ນາຍົກ ເນັ້ນໃຫ້ຂະແໜງພະລັງງານ ແລະ ບໍ່ແຮ່ ເອົາໃຈໃສ່ 5 ບັນຫາສຳຄັນໃນການພັດທະນາເສດຖະກິດ-ສັງຄົມ

ວັນທີ 22 ທັນວາ 2023, ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ເຂົ້າຮ່ວມພິທີປິດກອງປະຊຸມສະຫລຸບການຈັດຕັ້ງປະຕິບັດແຜນພັດທະນາວຽກງານພະລັງງານ ແລະ ບໍ່ແຮ່ ປະຈຳປີ 2023 ໂດຍໄດ້ໂອ້ລົມ ແລະ ຊີ້ນຳວ່າ: ຂະແໜງພະລັງງານ ແລະ ບໍ່ແຮ່ ແມ່ນຂະແໜງການໜຶ່ງໃນໂຄງປະກອບກົງຈັກຂອງລັດຖະບານທີ່ມີບົດບາດສໍາຄັນໃນຂະບວນການຈັດຕັ້ງປະຕິບັດແນວທາງປ່ຽນແປງໃໝ່ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ, ເປັນຂະແໜງໃຈກາງໃນການປະຕິບັດແນວທາງຫັນເປັນອຸດສາຫະກໍາ ແລະ ທັນສະໄໝຂອງພັກ. ຜົນສໍາເລັດຂອງການພັດທະນາວຽກງານພະລັງງານ ແລະ ບໍ່ແຮ່ ໃນໄລຍະທີ່ຜ່ານມາໄດ້ກາຍເປັນພື້ນຖານທີ່ສໍາຄັນຂອງການພັດທະນາປະເທດຊາດໃນໄລຍະໃໝ່, ຂະແໜງພະລັງງານ ແລະ ບໍ່ແຮ່ ແມ່ນຂະແໜງອຸດສາຫະກໍາທີ່ມີລັກສະນະເປັນເຈົ້າພາທາງໃຫ້ແກ່ການພັດທະນາເສດຖະກິດ-ສັງຄົມຂອງປະເທດຊາດ.

ພ້ອມນີ້, ກໍເນັ້ນໃຫ້ຄະນະພັກ, ຄະນະນໍາກະຊວງພະລັງງານ ແລະ ບໍ່ແຮ່ ທຸກຂັ້ນເອົາໃຈໃສ່ບາງບັນຫາດັ່ງນີ້:

1. ໃຫ້ຂະແໜງພະລັງງານ ແລະ ບໍ່ແຮ່ ເອົາໃຈພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ IX, ບ່ອນໃດບໍ່ທັນແທດເໝາະກໍໃຫ້ເບິ່ງຄືນ ແລະ ປັບປຸງໃຫ້ສອດຄ່ອງກັບທິດທາງ, ໜ້າທີ່ລວມ, ຄວາມຮຽກຮ້ອງຕ້ອງການ ແລະ ເງື່ອນໄຂໃໝ່ ທັງໃຫ້ສອດຄ່ອງກັບຄວາມສາມາດຕົວຈິງ.
2. ການພັດທະນາດ້ານພະລັງງານ, ໃຫ້ແນໃສ່ແຜນພັດທະນາພະລັງງານແຫ່ງຊາດ ເພື່ອໃຫ້ມັນສອດຄ່ອງ, ເຂົ້າແກັບເຂົ້າເກຍກັນ. ດັດສົມໃຫ້ສອດຄ່ອງ, ມີປະສິດທິຜົນ.
3. ສະເໜີສືບຕໍ່ພັດທະນາວຽກງານບໍ່ແຮ່ ແລະ ຊີ້ນໍາ, ຊຸກຍູ້ ການປະຕິບັດຕາມທິດເປັນມິດກັບສິ່ງແວດລ້ອມ, ຂະຫຍາຍຕົວແບບໜັກແໜ້ນ, ຕໍ່ເນື່ອງ ແລະ ຍືນຍົງ; ຂຸດຄົ້ນແຮ່ທາດທີ່ມີລາຄາສູງ, ເປັນທີ່ຕ້ອງການຂອງຕະຫລາດ ຕິດພັນຢ່າງແໜ້ນແຟ້ນກັບການປຸງແຕ່ງ ແລະ ສົ່ງຜະລິດຕະພັນແຮ່ທາດອອກໄປຕ່າງປະເທດ ແທນການສົ່ງແຮ່ທາດແບບເຂັ້ມຂຸ້ນອອກ.
4. ສຸມໃສ່ການປັບປຸງຫົວໜ່ວຍທຸລະກິດຢູ່ໃນຂະແໜງພະລັງງານ ແລະ ບໍ່ແຮ່ໃຫຫ້ມີການຫັນປ່ຽນ, ສາມາດຮອງຮັບການເຮັດບົດບາດເປັນເຈົ້າພາທາງໃຫ້ແກ່ຫົວໜ່ວຍວິສາຫະກິດໃນພາກເອກະຊົນໄດ້, ເປັນຕົ້ນແມ່ນ : ການແກ້ໄຂສະພາບຕ່ອງທາງດ້ານການເງິນ, ການແກ້ໄຂໜີ້ສິນ, ການປັບປຸງຂອດບໍລິການ, ຫຼຸດຜ່ອນຂັ້ນຕອນໃຫ້ສັ້ນລົງ, ຮັບປະກັນຄວາມວ່ອງໄວ ແລະ ມີຄຸນນະພາບ, ໄດ້ມາດຕາຖານສູງ.
5.  ສຸມໃສ່ຍົກສູງຄຸນນະພາບຂອງບຸກຄະລາກອນໃຫ້ທຽມທັນກັບຄວາມຕ້ອງການ ແລະ ສາມາດຮອງຮັບການຈັດຕັ້ງປະຕິບັດໃຫ້ມີຄຸນນະພາບສູງ ແມ່ນຄວາມຈໍາເປັນພາວະວິໄສ.