ທາງມ້າລາຍ ມີໄວ້ໃຫ້ຄົນຍ່າງຂ້າມທາງ

ໂດຍ: ຜາຕຸງ

ໃນກົດລະບຽບການສັນຈອນຕາມທ້ອງຖະໜົນຫຼວງບໍ່ວ່າຈະຢູ່ໃນ ສປປ ລາວກໍ່ຄືຕ່າງປະເທດຕາມສາຍທາງຈຸດສຳຄັນຕ່າງໆ ເປັນຕົ້ນສາມແຍກ ສີ່ແຍກໄຟແດງ ຈຸດໂຮງຮຽນ,ໂຮງໝໍ, ສວນສາທາລະນະ….ເພິ່ນຈະຂີດເສັ້ນຕັດທາງໃຫ້ເປັນລາຍທີ່ເອີ້ນວ່າ ທາງມ້າລາຍໄວ້ຢ່າງຈະແຈ້ງ ເພື່ອເປັນບ່ອນໃຫ້ຄົນໄດ້ຍ່າງຂ້າມຖະໜົນໃຫ້ມີຄວາມປອດໄພຈາກອຸບັດເຫດຈາກລົ ເຊິ່ງທາງຈຸດນີ້ຈະບໍ່ອະນຸຍາດໃຫ້ລົດທຸກຊະນິດ ເຂົ້າໄປຈອດກວມກີດຂວາງການຂ້າມຖະໜົນຂອງຜູ້ຄົນທີ່ສັນຈອນໄປມາຢ່າງເດັດຂາດ, ຜ່ານມາສັງເກດເຫັນວ່າຢູ່ນະຄອນຫຼວງວຽງຈັນຍັງມີຜູ້ຂັບຂີ່ຈຳນວນຫຼາຍບໍ່ເຄົາລົບ ແລະ ບໍ່ປະຕິບັດຕາມລະບຽບກົດໝາຍທີ່ກຳນົດອອກ.

ແຕ່ວ່າ, ໃນທຸກມື້ນີ້ຢູ່ຕາມຖະໜົນຫົນທາງສາຍຕ່າງໆໃນນະຄອນຫຼວງວຽງຈັນ ຫຼື ຢູ່ຕາມຕົວເມືອງໃຫຍ່ໆ ເຮົາມັກເຫັນປາກົດການທີ່ຄົນຂັບລົດຢຸດລົດກວມທາງມ້າລາຍຕະຫຼອດ ຫຼື ອາດເວົ້າໄດ້ວ່າຈາກຄວາມມັກງ່າຍຈົນກາຍເປັນຄວາມຊິນເຄີຍຂອງຄົນຂັບລົດຈຳນວນຫຼາຍໄປແລ້ວ, ເຈົ້າເຮັດຂ້ອຍເຮັດຕົກນ້ຳຫົວພຽງກັນ, ຈິງຢູ່ວ່າງ່າຍຂອງຜູ້ຂັບລົດຈຳນວນໜ້ອຍ ແຕ່ມັນພັດສ້າງຄວາມຫຍຸ້ງໃຫ້ຄົນຈຳນວນຫຼາຍ, ປາກົດການນີ້ ໃນເມື່ອກ່ອນເຫັນເຈົ້າໜ້າທີ່ກ່ຽວຂ້ອງໄດ້ເອົາໃຈໃສ່ໂຄສະນາ ແລະ ຄອຍເຕືອນຜູ້ຂັບຂີ່ທັງຫຼາຍບໍ່ໃຫ້ຢຸດລົດກວມທາງມ້າລາຍກໍເຫັນວ່າອ່າວເປັນລະບຽບຮຽບຮ້ອຍແດ່ ແຕ່ໄລຍະຫຼັງໆມານີ້ເຫັນວ່າມິດງຽບໄປ ແລະ ປາກົດການເກົ່າກໍກັບມາສ້າງຄວາມຫຍຸ້ງຍາກອີກເຊັ່ນເຄີຍ.

