IAEA ລະບຸ ສປປ ເກົາຫລີ ພັດທະນາອາວຸດ ຢ່າງວ່ອງໄວເປັນໄພຄຸກຄາມຕໍ່ໂລກ
ທະບວງການປະລະມານູສາກົນ ຫລື IAEA ເຊິ່ງເປັນໜ່ວຍງານຂອງສະຫະປະຊາຊາດ ກ່າວໃນວັນທີ 29 ກັນຍາວ່າ: ກໍລະນີທີ່ ສປປ ເກົາຫລີ ທົດລອງອາວຸດນິວເຄຼຍຄັ້ງທີ 6 ໃນວັນທີ 3 ກັນຍາຜ່ານມາ ສະແດງໃຫ້ເຫັນວ່າ: ສປປ ເກົາຫລີ ສາມາດພັດທະນາອາວຸດໄດ້ຢ່າງວ່ອງໄວ ເຊິ່ງຖືເປັນໄພຄຸກຄາມໃໝ່ຂອງໂລກ.
ທ່ານ ຢູກິຢະ ອາມາໂນະ ຜູ້ອຳນວຍການ IAEA ກ່າວຢູ່ນະຄອນຫລວງເຊອຸນ ຂອງ ສ.ເກົາຫລີ ວ່າ: ການທົດລອງອາວຸດນິວເຄຼຍຄັ້ງຫລ້າສຸດຂອງ ສປປ ເກົາຫລີ ມີຂະໜາດໃຫຍ່ ເຊິ່ງມີຄວາມໝາຍວ່າ: ສປປ ເກົາຫລີ ມີຄວາມກ້າວໜ້າຢ່າງວ່ອງໄວໃນເລື່ອງນີ້ ເຊິ່ງເມື່ອພິຈາລະນາໃນດ້ານອື່ນໆແລ້ວ ຖືວ່າ ສປປ ເກົາຫລີ ເປັນໄພຄຸກຄາມໃໝ່ ແລະ ເປັນຄຸກຄາມຂອງໂລກ. ທ່ານ ອາມາໂນະ ກ່າວພາຍຫລັງພົບປະຫາລືກັບທ່ານ ກັງ ຄາຢຸງ ວາຮາ ລັດຖະມົນຕີຕ່າງປະເທດ ສ.ເກົາຫລີ ວ່າ: IAEA ບໍ່ມີຂີດຄວາມສາມາດທີ່ຈະລະບຸໄດ້ວ່າ: ສປປ ເກົາຫລີ ທົດລອງລະເບີດໄຮໂດເຈນແທ້ຕາມທີ່ ສປປ ເກົາຫລີ ກ່າວອ້າງ ຫລື ບໍ່ ໂດຍສິ່ງສຳຄັນທີ່ສຸດໃນປັດຈຸບັນຄືປະຊາຄົມໂລກຈະຕ້ອງສາມັກຄີເປັນໜຶ່ງດຽວກັນ.
