ລັດຖະມົນຕີກະຊວງ ຮສສ ເນັ້ນໃຫ້ ຮສສ ແຂວງຜົ້ງສາລີ ເພີ່ມທະວີການຫັນເປັນມືອາຊີບ ແລະ ພັດທະນາວິຊາຊີບໃຫ້ປະຊາຊົນໄດ້ມີວຽກເຮັດງານທຳ

ວັນທີ 19 ທັນວາ 2023, ທ່ານ ນາງ ໃບຄຳ ຂັດທິຍະ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ (ຮສສ) ພ້ອມດ້ວຍຄະນະໄດ້ລົງເຄື່ອນໄຫວຊຸກຍູ້ວຽກງານຂະແໜງແຮງງານ ແລະ ສະຫວັດດີການສັງຄົມ ຢູ່ແຂວງຜົ້ງສາລີ.

ໂອກາດນີ້, ທ່ານ ນາງ ໃບຄຳ ຂັດທິຍະ ໄດ້ເນັ້ນໃຫ້ຂະແໜງແຮງງານ ແລະ ສະຫວັດດີການສັງຄົມ ແຂວງ ເອົາໃຈໃສ່ເພີ່ມທະວີການຫັນປ່ຽນຢ່າງເລິກເຊິ່ງຮອບດ້ານ, ເຂັ້ມແຂງ, ໂປ່ງໃສ, ຫັນເປັນມືອາຊີບ, ເຕົ້າໂຮມຄວາມສາມັກຄີໃຫ້ເປັນປຶກແຜ່ນ, ປັບປຸງແບບແຜນວິທີການເຮັດວຽກ ບົນຫລັກການນໍາພາລວມສູນປະຊາທິປະໄຕ, ການນໍາພາເປັນໝູ່ຄະນະແບ່ງວຽກໃຫ້ບຸກຄົນຮັບຜິດຊອບ, ມີການຕິດຕາມ, ກວດກາຊຸກຍູ້ ການຈັດຕັ້ງປະຕິບັດວຽກງານ, ແກ້ໄຂບັນຫາທີ່ຄົງຄ້າງຢ່າງເປັນລະບົບເຮັດໃຫ້ທຸກວຽກງານສາມາດຂັບເຄື່ອນໄປຂ້າງໜ້າໃຫ້ໄດ້ດີ ເປັນຕົ້ນແມ່ນ: ນະໂຍບາຍຕໍ່ຜູ້ມີຜົນງານໃນການປະຕິວັດຊາດ, ວຽກຊ່ວຍເຫລືອໄພພິບັດ,ຊ່ວຍເຫລືອສັງຄົມ, ຄຸ້ມຄອງແຮງງານພາຍໃນ ແລະ ຕ່າງປະເທດໃນການເຄື່ອນຍ້າຍແຮງງານໃຫ້ຖືກຕ້ອງຕາມລະບຽບກົດໝາຍແລະໄດ້ຮັບການປົກປ້ອງສິດຜົນປະໂຫຍດເປັນຢ່າງດີ.

ຖືວຽກງານພັດທະນາສືມືແຮງງານ ເປັນໃຈກາງໃນການປະສານສົມທົບກັບພາກສ່ວນຕ່າງໆ ໂດຍການຝຶກອົບຮົມວິຊາຊີບໃຫ້ປະຊາຊົນ ກໍຄືແຮງງານລາວ ເພື່ອຕອບສະໜອງແຮງງານ ເຂົ້າສູ່ຕະຫລາດ ພ້ອມທັງອອກໃບຢັ້ງຍືນມາດຕະຖານສີມືແຮງງານ ໃຫ້ໄດ້ຮັບຄ່າຕອບແທນທີ່ເໝາະສົມຕາມຕຳແໜ່ງງານຫັນເອົາການປູກ-ການລ້ຽງ ມາເປັນການຜະລິດເປັນສິນຄ້າ, ການບໍລິການ ແລະ ການຄ້າຂາຍໃຫ້ເປັນສິນຄ້າປະຈຳແຕ່ລະທ້ອງຖິ່ນ ເພື່ອພັດທະນາວິຊາຊີບໃຫ້ປະຊາຊົນໄດ້ມີວຽກເຮັດງານທຳສ້າງລາຍຮັບເຂົ້າໃນຄອບຄົວ ແລະ ວຽກງານປະກັນສຸຂະພາບກໍໃຫ້ເປັນລະບົບການບໍລິການ ເພື່ອອຳນວຍຄວາມສະດວກໃຫ້ແກ່ຜູ້ປະກັນຕົນ ສິ່ງສຳຄັນ ຫັນການບໍລິການພາກລັດໄປສູ່ສັງຄົມ ແມ່ນຕ້ອງໄດ້ຄົ້ນຄວ້າ, ເຊື່ອມຊຶມ ບັນດານິຕິກຳ ຂອງຂະແໜງ ຮສສ ແລະ ຂອງແຂວງ ຕິດພັນກັບການກຳນົດແຜນຕຳແໜ່ງງານ, ບຳລຸງສ້າງ ພະນັກງານ ເພື່ອສ້າງບຸກຄະລາກອນໃຫ້ມີຄວາມຮູ້ ຄວາມສາມາດ ເພື່ອຕົນ ຮອງຮັບກັບວຽກງານໃນຂະແໜງການຂອງໃຫ້ດີຂຶ້ນເປັນກ້າວໆ.