ຕາມທຳມະດາແລ້ວຢູ່ຕາມຈຸດໄຟແດງແຕ່ລະແຫ່ງທີ່ມີທາງມ້າລາຍຄືແນວນີ້ຜູ້ທີ່ຂັບຂີ່ຍວດຍານພາຫານະຍິ່ງໄດ້ເພີ່ມສະຕິລະມັດລະວັງສູງຂຶ້ນກວ່າປົກກະຕິ ເພາະຈະມີຄົນຂ້າມທາງເປັນປະຈຳ, ການຂັບລົດຕ້ອງຜ່ອນຄວມໄວລົົງເວລາໄຟແດງ ແລະ ບໍ່ຄວນຢຸດລົດກາຍເສັ້ນໝາຍສີຂາວໃນຂອບທາງມ້າລາຍ ຍ້ອນວ່າຖ້າຢຸດກາຍ ຫຼື ຢຸດກວມແລ້ວຜູ້ຄົນທີ່ຈະຂ້າມທາງກໍມີຄວາມຫຍຸ້ງຍາກສັບສົນຍ້ອນພຶດຕິກຳຂອງຄົນຈຳນວນໜ້ອຍໜຶ່ງ ຊຶ່ງກໍເຂົ້າໃຈວ່າມີບາງຄັ້ງອາດລືມຕົວໄປກໍມີ ແຕ່ມີບາງຈຳນວນຍັງຂາດຈຳຍາບັນຂອງຄົນຂັບລົດທີ່ດີມີມາລະຍາດ ຕັ້ງຫາກມີເຈຕະນາຝ່າຝືນລະບຽບການສັນຈອນທາງບົກ ຊຶ່ງສົມຄວນຕ້ອງປະຕິບັດຕາມລະບຽບກົດໝາຍຢ່າງເຂັ້ມງວດ.

ການຂ້າມທາງຢູ່ຈຸດທາງມ້າລາຍໃນທຸກມື້ນີ້ບໍ່ມີສະເພາະແຕ່ຄົນລາວເຮົາເທົ່ານັ້ນມັນຍັງມີຄົນຕ່າງ ປະເທດທີ່ເຂົ້າມາປະຕິບັດໜ້າທີ່, ເຂົ້າມາທ່ອງທ່ຽວລາວຈຳນວນບໍ່ໜ້ອຍທີ່ເວລາຂ້າມທາງເຂົາເຈົ້າຈະໃຊ້ຈຸດທາງມ້າລາຍເປັນບ່ອນຂ້າມຖະໜົນເພື່ອຄວາມປອດໄພຈາກອຸບັດເຫດປະເທດຊາດພວມພັດທະນາໃນທຸກດ້ານ ເສດຖະກິດຄ່ອຍໆຟື້ນຕົວຂຶ້ນ, ດັ່ງນັ້ນຈິດໃຈຂອງຄົນສົມຄວນໄດ້ພັດທະນາໄປພ້ອມກັນ ຈຶ່ງຈະເຮັດໃຫ້ປະເທດຊາດມີຄວາມສະຫງົບ, ສັງຄົມມີຄວາມເປັນລະບຽບຮຽບຮ້ອຍ ແລະ ໜ້າຢູ່ຂຶ້ນເລື້ອຍໆ, ຍິ່ງປີ 2024 ເປັນປີທ່ອງທ່ຽວລາວຢ່າງເຕັມຮູບແບບ ກໍຍິ່ງຈະມີນັກທ່ອງທ່ຽວຈາກຕ່າງປະເທດເຂົ້າມາທ່ຽວລາວໃນແຕ່ລະທ້ອງຖິ່ນເປັນຈຳນວນຫຼາຍຕາມຄາດຫຼາຍແລ້ວອາດຈະມີເຖິງ  2 ລ້ານ 7 ແສນຄົນຕາມການຄາດຄະເນ.

ດັ່ງນັ້ນ ຜູ້ຂັບຂີ່ລົດລາງພາຫານະຕາມທ້ອງຖະໜົນລວມທັງຜູ້ຂັບລົດນຳທ່ຽວຈຳເປັນຕ້ອງຮຽນຮູ້ເຄົາລົບລະບຽບການສັນຈອນທາງບົກ, ບັນດາປ້າຍຫ້າມຄືນໃໝ່ໃຫ້ລະອຽດເຖິງຖອງ ແລ້ວພ້ອມກັນປະຕິບັດຕາມໃຫ້ເຂັ້ມງວດ ເພື່ອຄວາມເປັນລະບຽບຮຽບຮ້ອຍຂອງບ້ານເມືອງ ເຮັດໃຫ້ແຂກຄົນຜູ້ມາຢ້ຽມຢາມມີຄວາມປະທັບໃຈໃນການບໍລິການ ແລະ ການເປັນເຈົ້າພບທີ່ດີຂອງຄົນລາວ ຢ່າໃຫ້ເຂົ້າເວົ້າວ່າ ຄົນຂັບລົດຢູ່ລາວມັກງ່າຍ ຂາດຈັນຍາບັນ ຈົ່ງຢ່າເຫັນແຕ່ຄວາມມັກງ່າຍເພາະມັນອາດພາໃຫ້ມີຄວາມຫຍຸ້ງຍາກຫຼາຍເທົ່າກໍ່ເປັນໄດ້ ຜູ້ທີ່ມີໃບອະນຸຍາດການຂັບຂີ່ທຸກຄົນຕ້ອງຄຳນຶງຢູ່ສະເໝີວ່າ ທາງມ້າລາຍມີໄວ້ໃຫ້ຄົນຍ່າງຂ້າມທາງຢ່າງປອດໄພ ບໍ່ແມ່ນມີໄວ້ໃຫ້ລົດຈອດກວມການສັນຈອນ.