ສົງຄາມກາຊາຂ້າຊີວິດປະຊາຊົນເກີນ 20.000 ຄົນ ອີກເຄິ່ງລ້ານກໍາລັງອຶດຫິວ

ການສູ້ຮົບຢ່າງດຸເດືອດ ແລະ ຍືດເຍື້ອມາເກືອບ 3 ເດືອນ ລະຫວ່າງອິດສະລາແອນ-ກຸ່ມຮາມັດ ສົ່ງຜົນເຮັດໃຫ້ປະຊາຊົນຢູ່ເຂດກາຊາເສຍຊີວິດແລ້ວຫລາຍກວ່າ 20.000 ຄົນ ແລະ ອີກປະມານ 500.000 ຄົນ ຕ້ອງການການຊ່ວຍເຫລືອດ້ານອາຫານຢ່າງຮີບດ່ວນ.

ວັນທີ 24 ທັນວາ, ສໍານັກຂ່າວຕ່າງປະເທດລາຍງານວ່າ: ກະຊວງສາທາລະນະສຸກປາແລັສຕິນລາຍງານວ່າ: ສົງຄາມລະຫວ່າງອິດສະລາແອນກັບກຸ່ມຮາມັດ ເຊິ່ງເລີ່ມຂຶ້ນ ແລະ ຍືດເຍື້ອມາແຕ່ວັນທີ 7 ຕຸລາຜ່ານມາ ຂ້າຊີວິດປະຊາຊົນຢູ່ເຂດກາຊາແລ້ວຫລາຍກວ່າ 20.000 ຄົນ ຄິດເປັນເກືອບ 1% ຂອງປະຊາກອນທັງໝົດ ຕາມສະຖິຕິກ່ອນເກີດສົງຄາມຄັ້ງນີ້.

ຂະນະທີ່ປະຕິບັດການທາງທະຫານຂອງອິດສະລາແອນຢູ່ເຂດກາຊາ ເຊິ່ງເນັ້ນການໂຈມຕີທາງອາກາດເປັນຫລັກ ເຮັດໃຫ້ປະມານ 85% ຂອງປະຊາກອນຢູ່ເຂດກາຊາບໍ່ມີບ່ອນຢູ່ອາໄສ ແລະ ຊາວກາຊາປະມານ 500.000 ຄົນ ຕ້ອງການການຊ່ວຍເຫລືອດ້ານອາຫານຢ່າງຮີບດ່ວນ. ຕາມຂໍ້ມູນຂອງສະຫະປະຊາຊາດ (UN).

ເຖິງຢ່າງໃດກໍຕາມ, ກອງທັບອິດສະລາແອນຢືນຢັນວ່າ: ຈະເດີນໜ້າປະຕິບັດການທາງທະຫານຢູ່ເຂດກາຊາຕໍ່ໄປ ຈົນກວ່າຈະບັນລຸເປົ້າໝາຍສູງສຸດຄື “ການກວາດລ້າງກຸ່ມຮາມັດໃຫ້ສິ້ນຊາກ” ເຖິງວ່າສະພາຄວາມໝັ້ນຄົງແຫ່ງສະຫະປະຊາຊາດ (UNSC) ມີມະຕິໃນວັນທີ 22 ທັນວາຜ່ານມາ ຮຽກຮ້ອງ “ຄູ່ສົງຄາມທຸກຝ່າຍ” ອະນຸຍາດໃຫ້ການສົ່ງມອບການຊ່ວຍເຫລືອດ້ານມະນຸດສະທໍາເຂົ້າສູ່ເຂດກາຊາ “ໂດຍປາສະຈາກອຸປະສັກ ແລະ ຄວບຄຸມເປັນວົງກວ້າງ”.

ຂະນະດຽວກັນ, UNSC ຮຽກຮ້ອງ “ການກໍານົດເງື່ອນໄຂ ເພື່ອນໍາໄປສູ່ການຢຸດຕິຄວາມຮຸນແຮງຢ່າງຍືນຍົງ” “ຢູ່ເຂດກາຊາ ເຖິງວ່າບໍ່ໄດ້ກໍານົດໄລຍະເວລາຢ່າງແນ່ນອນ, ແຕ່ຊັດເຈນວ່າ: ເປັນການຫລີກລ່ຽງໃຊ້ຄໍາວ່າ “ຢຸດຍິງ” ເພື່ອປ້ອງກັນຄວາມສ່ຽງຈາກການຖືກຕອບໂຕ້ໂດຍອາເມລິກາ ທີ່ເປັນໜຶ່ງໃນສະມາຊິກຖາວອນ ແລະ ມີສິດໃຊ້ອໍານາດດັ່ງກ່າວເພື່ອຍົກເລີກມະຕິໃດກໍຕາມ.

ທັງນີ້, ການລົງມະຕິຂອງ UNSC ຖືວ່າ: ມີຜົນຜູກພັນຕາມກົດໝາຍສາກົນ ແລະ ຕ້ອງຜ່ານໂດຍບໍ່ມີການຄັດຄ້ານຈາກສະມາຊິກຖາວອນປະເທດໃດ ໂດຍການລົງມະຕິຄັ້ງນີ້ໄດ້ຮັບສຽງສະໜັບສະໜູນ 13 ສຽງ, ສ່ວນອາເມລິກາ ແລະ ຣັດເຊຍ ເຊິ່ງເປັນອີກໜຶ່ງສະມາຊິກຖາວອນ ໃຊ້ສິດງົດອອກສຽງ.