ໂຮງໝໍ ແຂວງຫລວງພະບາງ ແລະ ແຂວງອຸດົມໄຊ ໄດ້ຮັບເຄື່ອງຜະລິດອົກຊີແຊນທາງການແພດ ມູນຄ່າຫລາຍກວ່າ 33 ຕື້ກີບ
ວັນທີ 20 ທັນວາ 2023, ອົງການອະນາໄມໂລກ (WHO) ໄດ້ໃຫ້ການສະໜູນສະໜູນ ມອບ ແລະ ເປີດນຳໃຊ້ເຄື່ອງຜະລິດອົກຊີແຊນທາງການແພດ ເຄື່ອງທີ 3 ແລະ 4 ໃຫ້ໂຮງໝໍແຂວງຫລວງພະບາງ ແລະ ແຂວງອຸດົມໄຊ, ມີ ທ່ານ ບຸນແຝງ ພູມມະໄລສິດ ລັດຖະມົນຕີ ກະຊວງສາທາລະນະສຸກ ແລະ ທ່ານ ນາງ ຢູລີ ພາກ ຫົວໜ້າປະສາງງານດ້ານລະບົບສາທາລະນະສຸກ ຕາງໜ້າອົງການອະນາໄມໂລກ.
ໂອກາດນີ້, ທ່ານ ລັດຖະມົນຕີ ກະຊວງສາທາລະນະສຸກ ມີຄຳເຫັນວ່າ: “ການຊ່ວຍເຫລືອ ຂອງອົງການອະນາໄມໂລກໃນການຕິດຕັ້ງ ແລະ ເປີດການນຳໃຊ້ເຄື່ອງຜະລິດອົກຊີແຊນຢູ່ທີ່ໂຮງໝໍແຂວງຫລວງພະບາງ ແລະ ແຂວງອຸດົມໄຊ ມີຄວາມສຳຄັນຫລາຍໃນການສ້າງຄວາມເຂັ້ມແຂງໃຫ້ແກ່ພື້ນຖານໂຄງລ່າງສຳລັບການປິ່ນປົວຮັກສາສຸຂະພາບ, ການປັບປຸງຄວາມອາດສາມາດໃນການໂຕ້ຕອບໃນສະຖານະການສຸກເສີນ, ການຍົກລະດັບຄຸນນະພາບ ໂດຍລວມຂອງການປິ່ນປົວຮັກສາສຸຂະພາບ ຢູ່ໃນ 2 ແຂວງ ພ້ອມທັງການຫລຸດຜ່ອນຄ່າໃຊ້ຈ່າຍສຳລັບການປິ່ນປົວ ຂອງຄົນເຈັບທີ່ມາໃຊ້ບໍລິການ.
ເຄື່ອງຜະລິດອົກຊີແຊນທີ່ມອບໃນຄັ້ງນີ້ແມ່ນສ່ວນໜຶ່ງຂອງການຊ່ວຍເຫລືອຈາກອົງການອະນາໄມໂລກ ມູນຄ່າ 1,7 ລ້ານໂດລາສະຫະລັດ ຫລື ຫລາຍກວ່າ 33 ຕື້ກີບ, ເຊິ່ງຈະສາມາດສະໜອງອົກຊີແຊນໄດ້ສູງເຖິງ 75.000 ບັ້ງຕໍ່ປີ ເພື່ອຊ່ວຍເຫລືອຄົນເຈັບຫລາຍສິບພັນຄົນ, ທັງສາມາດຊ່ວຍເຫລືອຄົນເຈັບຫລາຍພັນຄົນ, ຊ່ວຍຫລຸດຜ່ອນຄ່າໃຊ້ຈ່າຍຂອງໂຮງໝໍ ໃນການຊື້ອົກຊີຈາກບ່ອນອື່ນເຂົ້າມາບໍລິການ ແລະ ຈະຊ່ວຍທັງຄົນເຈັບ ທີ່ເຂົ້າຮັບການຜ່າຕັດ, ແມ່ ແລະ ເດັກເກີດໃໝ່, ຄົນເຈັບທີ່ເປັນພະຍາດຫົວໃຈວາຍ, ພະຍາດຫອບຫືດ ຫລື ອັກເສບປອດໃນລະດັບທີ່ດີຂຶ້ນ
