາລັບຮ້ານທີ່ລະເມີດຄະນະຮັບຜິດຊອບໄດ້ເຮັດບົດບັນທຶກປັບໄໝຕາມລະບຽບ ພ້ອມທັງໄດ້ອອກໜັງສືເຊີນໃຫ້ເຈົ້າຂອງທຸລະກິດ ໄປເສຍຄ່າປັບໄໝຢູ່ກອງບັນຊາການ ປກສ ນວ. ເຊິ່ງລະບຽບທີ່ກໍານົດໄວ້ແມ່ນຮ້ານອາຫານກາງແຈ້ງໃຫ້ປິດສຽງເພງ ປິດຮັບລູກຄ້າ ເວລາ 23:00 ໂມງ ແລະ ປິດຮ້ານເວລາ 24:00 ໂມງ, ສ່ວນຮ້ານບັນເທີງ ໃຫ້ປິດສຽງເພງ ປິດຮັບລູກຄ້າ ເວລາ 24:00 ໂມງ ແລະ ປິດຮ້ານເວລາ 1:00 ໂມງ, ໃນນີ້ລະເມີດລະບຽບການ ຄັ້ງທີ 1 ຈະກ່າວເຕືອນ ແລະ ປັບໄໝ ຄັ້ງທີ 2 ສັ່ງໃຫ້ຢຸດກິດຈະການ 1 ເດືອນ ພ້ອມທັງຍຶດເຄື່ອງສຽງ ແລະ ຕິດປ້າຍປະກາດຮ້ານຜິດກົດໝາຍ ສ່ວນຄັ້ງທີ 3 ຈະລົບລ້າງໃບອະນຸຍາດດໍາເນີນທຸລະກິດ.